Իսրայելի պաշտպանության նախարարը եղել է Վրաստանում և Ադրբեջանում. ինչու՞ նա չի գնացել Հայաստան

Իսրայելի պաշտպանության նախարար Ավիգադոր Լիբերմանը ժամանել է Վրաստան և Ադրբեջան, որտեղ հանդիպել է առաջնորդների, պաշտպանության նախարարների և հատուկ ծառայությունների ղեկավարների հետ:

Ինչու՞ Լիբերմանը չի գնացել Հայաստան: Այդ հարցը իսրայելցի փորձագետներին տվել են տեղի «9-րդ ալիք» հեռուստաալիքի եթերում: Ամփոփում ենք հաղորդման ընթացքում հնչած կարծիքները:

Վրաստան

Իսրայելա—վրացական հարաբերություններում կարևորագույն հարցը դարձել է ռազմական ոլորտում երկու երկրների համագործակցության վերականգնումը:

Իսրայելն ակտիվորեն մասնակցել է վրացական բանակի արդիականացմանը մինչև 2008թ—ը: 2008թ. օգոստոսյան պատերազմից հետո երկու երկրների միջև ռազմական համագործակցության բոլոր ծրագրերը դադարեցվեցին. Իսրայելը դա արեց՝ հետևելով ԱՄՆ—ի օրինակին:

Երկու երկրներն էլ այդ որոշումը բացատրել են որպես Հարավային Կովկասում լարվածությունը թուլացնելու փորձ: Չնայած մինչ այդ Իսրայելն ակտիվորեն մասնակցում էր վրացական բանակի արդիականացմանը:

2017թ. վերջին ԱՄՆ—ը հայտարարեց, որ հնարավոր է՝ վերսկսի համագործակցությունը Վրաստանի հետ: Եվ Իսրայելը նույնպես այժմ փոխել է իր ռազմավարությունը և վերսկսում է ռազմական գործընկերությունը Վրաստանի հետ:

•  Ինչու է Ամերիկան Javelin հակատանկային հրթիռներ տալիս Վրաստանին, և ինչ կապ ունի այստեղ Ռուսաստանը

Ադրբեջան

Ադրբեջանում Իսրայելի պաշտպանության նախարարի աննախադեպ երկար՝ հնգօրյա այցը, ըստ իսրայելցի քաղաքագետ Արիե Գուտի, բացատրվում է մի քանի պատճառներով: Դրանց թվում են.

• Ադրբեջանը Իսրայելի կարևորագույն տնտեսական գործընկերն է. ապրանքաշրջանառությունը կազմում է մոտ 4 միլիարդ դոլար,

• Ադրբեջանը տարածաշրջանում իսրայելական ռազմական արտադրանքի ամենախոշոր գնորդն է,

• Ադրբեջանը կարևորագույն կետ է անդրկովկասյան նավթագազային միջանցքում, որը բացառիկ նշանակություն է ձեռք բերում Մերձավոր Արևելքում աճող լարվածության պայմաններում: Պատահական չէ, որ Ավիգադոր Լիբերմանի այցը անմիջապես հաջորդեց Հարավային Կովկաս Գերմանիայի կանցլեր Անգելա Մերկելի այցին:

• Ադրբեջանի դերը՝ որպես միջնորդ, աճում է Սիրիայի ճգնաժամի խորացման ֆոնին, որտեղ խաչվում են Թուրքիայի, Իրանի, Ռուսաստանի, ԱՄՆ—ի և Իսրայելի շահերը: Վերջին շրջանում ակտիվացել են կապերը Ռուսաստանի և Ադրբեջանի նախագահներ Պուտինի և Ալիևի միջև, ասում է Արիե Գուտը:

Վերլուծաբանները նաև մատնանշում են անձնական բարեկամությունը, որը կապում է Իսրայելի պաշտպանության նախարարին Ադրբեջանի բարձրագույն ղեկավարության հետ:

Հայաստան

Հարավային Կովկասի երեք երկրներից Ավիգադոր Լիբերմանը չի այցելել միայն Հայաստան: Մասնավորապես, այդ կապակցությամբ հնչում են հետևյալ կարծիքները.

• Հայաստանի և Իսրայելի միջև ռազմական և տնտեսական համագործակցության մակարդակը ցածր է,

• Հայաստանն առանցքային դերակատար չէ Իսրայելին և ԱՄՆ—ին հետաքրքրող երկու կարևորագույն հարցերում՝ Սիրիայի ճգնաժամում և նավթի ու գազի անդրկովկասյան մատակարարումներում,

• Իսրայելը պաշտպանում է Ադրբեջանի տարածքային ամբողջականությունը ղարաբաղյան հարցում,

• Իսրայելի և Հայաստանի հարաբերություններում պահպանվում է ցավոտ մի խնդիր. Իսրայելը չի ցանկանում ճանաչել 1915թ. Հայոց ցեղասպանությունը: Դրա համար Իսրայելի ներկայիս իշխանությունները դաժան քննադատության են ենթարկվում ներքին ընդդիմության կողմից: