Իսլամական սուգ Ադրբեջանում. արյան հանձնում՝ ինքնախարազանման փոխարեն
Այսօր Ադրբեջանում նշում են Աշուրան՝ այն օրը, երբ շիա մուսուլմանները սգում են Մուհամեդ մարգարեի թոռան ու նրա համախոհների մահը, որոնք նահատակվել են 7-րդ դարում: Երկրի մզկիթների մեծ մասում սգո արարողություններ են անցկացվել:
Մինչև վերջին ժամանակներս այդ օրը հավատացյալներից շատերն ինքնախարազանման գործողություններ էին իրականացնում. իրենց հարվածում էին շղթաներով՝ որպես վշտի նշան: Սակայն վերջին տարիներին պաշտոնյաներն ու կրոնական գործիչները կոչ են անում ժողովրդին զուսպ լինել, ինքնախարազանմամբ չզբաղվել, դրա փոխարեն դոնորություն անել՝ արյուն հանձնելով: Արյան հանձնման կետեր կան որոշ հիվանդանոցներում և պոլիկլինիկաներում, ինչպես նաև մզկիթներում:
Հուսեյնի զոհվելուց հետո մուսուլմանական աշխարհը երկու մասի բաժանվեց՝ շիաների, որոնք Հուսեյնի կողմնակիցներն են, և սունիների, որոնք Յազիդի կողմնակիցներն են: Այդ պառակտումը գոյություն ունի մինչև հիմա՝ ծնելով բազմաթիվ պատերազմներ և հակամարտություններ: Հետևաբար, Աշուրան սգո օր է միայն շիաների համար:
Թեև սունիներն այն նույնպես նշում են, բայց անում են դա այլ կերպ և այլ առիթով. Ղուրանի համաձայն՝ այդ օրը տեղի է ունեցել Երկնքի, Երկրի, հրեշտակների և առաջին մարդու արարումը, և ապոկալիպսիսը նույնպես այդ օրն է լինելու:
Բնակչության ոչ կրոնապաշտ հատվածի կյանքի վրա Աշուրան նույնպես ազդում է: Օրինակ, մինչև կեսօր փակ են լինում շատ խանութներ: Համարվում է, որ այդ օրը չի կարելի մազ ներկել, մատնահարդարում անել և ընդհանրապես հարդարվել: Առավելևս՝ բարձր երաժշտություն լսել և ինչ-որ տոնական միջոցառումներ նշել: Եվ ընդհանրապես, ողջ Մուհարամ ամսվա ընթացքում Ադրբեջանում հարսանիք չեն անում:
Աշուրային փողոցներում նաև թեյ են բաժանում որպես Հուսեյնի և նրա ընկերների հիշատակման ձև: