Իսլամական խաղերի պատճառով Ադրբեջանում ճանապարհային երթևեկության սահմանափակում են մտցրել

Ճանապարհային ոստիկանության գլխավոր վարչությունը տեղեկացրել է վարորդներին, որ Բաքվի առանձին ավտոմոբիլային ճանապարհներին 2017թ-ի մայիսի 5-ին սահմանափակման դեղին գիծ է ներմուծվում:

Սահմանափակումը մտցվում է Համերաշխության իսլամական 4-րդ խաղերին ներգրավված մեքենաների անխափան երթևեկությունն ապահովելու համար: Խաղերը կկայանան Բաքվում մայիսի 10-22-ը:

Քաղաքի կենտրոնում նույնպես կտրուկ կրճատվել են կայանատեղիները: Ճանապարհային ոստիկանությունը գրասենյակային աշխատողներին խորհուրդ է տալիս խաղերի օրերին օգտվել հասարակական տրանսպորտից:

«Վարորդների ուշադրությունն ենք հրավիրում այն փաստի վրա, որ արգելված կայանատեղիներում կայանած մեքենաները, ինչպես նաև ճամփեզրերին կայանած տրանսպորտային միջոցները, որոնք խաթարում են անխափան և հարմար երթևեկությունը, կտարհանվեն: Նման մեքենաների վարորդները վարչական պատասխանատվության կենթարկվեն», — ասված է Ճանապարհային ոստիկանության ուղերձում:

Սահմանափակման դեղին գիծը հատելու համար տուգանքը կազմում է (24 USD) 40 մանաթ: