Թուրքիայի նախագահը հաստատել է նախագահի իրավասություններն ընդլայնելու մասին սահմանադրական փոփոխությունները

Թուրքիայի նախագահ Ռեջեփ Թայիփ Էրդողանը փետրվարի 10-ին հաստատել է երկրի Սահմանադրությունում կատարվելիք փոփոխությունները, որոնք ընդլայնում են նախագահի իրավասություններն ու փաստացի նշանակում են անցում խորհրդարանական կառավարման համակարգից դեպի նախագահական: Երկրի օրենսդրության համաձայն՝ փոփոխությունները պետք է հաստատվեն հանրաքվեին:

Սահմանադրական փոփոխություններին ավելի վաղ 330 ձայնով կողմ է քվեարկել խորհրդարանը: Հանրաքվեն հավանաբար կկայանա ապրիլի 16-ին, վերջնական ամսաթիվը պետք է հաստատի ընտրական ադմինիստրացիան:

Սահմանադրական փոփոխությունների համաձայն՝ երկրում ուժեղ կուսակցական նախագահական կառավարում է մտցվում: Նախագահը դառնում է գործագիր իշխանության ղեկավար և օրենքի ուժ ունեցող հրամաններ տալու, արտակարգ դրություն մտցնելու և խորհրդարանն արձակելու իրավունք է ստանում:

Այդ փոփոխությունների համաձայն՝ խորհրդարանը զրկվում է իրավասությունների մի մասից, փոփոխվում է Դատավորների և դատախազների գերագույն խորհրդի կառուցվածքը:

Թուրքիայի գործող Սահմանադրությունն ընդունվել է 1982թ-ին: 2007թ-ի հանրաքվեի արդյունքում սահմանադրական փոփոխությունների փաթեթ է ընդունվել, որոնց համաձայն՝ նախագահն ընտրվում է համընդհանուր քվեարկությամբ, այլ ոչ թե խորհրդարանի կողմից, ինչպես հին Սահմանադրությունում: Առաջին ուղղակի նախագահական ընտրություններին 2014թ-ին նախագահ է ընտրվել Արդարություն և զարգացում կուսակցության առաջնորդ Ռեջեփ Թայիփ Էրդողանը, որը մինչ այդ 2003թ-ից վարչապետի պաշտոնն էր զբաղեցնում: