Թավշյա հեղափոխության վեցերորդ օրվա կարևոր իրադարձությունները
Նյութը պարբերաբար թարմացվում է
22:00, ապրիլի 18
Սկսվեց շարժման մասնակիցների խաղաղ երթը: Մարդիկ անցնում են Երևանի փողոցներով ձեռք ձեռքի տված:
21:50, ապրիլի 18
Ակցիայի մասնակիցները Հանրապետության հրապարակից երթով շարժվեցին Բաղրամյան 26 հասցեում գտնվող նախագահական նստավայր:
20:48, ապրիլի 18
Հայաստանում «թավշյա հեղափոխություն» իրականացնելու համար շարժման առաջնորդ, պատգամավոր Նիկոլ Փաշինյանը հրապարակել է մի քանի գործողություն՝
- Գյուղերում ու քաղաքներում բնակվող քաղաքացիները պետք է դիմեն իրենց շրջանների ղեկավարներին, որպեսզի նրանք հանդես գան «թավշյա հեղափոխության» աջակցության մասին կոչերով: «Գնացեք գյուղապետարաններ, «բռնեք» ավագանու անդամներին, պահանջեք նրանցից, որ հանդես գան այս համաժողովրդական շարժմանն աջակցելու մասին հայտարարությամբ»,- ասել է Նիկոլ Փաշինյանը:
- Պետական բոլոր մարմիններում սկսել հարյուրավոր քաղաքացիների նստացույցեր: «Որպես քաղաքացի մուտք գործեք նախարարությունների շենքերի ներսը ու պաշտոնյաների աշխատասենյակներում սկսեք նստացույց, որ նրանց համար նստելու տեղ չլինի: Պետք է այնպես անենք, որ նստելու տեղ չունենա անգամ Սերժ Սարգսյանը»,- ասաց նա:
- Ոստիկանությունն ու Ազգային անվտանգության ծառայությունը պետք է դադարեն «պաշտպանել» պետական կառույցների շենքերը քաղաքացիներից:
- Դպրոցականները պետք է «հանեն շպրտեն» իրենց ուսումնական հաստատություններում փակցված Սերժ Սարգսյանի լուսանկարները:
Պատգամավորն ասաց, որ շարունակվելու են նաև այս օրերին իրականացվող գործողությունները՝ փողոցների փակումն ու կառավարական շենքերի շրջափակումը:
«Վաղը Սերժ Սարգսյանի կառավարության առաջին նիստն է (շենքը գտնվում է Հանրապետության հրապարակում, որտեղ ընթանում է հանրահավաքը): Մենք նրա համար անակնկալ ենք պատրաստել»,- հայտարարեց Ն. Փաշինյանը:
19:42, ապրիլի 18
Հանրապետության հրապարակում մեկնարկել է բազմամարդ հանրահավաք. մասնակիցների թիվը չի զիջում երեկվա հանրահավաքի մասնակիցների թվին:
Հանրահավաք Հանրապետության հրապարակում
Posted by Ջեմնյուզ — JAMnews Armenian on ოთხშაბათი, 18 აპრილი, 2018
«Իրազեկ քաղաքացիների միավորումը» ՀԿ-ն անօդաչու թռչող սարքից արված լուսանկարների միջոցով հաշվարկել է, թե որքան մարդ է մասնակցել նախորդ հանրահավաքներին:
Ըստ այդմ՝
Ապրիլի 13, ժամը 19։30-ի դրությամբ, Ազատության հրպ. — 40500 մարդ
Ապրիլի 14, ժամը 19։30-ի դրությամբ, Ֆրանսիայի հրպ. — 3000 մարդ
Ապրիլի 15, ժամը 19։30-ի դրությամբ, Ֆրանսիայի հրպ. — 1900 մարդ
Ապրիլի 16, ժամը 14։00-ի դրությամբ, Ֆրանսիայի հրպ. — 3000 մարդ
Ապրիլի 17, ժամը 20։20-ի դրությամբ, Հանրապետության հրպ. — 33.000-35.000 մարդ:
Ընթացող հանրահավաքի մասնակիցների թիվը կհրապարկվի վաղը:
17:20, ապրիլի 18
Մինչ ակտիվիստները դժգոհում են Սերժ Սարգսյանի վարչապետության դեմ, վերջինս արդեն սկսել է ձևավորել նոր կառավարությունը: Նախկին վարչապետ Կարեն Կարապետյանը նշանակվել է առաջին փոխվարչապետ:
Մյուս երկու փոխվարչապետների պաշտոնում Սերժ Սարգսյանը նշանակել է նախկին փոխվարչապետ Վաչե Գաբրիելյանին ու Ազգային անվտանգության խորհրդի նախկին նախագահ Արմեն Գևորգյանին: Նշանակումների մասին հրամանագրերը ստորագրել է նորընտրված նախագահ Արմեն Սարգսյանը:
17:10, ապրիլի 18
Ակցիայի մասնակիցները կառավարական շենքերի մոտ են, որտեղ տեղակայված են արտաքին գործերի, մշակույթի, կրթության նախարարությունները: Շարժման առաջնորդը՝ Նիկոլ Փաշինյանը, կոչ է արել աշխատակիցներին դուրս գալ փողոց և միանալ ակցիային: Ապա Նիկոլ Փաշինյանը 1.30 ժամով քննարկումներ իրականացնելու համար հեռացավ իր համակիրներից:
Սպասելով իրենց առաջնորդին ցուցարարները երգում են հանրապետության հիմնը, հայկական հայտնի երգեր, վանկարկում են՝ «Քայլ արա, մերժիր Սերժին»:
Երեկոյան 19:00-ին հանրապետության գլխավոր հրապարակում տեղի կունենա հերթական հանրահավաքը:
16:10, ապրիլի 18
Բողոքի ակցիան շարունակվում է:
https://www.youtube.com/watch?v=FCWi-WQcTY8
Բերման ենթարկվածների թվում կան անչափահասներ և ուսանողներ: Ծնողներն ու լրագրողները հավաքվել են ոստիկանության բաժանմունքի մոտ և սպասում են, թե երբ նրանց բաց կթողնեն:
Մի քանիսին հենց նոր ազատ արձակեցին: Նրանցից մեկը՝ պոլիտեխնիական համալսարանի 18-ամյա ուսանողներից է, պատմել է, որ իրեն բերման են ենթարկել այն ժամանակ, երբ ինքը անցնում էր փողոցը, բայց ոստիկանությունը պատճառաբնել է, թե բաժանմունք են տանում փողոցը փակելու համար: Նրան ազատ են արձակել 3 ժամից ու տուգանել են 50.000 դրամի չափով: Միաժամանակ երիտասարդին տեղեկացրել են, որ որոշումը ենթակա է բողոքարկման:
Նրանք, ովքեր ազատ են արձակվում ոստիկանության բաժնից, ասում են, որ իրենց նկատմամբ բռնություն չի գործադրվել:
15:10, ապրիլի 18
Շարժման մասնակիցները հասել են քաղաքապետարանի շենքի մոտ և պահանջում են հանդիպում քացաքապետի հետ:
14:05, ապրիլի 18
Վանաձորում և Գյումրիում ևս բողոքի ակցիաներ են սկսվում:
13:02, ապրիլի 18
Այս պահի դրությամբ ոստկանությունը բերման է ենթարկել շարժման 66 մասնակցի: Այս մասին հայտնում է ոստիկանության հասարակայնության հետ կապերի և լրատվության վարչությունից:
12:30, ապրիլի 18
Նիկոլ Փաշինյանը, որը գլխավորում է անհնազանդության շարժումն ու երեկ հայտարարել է թավշյա հեղափոխության մեկնարկի մասին, առավոտից ցուցարարների հոծ բազմության հետ քայլում է Երևանի կենտրոնով:
Նստացույց Պետական Համալսարանի մոտ
Posted by Ջեմնյուզ — JAMnews Armenian on ოთხშაბათი, 18 აპრილი, 2018
Ոստիկանությունն առավոտից սկսել է բերման ենթարկել շարժման մասնակիցներին, որոնք փորձում են փողոցներ փակել: Երեկ երեկոյան բազմամարդ հանրահավաքի ժամանակ շարժման առաջնորդը հայտարարել էր, որ շարունակելու են փողոցներ փակել և պարալիզացնել երթևեկությունը: Եվ այսօր առավոտյան 10:00-ից ցուցարարները փորձում են իրագործել դա:
Ոստիկանությունը հայտարարում է, որ պետք է բացի որոշ փողոցների ավտոերթևեկությունը, ինչի պատճառով էլ բերման են ենթարկվում են դրան խոչընդոտող քաղաքացիները:
Փաշինյանն արդեն կարողացել է համոզել ոստիկաններին և թույլտվություն է ստացել, որպեսզի իր գլխավորած հոծ բազմության խաղաղ երթը շարունակվի:
Ոստիկանական պահակախումբը վարչապետի նստավայրի մերձակայքից այսօր դուրս է բերվել, մնացել է միայն մի քանի ոստիկան: Ավելի շատ ոստիկաններ կենտրոնացած են երկրորդական փողոցներում:
Շարժման առաջնորդը խոսափողը ձեռքին մշտապես հիշեցնում է ակցիայի մասնակիցներին.
«Հարգանքով վերաբերվել ոստիկաններին, ոչ մի բռնություն: Մեր պայքարն ուղղված է Սերժ Սարգսյանի դեմ, որը երեկվանից վարչապետ է: Մենք չենք պայքարում ոստիկանների դեմ»:
Փաշինյանը ժամանակ առ ժամանակ կոչ է անում ակցիայի մասնակիցներին հանել հիգիենիկ դիմակները, քանի որ իրենք ոչնչից չպետք է վախենան. ակցիան խաղաղ է, և ոստիկանությունն իրենց հանդեպ հատուկ միջոցներ չի կիրառի: Սակայն լրագրողները հաղորդում են, որ ոստիկանների մոտ հակագազներ են նկատվել, ինչը նշանակում է, որ հատուկ միջոցների կիրառումը չի բացառվում:
Իրավիճակը ցանկացած պահի կարող է սրվել: JAMnews-ը շարունակում է հետևել իրադարձությունների զարգացմանը:
Անհնազանդության շարժման մեկնարկի և վերջին օրերի մասին բոլոր մանրամասները՝ JAMnews-ի նյութերում.
Հայաստանի ընդդիմությունը ներխուժել է Հանրային ռադիոյի շենք՝ պահանջելով ուղիղ եթեր
Հայաստանի ոստիկանությունը պահանջում է դադարեցնել անհնազանդության ակցիան
