Հայաստանի Էջմիածին քաղաքում ջուր չկա. բնակիչները դժգոհում են՝ փակելով փողոցը

Լուսանկարը՝ 1in.am-ի

Երևանից ոչ հեռու գտնվող Էջմիածին քաղաքի բնակիչներն այսօր փակել էին գլխավոր ավտոճանապարհներից մեկը. նրանք պահանջում էին լուծել ջրամատակարարման հարցը:

Էջմիածնի բնակիչները պատմել են. շուրջ մեկ ամիս է խմելու ջուր չունեն, դիմել են պատկան մարմիններին՝ հարցը կարգավորելու խնդրանքով: Մեկ ամիս շարունակ նրանց խոստացել են, որ հարցը կլուծվի, բայց այդպես էլ չի լուծվել: Մարդիկ ճարահատյալ դիմել են ճանապարհը փակելու քայլին, որ իրենց խնդրին ուշադրություն դարձնեն:

«Երկու ամսից ավել է նորմալ ջուր չունենք, մի կաթիլ ջուր չկա: Որտեղ դիմում ենք՝ ասում են կկարգավորվի, բայց չի կարգավորվում»,- դժգոհել է բնակիչներից մեկը՝ նշելով, որ կրկին կփակեն ավտոճանապարհը, եթե սայլը տեղից չշարժվի:

Տարեց մեկ այլ բնակչուհի էլ ասել է, որ ամռան այս տապին անհնար է ապրել առանց ջրի. «Ոչ կարողանում ենք լվացվենք, ոչ զուգարան գնանք: Սենց ո՞նց կլինի: Խայտառակություն ա, մեր շենքում 70 հոգի ա ապրում, ոչ ոք ջուր չունի»:

Բնակիչները պատմել են, որ պատկան մարմինից իրենց տարբեր պատասխաններ են տվել, նախ ասել են, թե ջուր չկա, որովհետև վթար է եղել, խողովակի հետ խնդիր կա, ապա խոստացել են հարցը մեկ-երկու օրում կարգավորել, բայց չեն կարգավորել:

«Էս ո՞ր թիվն ա, որ ջուր չլինի, ծարավ մեռնենք, լվացք չկարողանանք անել, ամանները հավաքում ենք, գնում ենք կանանցով ջուր ենք բերում դույլերով, որ լվանանք: Ո՞վ ա տեսել՝ երեխան դուրս իջնի խաղա, գա տուն, չկարողանա լվանալ ձեռքերը»,-  դժգոհել է բնակչուհիներից մեկը:

Քաղաքային իշխանությունները առայժմ չեն պատասխանել, թե ինչո՞ւ բնակիչները ջուր չունեն և ե՞րբ կունենան: