Զբոսաշրջիկները Երևանի փողոցներում կկարողանան կողմնորոշվել սմարթֆոններով

Երևանում գործարկվել է նոր «QARTEZ» հավելվածը, որը թույլ կտա զբոսաշրջիկներին սմարթֆոնի կամ պլանշետի միջոցով առավել հեշտությամբ գտնել իրենց անհրաժեշտ վայրը:

Այս բջջային հավելվածը թույլ է տալիս ոչ միայն գտնել սեփական կոորդինատները (տեղադիրքը), տեղաշարժվել Երևանով, այլև՝ տեղեկություն ստանալ տարատեսակ ծառայություններ մատուցող կազմակերպությունների մասին անմիջապես շարժական սարքից՝ մեկ հպումով:

Բացի այդ, հավելվածում օգտատերը կարող է անհատական էջ ունենալ, որի միջոցով կարելի է կատարել զանգեր, ուղարկել էլեկտրոնային նամակներ, գրել մեկնաբանություններ, դիտել գովազդային տեսահոլովակներ, ծանոթանալ տվյալ պահին առկա հատուկ առաջարկներին:

Հավելվածն անվճար հասանելի է Android և iOS օպերացիոն համակարգերով գործող սմարթֆոնների համար, այսինքն օգտատերը պետք է վճարի միայն ծախսված շարժական ինտերնետի դիմաց:

Ակնկալվում է հավելվածը գործարկել նաև Դիլիջանի, Ծաղկաձորի և այլ քաղաքների համար, որոնք հադիսանում են Հայաստանում զբոսաշրջության զարգացման համար նպաստավոր քաղաքներ: Հավելվածը ստեղծվել է ՎիվաՍել-ՄՏՍ հեռահաղորդակցական ընկերության և «Լոկատոր» ընկերության կողմից: