Եվրոպական դատարանը տուգանել է Ադրբեջանին ևս յոթ գործով
Մարդու իրավունքների եվրոպական դատարանն Ադրբեջանին տուգանել է յոթ գործով՝ ընդհանուր առմամբ 56.300 եվրոյով։ Ընդ որում, դեռ մեկ ամիս էլ չի անցել այն բանից հետո, երբ ՄԻԵԴ-ը երկրին տուգանել էր շուրջ 300 հազար եվրոյով։
2021 թ․ մարտի 11-ին Մարդու իրավունքների եվրոպական դատարանը հայտարարել է յոթ հայցով իր վճռի մասին, որոնք Ադրբեջանից են ներկայացվել։
Վուգար Ալիևն՝ ընդդեմ Ադրբեջանի
Քաղակտիվիստ Վուգար Ալիևն Ադրբեջանի իշխանություններին մեղադրել էր ապօրինի մեղադրանքների և կալանքի համար։ Այսպես, Ալիևին տեղի դատարանը մեղավոր էր ճանաչել զենքի պահման համար և ազատազրկման դատապարտել։
- Ադրբեջանցի լրագրող Աֆղան Մուխտարլին դատի է տվել վրացական իշխանություններին
- Արդյո՞ք Արցախյան երկրորդ պատերազմը նախապես պայմանավորված էր․ մեկնաբանություն Բաքվից
- «Միայն Մոսկվան է գոհ իրադարձությունների զարգացումից»․ արևմտյան դիվանագետները՝ Վրաստանի կառավարությանը
Այս գործի քննության ընթացքում Ադրբեջանի կառավարությունը հայցվորին առաջարկել է 6 հազար եվրո տուգանքի վճարում։ Կողմերը համաձայնել են այս պայմաններին։
Կառավարությունը հայցվորներին փող է առաջարկում
Եվս երեք հայցվոր է համաձայնել տուգանք վճարելու մասին Ադրբեջանի իշխանության ներկայացուցիչների առաջարկին, հաղորդում է ՄԻԵԴ տեղեկատվական ծառայությունը։
Սաբզալիևը 10 ամսով կալանավորվել էր Սայիդ Նուրսիի ուսմունքի քարոզի համար։ Նա բողոքարկել էր դավանանքի ազատության խախտումը։ Այս հայցով նրան 4500 եվրոյի փոխհատուցում կվճարվի։
Իսկ Նաթիկ Միրզոևը բողոքել էր բանտում անորակ բուժօգնությունից։ Կառավարությունը Միրզոևին առաջարկել է 1500 եվրո փոխհատուցում, որին հայցվորը համաձայնել է։
Դուրնիսա Ահմեդովան, որն Ադրբեջանում դատապարտվել է խուլիգանության մեղադրանքով, որպես բարոյական վնասի փոխհատուցում կստանա 3000 եվրո։
Տասը հայցվորի՝ 3750-ական եվրո
Ռզամովն ու ևս ինը մարդ՝ ընդդեմ Ադրբեջանի գործում նույնպես հայցվորների և պատասխանող կողմի միջև փոխըմբռնում է գրանցվել։ Ադրբեջանի կառավարությունը նրանցից յուրաքանչյուրին 3750-ական եվրո կվճարի (այս գործով տուգանքի ընդհանուր չափը 37.500 եվրո է)՝ որպես բարոյական վնասի փոխհատուցում։
Նրանք բոլորը նույնպես թուրք քարոզիչ Սայիդ Նուրսիի ուսմունքի հետևորդներ են և ձերբակալվել են կրոնական հավաքի ժամանակ։ Հայցվորներն իշխանություններին մեղադրել են իրենց նկատմամբ անհարիր պահվածքի և դավանանքի իրավունքի, ինչպես նաև անձեռնմխելիության խախտման համար։
Գործերից մեկը կասեցվել է
Ընդդեմ Ադրբեջանի Իմանզադե Մամեդովի գործի վարույթը կասեցվել է հայցվորի մահվան պատճառով։
Կինը «Եհովայի վկաների» հետևորդ էր և իշխանություններին մեղադրում էր դավանանքի իրավունքի խախտման, ինչպես նաև սեփականության իրավունքին միջամտելու համար։
3800 եվրո՝ սեփականության իրավունքների խախտման համար
Երկրի կառավարությունը ՄԻԵԴ-ում ընդդեմ Ադրբեջանի Աղամամեդ Մամեդովի գործի քննութան ժամանակ հայցվորին առաջարկել է 3800 եվրո փոխհատուցում՝ որպես պատճառած բարոյական վնասի փոխհատուցում։
Մամեդովն իշխանություններին մեղադրում էր սեփականության իր իրավունքի խախտման համար։
