Եվրամիության ներկայացուցիչը շնորհավորել է Հարավային Օսիայի նորընտիր նախագահին: Թբիլիսին սպասում է Բրյուսելի պարզաբանումներին

Հարավային Կովկասում ճգնաժամային հարցերով Եվրամիության հատուկ ներկայացուցիչ Հերբերտ Զալբերը «պետք է փոխարինվի այլ պաշտոնյայով», — այդ մասին հայտարարել է կառավարության միակ անդամը, որը կառավարության նիստի ավարտին մեկնաբանել է եվրոպացի դիվանագետի սկանդալային հայտարարությունը՝ մշակույթի նախարար Միխայիլ Գիորգաձեն: Ավելի կոմպետենտ պաշտոնյաներն այդ հարցը ոչ մի կերպ չեն մեկնաբանում: Պատճառը, որի համար Թբիլիսիում դժգոհ են Զալբերի գործունեությունից, նրա հայտարարությունն է, որը նա արել է Հարավային Օսիա իր այցի ժամանակ մայիսի 16-ին:

Զալբերը շնորհավորել է Հարավային Օսիայի նորընտիր նախագահին ընտրություններում տարած հաղթանակի կապակցությամբ:

«Առաջին հերթին, ուզում եմ ձեզ շնորհավորել ընտրությունների արդյունքների և շատ կարևոր պաշտոնում ձեր աշխատանքի մեկնարկի կապակցությամբ», — դիմել է Զալբերն Անատոլի Բիբիլովին:

Ինչպես հաղորդել է Վրաստանի մշակույթի նախարարը լրագրողներին, դա կտրականապես անընդունելի է վրացական կողմի համար, որը դիմել է ԵՄ-ին, և տրամաբանական շարունակությունը պետք է Զալբերին այլ թեկնածուով փոխարինելը լինի:

Այդ հարցով Վրաստանում ԵՄ ներկայացուցիչ Յանոշ Հերմանը հրավիրվել է Վրաստանի արտգործնախարարություն: Հերմանի հետ հանդիպումից հետո ԱԳ փոխնախարար Դավիթ Դոնդուան հայտարարել է, որ ԵՄ կողմից բազմիցս Վրաստանին աջակցությություն հայտնելու հայտարարություններ են արվել, սակայն այս անգամ Թբիլիսին Բրյուսելից պարզաբանումներ է սպասում:

«Այն, ինչ մենք լսել ենք ԵՄ հատուկ ներկայացուցչից և Ժնևյան քննարկումների համանախագահից, մեղմ ասած, անընդունելի է և անհասկանալի: Դա հակասում է միջազգային իրավունքի սկզբունքներին և չի աջակցում հակամարտության խաղաղ կարգավորմանն ուղղված ինչպես Վրաստանի, այնպես էլ միջազգային հանրության ջանքերին: Մենք կապի մեջ ենք ԵՄ ղեկավարության հետ և հույս ունենք, որ Բրյուսելը կարձագանքի համապատասխան կերպով»,  — հայտարարել է Դոնդուան:

Յանոշ Հերմանն իր հերթին նշել է, որ Եվրամիությունը չի ճանաչում Հարավային Օսիայում անցկացված ընտրությունները:

«Այն, ինչ մենք ճանաչում և սատարում ենք, Վրաստանի տարածքային ամբողջականությունն ու ինքնիշխանությունն են: Փոխնախարարի հետ մենք խոսել ենք այդ ոլորտում համագործակցության մասին», — հայտարարել է Յանոշ Հերմանը:

Այն հարցին, թե ինչու է ԵՄ հատուկ ներկայացուցիչը մեկնել Հարավային Օսիա, Հերմանը պատասխանել է, որ նա ԵՄ դիրքորոշումը կբարձրաձայնի, իսկ «պարոն Զալբերն ինքը բացատրություններ կտա»:

Զալբերի այցը Ցխինվալ կապված էր ժնևյան քննարկումների 40-րդ հերթական փուլի հետ: Մայիսի 17-ին նա եղել է նաև աբխազիայում: Ժնևյան քննարկումների համանախագահները ներկա էին Գալում 3 անցակետերի փակմանը օկուպացիոն գծի վրա: Տեղում նրանք հանդիպել էին Գալի շրջանի ադմինիստրացիայի ղեկավար Թեմուր Նադարաիայի ու աբխազական կառավարության արտգործնախարար Դաուր Կովեի հետ:

• Հարավային Օսիայում անցկացված նախագահական ընտրություններում ապրիլի 9-ին հաղթել է Անատոլի Բիբիլովը, որն այդ պաշտոնում փոխարինելու է Լեոնիդ Թիբիլովին:
• Ժնևյան քննարկումների ձևաչափը ստեղծվել է Վրաստանի և Ռուսաստանի միջև հրադադարի մասին համաձայնագրի համաձայն 2008թ-ին: Բանակցությունների առաջին փուլը կայացել է 2008թ-ի հոկտեմբերին: Այսօրվա դրությամբ կայացել է բանակցությունների 39 փուլ: Հերթական փուլը նշանակված է հունիսի 20-21-ին: Քննարկումների համանախագահները ԵՄ, ՄԱԿ, ԵԱՀԿ և ԱՄՆ ներկայացուցիչներն են, բանակցություններին մասնակցում են Վրաստանի և Ռուսաստանի պատվիրակություններն, ինչպես նաև Սուխումի և Ցխինվալի ներկայացուցիչները: Վրաստանի կառավարությունը ժնևյան քննարկումները դիտարկում է որպես միակ ձևաչափ հրադադարի մասին համաձայնագրի կատարման ապահովման համար:

Հոդվածում արտահայտած կարծիքները փոխանցում են հեղինակի տերմինաբանությունն ու հայացքները և պարտադիր չէ, որ փոխանցեն խմբագրության դիրքորոշումը