Եվրախորհրդարան. «Հրավիրել ենք նախագահ Սալոմե Զուրաբիշվիլիին՝ քննարկելու հետագա քայլերը»
Եվրախորհրդարանը Զուրաբիշվիլիին հրավեր է ուղարկել
Եվրախորհրդարանի նախագահ Ռոբերտա Մեցոլան դեկտեմբերի 16-ին Եվրախորհրդարանի լիագումար նիստի բացման ժամանակ համերաշխություն է հայտնել Վրաստանի ժողովրդին եվրոպական ապագայի համար պայքարում, կտրականապես դատապարտել է ընդդիմության դեմ բռնաճնշումներն ու խաղաղ ցուցարարների դեմ ուժի կիրառումը։
Եվրախորհրդարանը ԵՄ անդամ 27 երկրներին կոչ է արել միավորվել և համաձայնության գալ բողոքի ակցիաների մասնակիցների դեմ բռնություն գործադրած անձանց նկատմամբ պատժամիջոցների հարցում։ Մեցոլան հայտնել է, որ Վրաստանի նախագահ Սալոմե Զուրաբիշվիլին հրավիրվել է Եվրախորհրդարան՝ հետագա քայլերը համատեղ քննարկելու համար։
«Եվրախորհրդարանը համերաշխություն է հայտնում Վրաստանի ժողովրդին, որն արդեն երկու շաբաթ է, ինչ խաղաղ բողոքի ակցիաներ և երթեր է անցկացնում Թբիլիսիի փողոցներում և ամբողջ երկրով մեկ՝ կոչ անելով երկիրը վերադարձնել դեպի եվրոպական ապագա և ջրցան մեքենաների ջրի շիթերի տակ ծածանելով Եվրամիության դրոշները։
Վրաստանի ժողովուրդ, մենք տեսնում ենք ձեզ, լսում և աջակցում ենք։ Եվրախորհրդարանը կտրականապես դատապարտում է վրացական ընդդիմության դեմ բռնաճնշումները և խաղաղ ցուցարարների դեմ ուժի կիրառումը. այդ գործողություններն անհամատեղելի են Վրաստանի եվրոպական ուղու հետ։
Կոչ ենք անում ձեռնարկել վճռական գործողություններ, այդ թվում՝ մեղավորների նկատմամբ պատժամիջոցներ սահմանել։ Եվրամիության անդամ 27 պետություններին հորդորում ենք հավաքվել և համաձայնեցնել այդ միջոցները։
Մենք Եվրախորհրդարան ենք հրավիրել նախագահ Սալոմե Զուրաբիշվիլիին։ Նրա հետ միասին մենք կքննարկենք, թե որ ձևաչափն է հարմար մեր նպատակին հասնելու համար։ Դեպի եվրոպական ապագա տանող ճանապարհին մենք կանգնած ենք Վրաստանի կողքին, և մեր դուռը միշտ բաց կլինի»,- հայտարարել է Եվրախորհրդարանի նախագահը։
Եվրամիության անդամ երկրների արտգործնախարարների խորհուրդը նույն օրը՝ դեկտեմբերի 16-ին, համաձայնել է կասեցնել առանց վիզայի ռեժիմը Վրաստանի՝ դիվանագիտական անձնագիր ունեցող քաղաքացիների համար։ Այդ մասին հանդիպումից հետո հայտարարել է Եվրամիության արտաքին քաղաքականության և անվտանգության հարցերով բարձր ներկայացուցիչ Կայա Կալասը։
Նա հայտնել է, որ խորհրդի նիստում քննարկվել է նաև վրացի բարձրաստիճան պաշտոնյաների դեմ պատժամիջոցների հարցը։
Ավելի վաղ «Ազատություն» ռադիոկայանի վրացական խմբագրությունը հաղորդել էր, որ Եվրամիության խորհուրդը Եվրահանձնաժողովին հանձնարարել է պատրաստել պաշտոնական առաջարկ՝ վրացական դիվանագիտական անձնագրերի համար առանց վիզայի ռեժիմի չեղարկման վերաբերյալ։
Լրատվամիջոցի աղբյուրների փոխանցմամբ՝ այդ առաջարկին աջակցել է Եվրամիության խորհրդի որակյալ մեծամասնությունը։ Եվրահանձնաժողովն արդեն սկսել է այդ հարցի շուրջ աշխատանքներն ու առաջիկա օրերին կպատրաստի համապատասխան փաստաթուղթը։
