«Դուրս բերել ռուսական զորքերը ՀՀ-ից, Վրաստանից»․ Ուկրաինայի վերաբերյալ ԵՄ փաստաթուղթը
ԵՄ-ն ՌԴ-Ուկրաինա բանակցությունների մասին
Եվրամիությունը պատրաստել է ներքին փաստաթուղթ, որում ուրվագծվում են Մոսկվայի հնարավոր զիջումները ռուս-ուկրաինական պատերազմը դադարեցնելու ուղղությամբ ընթացող բանակցություններում։ Կա նաև հստակ կոչ՝ դուրս բերել ռուսական զինված ուժերը ոչ միայն Ուկրաինայից, այլև հարևան երկրներից, այդ թվում՝ Վրաստանից և Հայաստանից։
«Ազատություն» ռադիոկայանի Եվրոպական բյուրոյի խմբագիր Ռիկարդ Յոզվիակի խոսքով՝ փաստաթուղթն արդեն ուղարկվել է ԵՄ անդամ պետություններին, և դրա առանձին մասերը կարող են արտգործնախարարների կողմից քննարկվել Բրյուսելում փետրվարի 23-ին։
«Եվրոպայի հիմնարար շահերը մայրցամաքում համապարփակ, արդար և կայուն խաղաղություն և անվտանգություն ապահովելու գործում» վերնագրով փաստաթուղթը ներկայացնում է Բրյուսելի տեսլականն այն նվազագույն պայմանների վերաբերյալ, առանց որոնց ԵՄ-ն չի կարող կայուն համարել Ուկրաինայում պատերազմի ավարտը։
Տեքստում կոչ է արվում արգելել Ռուսաստանի ռազմական ներկայությունը Բելառուսում, Ուկրաինայում, Մոլդովայում, Վրաստանում և Հայաստանում։
Այս տեղեկատվությունը հատկապես կարևոր է Վրաստանի համար, որտեղ ռուսական օկուպացիոն ուժերը շարունակում են տեղակայված լինել Աբխազիայում և Ցխինվալիի շրջանում (այսպես կոչված՝ Հարավային Օսիա): Ռուսաստանի ռազմական ներկայությունը շարունակվում է նաև Մերձդնեստրում (Մոլդովա), Հայաստանում և Բելառուսում՝ տարածաշրջաններում, որոնք համարվում են Կրեմլի անվտանգային ճարտարապետության կարևոր տարրեր:
Յոզվիակի խոսքով՝ փաստաթղթում շեշտում է սկզբունք, որի համաձայն՝ եթե Ուկրաինային առաջարկվի կրճատել իր զինված ուժերը կամ դուրս բերել զորքերը որոշակի տարածքներից, ինչպես քննարկվում է ԱՄՆ-ի միջնորդությամբ ընթացող ներկայիս բանակցություններում, Ռուսաստանը նույնպես պետք է ձեռնարկի նմանատիպ քայլեր։ Այս ձևակերպումը ցույց է տալիս, որ ԵՄ-ն փորձում է բանակցություններում համաչափության սկզբունք սահմանել։
Տեքստը նաև վերահաստատում է ԵՄ-ի վաղեմի քաղաքականությունը Ռուսաստանի կողմից Ուկրաինայի օկուպացված տարածքների ճանաչման վերաբերյալ։ Նրանք հայտարարում են, որ դա անընդունելի է: Յոզվիակի խոսքով՝ այս մոտեցումը համապատասխանում է այն քաղաքականությանը, որը Բրյուսելը վարում է Վրաստանի օկուպացված շրջանների վերաբերյալ տարիներ շարունակ:
Փաստաթուղթը դուրս է գալիս ռազմական հարցերի շրջանակից և Մոսկվային կոչ է անում դադարեցնել ապատեղեկատվական արշավները, սաբոտաժները, կիբեռհարձակումները, օդային տարածքի խախտումները և միջամտությունը Եվրոպայում և հարևան երկրներում կայանալիք ընտրություններին: Հատկանշական է, որ այս բոլոր կետերն ուղղակիորեն վերաբերում են Վրաստանին:
Հասանելի տեղեկությունների համաձայն՝ ԵՄ արտաքին հարաբերությունների և անվտանգության հարցերով բարձր ներկայացուցիչ Կայա Կալլասն արդեն իսկ փաստաթուղթն ուղարկել է անդամ պետություններին։ Չնայած ԵՄ-ն անմիջականորեն ներգրավված չէ Վաշինգտոնի միջնորդությամբ ընթացող ներկայիս բանակցություններում, տեքստում հստակ նշվում է, որ «խաղաղությունն ու անվտանգությունը անհնար են առանց ԵՄ մասնակցության և բանակցային սեղանի շուրջ նրա հիմնական շահերի [հարգման]»։
Արտահոսած փաստաթուղթը ցույց է տալիս, որ Բրյուսելը ձգտում է ինստիտուցիոնալացնել իր դերը մի գործընթացում, որը վերաբերում է ոչ միայն Ուկրաինայի, այլև ողջ մայրցամաքի անվտանգային ճարտարապետությանը: Վրաստանի համար սա նշանակում է, որ ռուս-ուկրաինական պատերազմի դադարեցման շուրջ ընթացող բանակցությունները կարող են անմիջականորեն ազդել օկուպացված տարածքների կարգավիճակի և երկրի անվտանգության ապագայի վրա:
Հետևեք մեզ — Facebook | Youtube
ԵՄ-ն ՌԴ-Ուկրաինա բանակցությունների մասին
