Դատապարտված ադրբեջանցի բլոգերին թույլ են տվել մասնակցել մոր թաղմանը

Երկու տարվա ազատազրկման դատապարտված ադրբեջանցի տեսաբլոգեր Մեհման Հուսեյնովին ժամանակավորապես ազատ են արձակել բանտից, որպեսզի նա կարողանա մասնակցել մոր թաղմանը: Այդ իրադարձությունը մեծ ուշադրության է արժանացել, քանի որ դրանից մի քանի օր առաջ արդարադատության նախարարությունը մերժել էր ծանր հիվանդ մորը հիվանդանոցում այցելելու Մեհմանի խնդրանքը:

Մեհման Հուսեյնովը դատապարտվել է 2017թ-ին այն բանից հետո, երբ Բաքվի Նասիմինի շրջանի ոստիկանության վարչության պետ Մուսա Մուսաևը նրան մեղադրել էր զրպարտության համար: Զրպարտության տակ ենթադրվում էր բլոգերի հայտարարությունն այն մասին, որ իր նախորդ ձերբակալության ժամանակ այդ վարչության աշխատակիցներն իրեն խոշտանգել էին: Արդյունքում Մեհմանին դատապարտել էին 2 տարվա ազատազրկման:

Մի քանի շաբաթ առաջ լրատվամիջոցներում և սոցցանցերում տեղեկատվություն տարածվեց այն մասին, որ Մեհմանի մայրը մահամերձ է, սակայն արդարադատության նախարարությունը ձգձգում է մորը հրաժեշտ տալու խնդրանքի պատասխանը: Ըստ Հուսեյնովի փաստաբանի՝ օրենքը նման դեպքերում դատապարտյալին թույլ է տալիս կարճ ժամկետով լքել բանտը, թեև վերջնական որոշումը կախված է պատկան մարմիններից: Արդյունքում բլոգերը մերժում ստացավ, իսկ մի քանի օր անց նրա մայրը մահացավ: Թաղմանը տղային, այնուամենայնիվ, թողեցին մասնակցել:

Թաղումից առաջ տված հարցազրույցում Մեհման Հուսեյնովն ասել է, որ իր ծնողները «բացարձակ միայնակ էին մնացել այն բանից հետո, երբ իրենց բոլոր որդիներն իրենցից ստիպված հեռացել էին»: Բլոգերի ավագ եղբայր Էմին Հուսեյնովը լրագրողների անվտանգության և ազատության ինստիտուտի հիմնադիրն էր, նա ճնշումների էր ենթարկվում իշխանությունների կողմից և արտագաղթել է Շվեյցարիա: