Գաղտնի լաբորատորիա․ նոր տիպի ճնշում Ադրբեջանի վրա՞։ Մեկնաբանություն Բաքվից

Ռուսական պետական «Ռոսիա-24» հեռուստաալիքը վավերագրական ֆիլմ է ցուցադրել, որում հեղինակները պնդում են, թե Ադրբեջանում ՆԱՏՕ-ի գաղտնի լաբորատորիա է գործում։ Մինչ օրս ոչ ոք երբեք նման բան չէր հայտարարել։ Ըստ ադրբեջանցի քաղաքագետի՝ այս պնդումը պետք է դիտարկել որպես Բաքվի նկատմամբ Մոսկվայի ճնշման նոր տեսակ։

• Թբիլիսի-Մոսկվա, բանակցություններ․ Աբխազիայի բռնակցում, Լուգարայի լաբորատորիա, ավիահաղորդակցություն
• Մակրոնը զանգահարել է Պուտինին․ Նավալնուն փորձել են սպանել «Նովիչոկով»
• Ադրբեջանում սկսվել է կորոնավիրուսի համավարակի հինգերորդ ալիքը

Հունվարի 22-ին ռուսական «Ռոսիա-24» լրատվական հեռուստաալիքով ցուցադրվել է հայտնի ռուս հեռուստալրագրող Արկադի Մամոնտովի ֆիլմ-հետազոտությունը՝ «Անդրոմեդա շտամը»։ Ֆիլմում հեղինակը պնդում է, թե իբր Ռուսաստանի պարագծով վերջին տարիներին սկսել են գործել կենսաբանական լաբորատորիաներ, որոնք ԱՄՆ-ն բացում է հետխորհրդային տարածքի երկրներում։ Հեղինակը պնդում է, որ Պենտագոնը միլիոնավոր դոլարներ է ներդնում այլ երկրների տարածքում վտանգավոր բակտերիաների և վարակների ուսումնասիրման տեխնոլոգիաների, ենթակառուցվածքների, ուսումնասիրությունների մեջ։

«Ի՞նչ գաղտնի ուսումնասիրություններ են կատարվում այդ լաբորատորիաներում։ Ի՞նչ սպառնալիք են նրանք ներկայացնում այն երկրների բնակիչների համար, որտեղ տեղկայված են։ Եվ ինչո՞ւ են միկրոկենսաբաններն այդ օբյեկտները հաճախ համեմատում ՆԱՏՕ-ի ռազմաբազաների հետ, որը մոտենում է Ռուսաստանի սահմաններին։ Այս հարցի պատախանները կհնչեն Արկադի Մամոնտովի վավերագրական հետազոտությունում», — ասված է ֆիլմի նախաբանում։

«Այսօր այդպիսի կենսաբանական լաբորատորիաներ են գործում Ուկրաինայում, Վրաստանում, Ադրբեջանում, Մոլդովայում, Ուզբեկստանում, Ղազախստանում, Հայաստանում։ Դա յուրօրինակ բիովտանգի գոտի է մեր ռուսական սահմանների շուրջ», — ֆիլմում ասում է դրա հեղինակ Մամոնտովը։

Հետազոտության հեղինակներն այցելել են Հայաստան, Ղազախստան, Վրաստան և Ուկրաինա, զրուցել տեղի փորձագետների հետ, կադրեր ցուցադրել այդ կենսաբանական լաբորատորիաներից։

Ադրբեջանն առաջին անգամ է ներառվել այն երկրների ցանկում, որտեղ այդպիսի «ամերիկյան լաբորատորիաներ» կան։

Մեկնաբանություն

«Արկադի Մամոնտովը լրագրողների այն տիպին է պատկանում, որոնք կատարում են Կրեմլի պատվերները։ Հենց Կրեմլը թիրախավորում է որևէ երկիր կամ իրադարձություն, Ռուսաստանի պետական հեռուստաալիքներով ցուցադրվում է հերթական «լրագրողական հետազոտությունը»։

Այս անգամ Մամոնտովը թիրախավորել էր Ադրբեջանը, իսկ դա նշանակում է, որ պատվերը վերևից է։ Արկադի Մամոնտովի ֆիլմում, որը ցուցադրվել է հունվարի 22-ին «Ռոսիա-24» հեռուստաալիքով, խոսվում է ԱՄՆ կենսաբանական լաբորատորիաների մասին, որոնք տեղակայված են հետխորհրդային հանրապետություններում։ Հեղինակը պնդում է, որ Ադրբեջանում նույնպես այդպիսի լաբորատորիաներ կան։

Այո, այդ լաբորատորիաների մասին բազում ասեկոսեներ կան։ Օրինակ՝ պնդումներ կան, թե դրանք գործում են Վրաստանում և Ուկրաինայում։ Սակայն կան լուրեր նաև Ռուսաստանի բարեկամ երկրներում՝ Ղազախստանում, Ուզբեկստանում և անգամ Հայաստանում նման լաբորատորիաների տեղակայման մասին։ Հայաստանը բացել է այդ լաբորատորիայի դռները ռուս մասնագետների համար։

Թեև Վաշինգտոնն ու նրա գործընկերներն ընդգծում են, որ այդ լաբորատորիաները զբաղվում են գիտական հետազոտություններով, Կրեմլը պնդում է, որ դրանք լուրջ վտանգ են ներկայացնում այն երկրի համար, որտեղ տեղակայված են։ Եթե լուրջ խոսենք, Ռուսաստանն իր համար վտանգավոր է համարում այն ամենն, ինչ ԱՄՆ հետ համատեղ սկզբնաղբյուր ունի և տեղակայված է ԽՍՀՄ նախկին հանրապետությունների տարածքում։ Այդ առնչությամբ նա «նախազգուշացնող ուղերձներ» է հղում։

Այժմ այդ ցանկին ավելացել է Ադրբեջանը։ Ադրբեջանում կենսաբանական լաբորատորիայի առկայության ոչ մի փաստ չկա, նման բան թաքցնելն անհնար է։

Սակայն ինչո՞ւ է ուրեմն Կրեմլի կամակատարն այդպիսի կեղծ լուր տարածում։ Հավանաբար, դա Մոսկվայի կողմից Բաքվի վրա ճնշում գործադրելու նոր ձև է», — Արկադի Մամոնտովի պնդումներն է մեկնաբանել ադրբեջանական «Ատլաս» վերլուծական կենտրոնի ղեկավար Էլխան Շահինօղլուն։