Բաքվում մեկնարկել է Ֆորմուլա 1-ի «Գրան պրի Ադրբեջան» փուլը
Այսօր Բաքվում մեկնարկել է «Ֆորմուլա 1» աշխարհի ամենահեղինակավոր ավտոմոբիլային մրցաշարը: Դրան մասնակցում է 20 ավտոարշավորդ, որոնք 10 թիմ են ներկայացնում: Նրանք 6 կիլոմետրանոց 51 շրջան կկատարեն Բաքվի կենտրոնական փողոցներով և հրապարակներով:
Բաքուն այս մրցաշարն ընդունում է արդեն երրորդ անգամ: Ինչպես և նախորդ տարիներին, չկան բաց տվյալներ մրցաշարի բյուջեի մասին: Սակայն, ըստ կազմակերպիչների, այս տարի ծախսերն ավելի քիչ կլինեն, իսկ եկամուտն՝ ավելի շատ: Բանն այն է, որ 2018թ-ին Բաքվի փուլի անցկացման ժամկետը հունիսից ապրիլ էր տեղափոխվել: Փիթսթոփերն ու որոշ տրիբունաներ այդպես էլ չէին ապամոնտաժվել, կազմակերպիչները որոշեցին նախորդ տարվա պատվարները կրկին օգտագործել:
Եզրափակիչ ավտոարշավը կկայանա ապրիլի 29-ին: Եզրափակչի տոմսերի գինը 40-600 դոլար է՝ կախված տրիբունայի դիրքից:
Ինչպես և նախորդ տարիներին, մրցաշարը կուղեկցվի համերգներով. այս տարի Բաքու են ժամանել Քրիսթինա Ագիլերան, «Jamiroquai» խումբը, Մարթին Սոլվեյգն ու այլք:
Մրցաշարի մեկնարկից մեկ շաբաթ առաջ Բաքվի կենտրոնական փողոցները փակ էին: Մրցաշարի մայրուղու հարևանությամբ տեղակայված դպրոցներում արտահերթ մեկշաբաթյա արձակուրդ է հայտարարվել: Բաքվի շատ բնակիչներ սոցցանցերում դեմ են արտահայտվում նման սահմանափակման միջոցներին, սակայն կան նաև մարդիկ, որոնք ըմբռնումով են մոտենում: Մի քանի տիպիկ մեկնաբանություն.
«…Քաղաքը կարծես օկուպացված Վարշավան լինի հրեական գետոյով:
Ամենուրեք պատվարներ են, քիչ է մնում նաև՝ փշալարեր, նոր բուլվարում հաուբիցներ են:
Աշխատավայրից տուն հասնելը գրեթե 2 ժամ է տևում»:
«Հետաքրքիր է՝ կա՞ մարդ, որ հաճույք է ստանում այս ֆորմուլայից այս երկրում:
Քաղաքը բանտ է հիշեցնում»:
«Ինձ չի լարում, մետրոյով կտեղաշարժվեմ, ի՞նչ կա այդտեղ»:
«Աստված դիմացել է, մեզ էլ է պատվիրել»:
«Չի կարելի, չէ՞, ամեն ինչ դիտարկել այն տեսանկյունից, թե «ինձ ի՞նչ օգուտ»»:
«Կյանքին դրական նայեք: Ֆորմուլա 1-ը մեծ իրադարձություն է մեր փոքր երկրում: Ես համաձայն եմ նեղություն քաշել»:
