Զոհեր խաղաղ բնակչության շրջանում․ Արցախ, մարտեր, իրավիճակը 2020 թ-ի նոյեմբերի 4-ի երեկոյան ժամերին

Տեղեկություններ Երևանից

• Նոյեմբերի 4-ի երեկոյան կրկին հրետակոծվել են Ստեփանակերտի բնակելի թաղամասերը 120 մմ տրամաչափի ականանետով, խաղաղ բնակիչ է վիրավորվել, բազում ավերածություններ կան։

• Շուշի-Բերձոր ճանապարհի որոշ հատվածներ ժամանակավորապես փակ են քաղաքացիական բնակչության համար՝ ադրբեջանական դիվերսիոն խմբի ներթափանցման փորձի հետևանքները վերացնելու կապակցությամբ։

• «Ադրբեջանում գերության մեջ մահացած հադրութցի 84-ամյա Միշա Մելքումյանը առողջության հետ կապված լուրջ խնդիրներ չի ունեցել, սա նշանակում է, որ նա այնտեղ ենթարկվել է կտտանքների և նվաստացուցիչ վերաբերմունքի»․ Արցախի օմբուդսմեն։

Հոկտեմբերի 31-ի հաղորդագրությունների համաձայն՝ ամսի 29-ին Մելքումյանին պետք է փոխանցեին հայկական կողմին, սակայն չեն կարողացել նրան բերել՝ առողջական վիճակի պատճառով։ Հաջորդ օրը նրա մահվան մասին լուր է ստացվել։

• Օմբուդսմենը կարծում է, որ Ադրբեջանի իշխանությունները խրախուսում են ռազմական հանցագործությունները, հայերի սպանություններն ու զոհվածների մարմինների նկատմամբ դաժան վերաբերմունքը։ Նա պատմել է Տող գյուղի բնակչի վկայությունը։ Այդ մարդու պատմածի համաձայն՝ ադրբեջանցի զինծառայողները գլխատել են իր հարևաններից մեկին և սպանել մյուսին։

• Հայերի նկատմամբ Ադրբեջանի իրականացրած էթնիկ զտումների մասին ապացույցները փոխանցվում են ՄԱԿ և Մարդու իրավունքների եվրոպական դատարան, հայտարարել է Հայաստանի օմբուդսմենը։

Մարդու իրավունքների պաշտպանը հայտարարել է նաև, որ «ադրբեջանցի զինվորականները հրետակոծել են Շուշիի տաճարն ու մզկիթը, Ստեփանակերտի հիվանդանոցն ու ծննդատունը, բնակելի տները, կասետային ռումբեր և քիմիական զենք են կիրառում»։

Տեղեկություններ Բաքվից

• Առավոտից ինտենսիվ հրետակոծության են ենթարկվում Ադրբեջանի Աղդամի շրջանի գյուղերն, ինչպես նաև Տերտեր քաղաքն ու այդ շրջանի Շիղարխ ավանը։

• Ադրբեջանում մարտական գործողությունների մեկնարկից ի վեր զոհվել է 91 խաղաղ բնակիչ, ևս 405 մարդ է վիրավորվել։ Ադրբեջանի տարածքում ավերվել է 2 734 տուն։

• Ադրբեջանը հերքել է հայկական կողմի հայտարարություններն այն մասին, որ ադրբեջանցի զինծառայողները ռազմական հանցագործություններ են կատարել Մարտունու շրջանի Տող գյուղում։

• Ադրբեջանի նախագահը հաղորդել է, որ ևս յոթ բնակավայր է անցել ադրբեջանական բանակի վերահսկողության տակ Ջաբրայիլի, Զանգելանի և Գուբաթլիի շրջաններում (Արցախի հարակից տարածքներ, որոնք հայկական ուժերի վերահսկողության տակ են եղել 1990-ականների ղարաբաղյան պատերազմից հետո)։