Ավելի քան 100 ադրբեջանցի լրագրողներ և ակտիվիստներ խնդրել են կալանավորել իրենց

Լրագրողներն ու քաղաքացիական ակտիվիստներն այսօր եկել էին Ադրբեջանի ներքին գործերի նախարարության շենքի մոտ նախարար Ռամիլ Ուսուբովին հասցեագրված անսովոր կոլեկտիվ նամակով: Նամակում նախարարին կոչ էր արվում կալանավորել դրա տակ ստորագրած բոլորին, ինչպես «Հանրապետական այլընտրանք» («ՌԵԱԼ») ընդդիմադիր կուսակցության 4 անդամներին:

4 «ՌԵԱԼ»-ցիներ 30 օրով կալանավորվել են հասարակական կարգը խախտելու, խուլիգանության և ոստիկանությանը դիմադրելու համար: Դա տեղի էր ունեցել Հանրապետության օրվան (մայիսի 28) նվիրված տոնական երթի հաջորդ օրը: Կալանավորվածների կուսակիցներն ու որոշ լրագրողներ այդ երկու հանգամանքները միմյանց էին կապել և եկել այն եզրակացության, որ հենց երթին մասնակցությունն է դարձել կալանքի պատճառ:

Նրանք նամակ-դիմում են գրել նախարարին, որի տակ ցույցին մասնակցած 100 մարդ է ստորագրել: Նրանց թվում են այնպիսի հայտնի անձինք, ինչպես հետաքննող լրագրող Խադիջա Իսմայիլն ու Ադրբեջանի լրագրողների միության ղեկավար Էլչին Շիհլին:

«Դա քաղաքացիական հասարակության անդամների նախաձեռնություն էր, այլ ոչ թե կուսակցական: Գաղափարը ծնվեց տոնի կազմակերմանը մասնակցած մարդկանց հետ քննարկումներից», — ասում է հետաքննող լրագրող Խադիջա Իսմայիլը:

Նամակն անձամբ նախարարին կամ նախարարության մամուլի ծառայությանը փոխանցել չհաջողվեց: Ակտիվիստներն այն գցեցին Ռամիլ Յուսուբովին հասցեագրված նամակների արկղի մեջ: Ակցիայի երկու մասնակից, որոնք կատարվածը տեսանկարահանում էին, կալանավորվեցին: Նրանց գրեթե մեկ ժամից ազատ արձակեցին: Ոստիկանությունը փաստարկել է ձերբակալությունը ՆԳՆ շենքի մոտ տեսանկարահանում անելու արգելքով: