Աշխատանք պատերազմի մասնակիցների համար․ Հայաստանի կառավարության օգնությունը
Աշխատանք պատերազմի մասնակիցների համար
Հայաստանում կիրականացվի զբաղվածության նոր ծրագիր Ապրիլյան և 44-օրյա պատերազմների մասնակից գործազուրկ քաղաքացիների համար: Աշխատանքի և սոցիալական հարցերի նախարարության ուսումնասիրությունները ցույց են տվել, որ նրանք աշխատանք գտնելու հետ կապված խնդիրների են բախվում, ունեն նոր հմտությունների ձեռքբերման կարիք:
Ծրագրի շրջանակներում նրանք հնարավորություն կունենան անցնել մասնագիտական ուսուցում, փորձաշրջան և ընդունվել աշխատանքի՝ առնվազն մեկ տարի ժամկետով: Պետությունը ֆինանսապես կաջակցի ինչպես շահառուներին, այնպես էլ գործատուներին:
Կառավարության՝ հուլիսի 21-ի նիստի ընթացքում նախարարության ներկայացրած որոշման նախագիծն արժանացել է գործադիրի հավանությանը: Ծրագիրը դեռևս փորձնական է, կիրագործվի մինչև տարեվերջ:
Ովքե՞ր կարող են դիմել, ինչո՞վ է աջակցելու կառավարությունը. բոլոր մանրամասները
Ոլորտի պատասխանատուներն ակնկալում են, որ ծրագրի իրականացման արդյունքում՝
- Ապրիլյան և 44-օրյա պատերազմի մասնակից գործազուրկ անձինք կունենան կայուն զբաղվածություն,
- գործատուների շրջանում առկա թափուր աշխատատեղերը կհամալրվեն անհրաժեշտ մասնագիտական կարողություններ և հմտություններ ունեցող աշխատակիցներով:
Ուսուցում, փորձաշրջան ու աշխատանք. ինչո՞վ է աջակցելու պետությունը
Ծրագիրն ունի 3 բաղադրիչ՝
- մինչև 5 ամիս տևողությամբ մասնագիտական ուսուցում գործատուի մոտ կամ որևէ ուսումնական հաստատությունում,
- երեք ամիս տևողությամբ փորձաշրջան գործատուի մոտ,
- աշխատանքի ընդունում (այն դեպքում, երբ գործատուն կարծում է՝ տվյալ շահառուն ուսուցման կամ փորձաշրջանի կարիք չունի):
Եթե շահառուն օգտվում է ծրագրի առաջին բաղադրիչից, ապա՝
- ստանում է ուսման վարձի փոխհատուցում՝ յուրաքանչյուր ամսվա համար առավելագույնը 50.000 դրամի չափով,
- ստանում է կրթաթոշակ նվազագույն ամսական աշխատավարձի 50%-ի չափով (ներկա պահին կազմում է 34 հազար դրամ),
- ավարտական վկայականը ստանալուց հետո նրա հետ կնքվում է առնվազն մեկ տարի ժամկետով աշխատանքային պայմանագիր (այդ մեկ տարվա ընթացքում գործատուն ստանում է պետական աջակցություն՝ ամսական առավելագույնը 50. 000 դրամի չափով)։
Փորձաշրջանի կազմակերպման (երկրորդ բաղադրիչ) դեպքում գործատուին տրամադրվում է փոխհատուցում՝
- երեք ամիս ժամկետով՝ նվազագույն ամսական աշխատավարձի չափով (շահառուի աշխատավարձի վճարման համար),
- երեք ամիս ժամկետով՝ յուրաքանչյուր ամսվա համար առավելագույնը 25.000 դրամի չափով և ինն ամիս ժամկետով՝ յուրաքանչյուր ամսվա համար առավելագույնը 50.000 դրամի չափով (եկամտային հարկի և այլ վճարների համար):
Եթե պատերազմի մասնակիցն աշխատանքի ընդունվի (առնվազն 1 տարի ժամկետով) միանգամից՝ առանց ուսուցման կամ փորձաշրջանի (երրորդ բաղադրիչ), ապա գործատուն պետությունից կստանա մեկանգամյա աջակցություն 300.000 դրամի չափով:
Ինչպե՞ս է կազմակերպվելու գործընթացը
Թափուր աշխատատեղերի և դրանք համալրելու համար պահանջվող մասնագիտական հմտությունների մասին ինֆորմացիան գործատուները ներկայացնելու են նախարարության ենթակայությամբ գործող Միասնական սոցիալական ծառայություն:
Ծառայությունը կազմելու է գործազուրկ անձանց ցուցակ, որից էլ գործատուն ընտրելու է իր պահանջներին առավել համապատասխան թեկնածուների:
Կառավարության նիստի ընթացքում աշխատանքի և սոցիալական հարցերի նախարար Նարեկ Մկրտչյանը տեղեկացրել է, որ ծառայության, գործատուի և ծրագրի շահառուի միջև կնքվելու է եռակողմ պայմանագիր:
Ծրագիրը կիրականացվի մինչև տարեվերջ
Սոցիալական գերատեսչության նախաձեռնած ծրագիրը փորձնական է: Այն իրականացվելու է 2022 թ.-ի երրորդ և չորրորդ եռամսյակներում:
Որոշման նախագծով առաջարկվել է մինչև տարեվերջ ծրագրում ընդգրկել շուրջ 200 շահառուի:
Ելնելով զբաղվածության նոր ծրագրի գրանցած արդյունքներից՝ կառավարությունը կորոշի՝ շարունակե՞լ այն հաջորդ տարի, թե՞ ոչ:
Աշխատանք պատերազմի մասնակիցների համար
