ԱՄՆ-ն որոշել է զինել սիրիացի քրդերին՝ չնայած Թուրքիայի կատեգորիկ բողոքին

ԱՄՆ նախագահ Դոնալդ Թրամփը հաստատել է քրդական աշխարհազորի ջոկատներին զինամթերքի տրամադրման պլանը, որոնք մասնակցում են «Իսլամական պետության» դեմ գործողություններին: Խոսքը գնում է խոշոր տրամաչափի գնդացրերի, հակատանկային համակարգերի, հրետանային սարքավորումների, ինժեներական սարքավորումների և զրահափոխադրիչների մասին:

Այդ որոշումը կայացվել է Թուրքիայի հետ երկարատև վեճերից հետո, որը ՆԱՏՕ-ի անդամ է, սակայն կտրականապես դեմ է քրդական կազմավորումներն ամրապնդելուն, քանի որ տասնամյակներ շարունակ երկրի ներսում պայքար է մղում քուրդ անջատեղականների դեմ:

ԱՄՆ վարչակազմի ներկայիս որոշումը կարող է հանգեցնել նրան, որ Անկարան ի պատասխան զգալիորեն կսահմանափակի ԻՊ դեմ Վաշինգտոնի պայքարին աջակցությունը, գրում է New York Times-ը:

Սիրիայի քրդերին զինելու որոշմանը կողմ էին հանդես գալիս ամերիկացի զինվորականները, որոնք քրդական կազմավորումների մասնակցությունը առանցքային են համարում Մոսուլի գրոհն ավարտելու և Ռաքայի ազատգրման գործողության մեկնարկի համար, որոնք ԻՊ երկու հենակետային քաղաքներ են:

Նրանց գնահատականի համաձայն՝ քրդական կազմավորումներն ամենամարտունակն ու փորձառուն են միջազգային կոալիցիայի կազմում, որը դիմակայում է ԻԼԻՊ-ին:

ԻԼԻՊ-ին վերջ դնելու խոստումը Թրամփի նախընտրական արշավի կետերից մեկն էր: