Ադրբեջանում 20-ամյա աղջկան մեղադրում են Հայաստանի օգտին լրտեսելու մեջ
Ադրբեջանցին լրտեսել է ՀՀ օգտին
Ադրբեջանում երիտասարդ աղջկան դատարանի առաջ են կանգնեցրել պետական դավաճանության մեղադրանքով։ Ֆիդան Ալիևան մեղադրվում է Հայաստանի օգտին լրտեսելու և երկրի գաղտնի ծառայության աշխատակցի միջոցով Ադրբեջանի մասին տեղեկատվություն փոխանցելու մեջ։
- 7 փաստ «Հայաստանի՝ ՌԴ-ից հեռանալու մասին». ինչպե՞ս են դրանք տեսնում Մոսկվայում և Երևանում
- Ադրբեջանական բանակի սպան դիմել է Վագիֆ Խաչատրյանի ընտանիքին
20-ամյա Ալիևային մեղադրանք է առաջադրվել Քրեական օրենսգրքի 274-րդ հոդվածով (Հայրենիքի դավաճանություն)։ Այս մեղադրանքով նրան սպառնում է մինչև 20 տարվա կամ ցմահ ազատազրկում։ Ադրբեջանական օրենսդրության համաձայն՝ 65 տարեկանից բարձր կանայք և տղամարդիկ ցմահ ազատազրկման չեն դատապարտվում։
Մի քանի ամիս առաջ Ֆիդան Ալիևան ձերբակալվել էր Պետական անվտանգության ծառայության կողմից։ Այժմ նրա գործը քննվում է Բաքվի ծանր հանցագործությունների դատարանում։
«Ես կարծում էի, որ այն մարդը, ում հետ ծանոթացել եմ Telegram-ում, ռուս է»
Ըստ «Ազատություն» ռադիոկայանի՝ Ալիևան եղել է այն բողոքի ակցիայի մասնակիցների թվում, որը մեկնարկել էր 2022 թվականի դեկտեմբերի 12-ին և տևել 138 օր Շուշիի տարածքով անցնող Լաչին-Ստեփանակերտ ճանապարհահատվածում։ Կան պնդումներ, որ նա տեղեկություններ, տեսանյութեր և լուսանկարներ է ուղարկել Հայաստանի հատուկ ծառայության աշխատակցին, ում հետ ծանոթացել է Telegram ալիքի միջոցով։ Հաղորդվում է, որ որոշ նկարներ արվել են Բաքվի տարբեր հատվածներում:
Սակայն Ֆիդան Ալիևան հերքում է մեղադրանքները։ Նա պնդում է, որ Հայաստանի օգտին լրտեսության մեղադրանքները չեն համապատասխանում իրականությանը։ Քանի որ նա կարծել է, որ այն մարդը, ում հետ ծանոթացել է Telegram-ում, ռուս է։ Նրա խոսքով` ինքն այդ անձի հետ շփվել է անձնական նպատակներով, այլ ոչ թե տեղեկատվություն փոխանցելու համար։
«Սկզբում ես առհասարակ չգիտեի, որ նա հայ է։ Իմ նպատակն էր ճանաչել նրան որպես սովորական մարդու։ Ես այլ նպատակ չունեի, ինչպիսին է Ադրբեջանի մասին տեղեկատվություն տրամադրելը»։
Ինչ վերաբերում է ուղարկված լուսանկարներին և տեսանյութերին, Ալիևան պատմել է, որ այն անձը, ում հետ ինքը շփվել է, երբեմն խնդրել է որոշ վայրերում լուսանկարվել և ուղարկել իրեն, ինչն էլ արել է։
Ալիևայի գործով դատաքննությունը շարունակվում է:
Անցյալ տարվա դեկտեմբերի 12-ից մինչև 2023 թվականի ապրիլը Լաչին-Ստեփանակերտ ճանապարհին հավաքվել էին Ադրբեջանի մի խումբ քաղաքացիներ, ովքեր իրենց կոչում էին էկոակտիվիստ։ Հայկական կողմը մեղադրում էր Ադրբեջանի իշխանություններին այս գործողությունների հետևում կանգնած լինելու և Ղարաբաղի այն մասը արգելափակելու մեջ, որտեղ ժամանակավորապես տեղակայված են ռուսական խաղաղապահ ուժերը։
Ապրիլի 23-ին Ադրբեջանը անցակետ է տեղակայել Հայաստանի հետ սահմանին՝ Լաչին-Ստեփանակերտ ճանապարհի սկզբնամասում, և դա բացատրել է Հայաստանից Ադրբեջանի տարածք զենքի ապօրինի տեղափոխմամբ։ Հայաստանը չի ընդունում այս մեղադրանքը և կարծում է, որ սահմանային կետի տեղակայումը հակասում է եռակողմ հայտարարությանը։
