Ադրբեջանում ևս մեկ լրագրող է կալանավորվել

Ազիզ Օրուջևը՝ «13-րդ ալիք» հեռուստատեսության խմբագիրը, կալանավորվել է մայիսի 2-ին և դատապարտվել 30 օրվա ազատազրկման ոստիկանությանը չենթարկվելու մեղադրանքով:

Այդ մասին հաղորդում է «13-րդ ալիքի» պաշտոնական կայքը, որը ներկա պահին արգելափակված է Ադրբեջանի տարածքում:

Ազիզ Օրուջևը քաղաքացիական անձանց կողմից ձերբակալվել է մայիսի 2-ի առավոտյան իր կնոջ՝ Լամիա Օրուջևայի հետ միասին, որն աշխատում է այդ նույն հեռուստատեսությունում: Նրանց տարել են Բաքվի Նասիմանի ոստիկանական վարչություն:

Ավելի ուշ ոստիկանությունում հայտարարել են, որ Ազիզ Օրուջևը նման է հետախուզման մեջ գտնվող մի անձի:

«Մեզ ցույց տվին հետախուզման մեջ գտնվող մեկի լուսանկարը: Նա բացարձակապես նման չէ Ազիզ Օրուջևին: Դա ընդամենը առիթ էր Ազիզ Օրուջևին ձերբակալելու և նրան ոստիկանությանը չենթարկվելու մեղադրանք առաջադրելու համար», — ասել է լրագրողի փաստաբան Էլչին Սադիքովը «Թուրան» գործակալությանը:

Ազիզ Օրուջևն իրեն մեղավոր չի ճանաչել: «Դատարանի որոշումը բողոքարկվելու է: — Սադիքովն ուշադրություն է հրավիրել այն հանգամանքին, որ լրագրողին կալանավորել են մայիսի 3-ին նշվող Մամուլի ազատության համաշխարհային օրվա նախօրեին: — Եվ այդ կալանքը հենց ուղղված է մամուլի ազատության դեմ»:

Որոշ ժամանակ անց Լամիա Օրուջևան ազատ է արձակվել:

• «13-րդ ալիք» առցանց հեռուստատեսությունը ստեղծվել է 2008թ-ին: Այն հարթակ է տրամադրում ոչ կառավարական կազմակերպություններին, իրավապաշտպաններին, երիտասարդ ակտիվիստներին, քաղաքական գործիչներին և բոլոր այն անձանց, ում համար եթերային տարածությունն անհասանելի է:

• «13-րդ ալիքի» հիմնադիր Անար Օրուջևը (Ազիզ Օրուջրի եղբայրը) կրթական ծրագրի մասնակցության կապակցությամբ գտնվում է Գերմանիայում:

• «Լրագրողներ առանց սահմանների» միջազգային իրավապաշտպան կազմակերպության կազմած խոսքի ազատության ցուցիչով Ադրբեջանը 180 երկրների շրջանում 162-րդ տեղն է զբաղեցնում: