«Թույլտվություն ստանալ» հոգեհանգստի արարողության համար. Ադրբեջանում կորոնավիրուսի ֆոնին իրավախախտման նոր տեսակ է ի հայտ եկել

Ապրիլի 5-ին Ադրբեջանում  քաղաքացիների տեղաշարժի սահմանափակում մտցնելուց հետո ի հայտ եկավ իրավախախտման նոր տեսակ. մարդիկ հնարում են կարանտինը շրջանցելու ամեն տեսակ մեթոդներ:

Այս մեթոդներից ամենատարածվածը հորինված հուղարկավորություններն են և կեղծված SMS-թույլտվությունը:

Ամեն օր այդ պատճառով ձերբակալվում են տասնյակ մարդիկ:

Պաշտոնական տվյալներով՝ ապրիլի 14-ի դրությամբ Ադրբեջանում արձանագրվել է COVID-19 կորոնավիրուսով վարակվելու 1148 դեպք: 12 մարդ մահացել է, 289-ը՝ ապաքինվել:

Խանութ և հետդարձ

Նոր կանոնների համաձայն՝ տանից դուրս գալու համար Ադրբեջանի բնակիչների մեծամասնությունը պետք է նախապես SMS ուղարկի «8103» համարին, նշի իր նույնականացման քարտի համարը և ընտրի դուրս գալու նպատակը: Առկա է ընդամենը երեք նպատակ՝ բժշկի այցելություն, այց խանութ/դեղատուն/բանկ/փոստային բաժանմունք կամ մերձավոր ազգականի հուղարկավորություն: Ի պատասխան՝ կուղարկվի SMS-թույլտվություն, որը հարկավոր է ցույց տալ ոստիկանին, եթե կանգնեցնեն փողոցում:

Խախտման համար կարող են տուգանել կամ նույնիսկ կալանավորել:

Թույլտվություն հնարավոր է ստանալ միայն օրը մեկ անգամ: Ավելին, երկու ժամ է տրվում բժշկի և խանութ այցելելու համար, իսկ հուղարկավորության դեպքում ժամկետ սահմանված չէ:

Իշխանությունները վստահեցնում են, որ այդ միջոցառումները լիովին արդարացված են կորոնավիրուսի դեմ պայքարով, և որ այլևս ոչ մի կերպ հնարավոր չէ մարդկանց պարտադրել տանը մնալ:

Բայց երկրի շատ բնակիչներ գտնում են, որ իրենց դրել են չափազանց խիստ շրջանակների մեջ:

• Ի՞նչ տեսք ունի Բաքուն կարանտինի օրերին
• Հայաստան, կորոնավիրուս. լրագրող և բազմազավակ մոր օրագիրը՝ մեկուսացման օրերի մասին
• Ամեն ինչ կորոնավիրուսի մասին

Կասկածելի շատ հուղարկավորություններ

Նոր սահմանափակման ուժի մեջ մտնելուց հետո մոտ 3 հազար մարդ արդեն «թույլտվություն է խնդրել» մոտ հարազատների հուղարկավորության համար: Համապատասխան պետական կառույցներում կեղծիք են կասկածել:

Ստուգումները ցույց են տվել, որ հաճախ կամ ոչ մի հուղարկավորություն ընդհանրապես չկա, կամ դա մոտ հարազատի հուղարկավորություն չէ:

Միայն անցած օրվա ընթացքում այս ստի համար 50 մարդ է ձերբակալվել: Նրանց յուրաքանչյուրին տուգանել են 100 մանաթ (շուրջ 59 դոլար):

Պարծենկոտ կեղծարարը

Արգելքները շրջանցելու երկրորդ տարածված մեթոդը SMS-թույլտվությունը կեղծելն է: Սովորաբար դրան են դիմում, երբ օրական երկժամյա սահմանաչափն արդեն սպառվել է, իսկ դուրս գալ, միևնույն է, ուզում են:

Այդպիսի կեղծարարներից մի երիտասարդ՝ Նայիլ Յագուբով անունով, ոչ միայն հմտացել է հատուկ համակարգչային ծրագրի օգնությամբ թույլտվություն կեղծելու, այլ նաև պարծեցել է դրանով սոցցանցերում և WhatsApp-ի խմբերում: Երիտասարդին նստեցրել են 25 օր, իսկ սոցցանցերի օգտատերերը վրդովվել են, թե ինչպես կարող էր նա այդպես միամտաբար բռնվել:

Այս պահին Ադրբեջանում հայտարարված է խիստ կարանտինային ռեժիմ. փակ են մետրոն, այգիները, զբոսայգիները, համարյա բոլոր առևտրի կետերը, ձեռնարկությունները և կազմակերպությունները:

65-ից բարձր տարիքի մարդկանց ընդհանրապես արգելված է տանից դուրս գալ:

Միևնույն ժամանակ երկրում մինչև հիմա պաշտոնապես արտակարգ դրություն հայտարարված չէ: