Ադրբեջանում դատապարտել են ընդդիմադիր մամուլի հերթական ներկայացուցչին

Հուլիսի 24-ին Բաքվի Սաբայիլի շրջանային դատարանն «Ազադլիգ» ընդդիմադիր թերթի ֆինանսական տնօրեն Ֆայիգ Ամիրլիին դատապարտել է 3 տարվա և 3 ամսվա ազատազրկման:

Բացի այդ, Ամիրլին պարտավոր է տուգանք վճարել 39 հազար մանաթի չափով (մոտ 23 հազար ԱՄՆ դոլար):

Դատարանի նախորդ նիստին պետական մեղադրողը խնդրել է Ամիրլիին դատապարտել 4,5 տարվա ազատազրկման:

Ամիրլին ձերբակալվել է 2016թ-ի օգոստոսի 20-ին միջկրոնական և միջէթնիկական թշնամանք սերմանելու մեղադրանքով: Ոստիկանության հաղորդագրությունում ասվում էր, որ Ամիրլին կապված է թուրք քաղաքական գործիչ Ֆեթուլլահ Գյուլենի շարժման հետ, որին Թուրքիայում մեղադրում են պետական հեղաշրջման կազմակերպման փորձի համար: Որպես ապացույց ներկայացվել է Գյուլենի՝ նրա բնակարանի խուզարկության ժամանակ հայտնաբերված գիրքը: Ինքն Ամիրլին հերքում է իր մասնակցությունը Գյուլենի շարժմանը:

Այս տարվա ապրիլի 17-ին նրա դեմ հարկերից խուսափելու և պաշտոնեական դիրքի չարաշահման նոր մեղադրանք է առաջադրվել, իսկ նախորդ երկու հոդվածները հանվել են:

Ամիրլիի փաստաբան Ագիլ Լայիջևը կտրականապես հերքել է առաջադրված մեղադրանքները:

«Ֆայիգ Ամիրլիին առաջադրված մեղադրանքները ոչ միայն հիմնավորված չեն, այլ նաև ոչ երազ են, և ոչ էլ հիպոթետիկ ենթադրություն: Այդ մեղադրանքներն ընդհանրապես ոչ մի ընդհանուր բան չունեն Ամիրլիի հետ», — ասել է Լայիջևը:

Նրա խոսքով՝ ապացույցները կեղծվել են:

Ամիրլին իրավապաշտպանների կողմից քաղբանտարկյալ է ճանաչվել: Human Rights Watch և «Լրագրողներ առանց սահմանների» միջազգային կազմակերպությունները քննադատել են Ամիրլիի կալանքը: