Ադրբեջանին երբեք չեն ընդունի Եվրամիություն, նրան դա առանձնապես պետք էլ չէ, կարծում է նախագահ Իլհամ Ալիևը
Նախագահ Իլհամ Ալիևը, որը սովորաբար մամուլի հետ չի շփվում, հարցազրույց է տվել մի քանի իշխանամետ լրատվամիջոցների ներկայացուցիչների։ Հակիրճ ներկայացնում ենք հարցազրույցի հիմնական թեզերը, որը նվիրված էր 2019 թ-ի արդյունքներին։
• Ի՞նչ է կատարվում Ադրբեջանում․ հեղափոխություն վերևի՞ց, թե՞ իմիջի շտկում։ Կարծիք
Ադրբեջանին Եվրամիություն չեն ընդունի, քանի որ այն մուսուլմանական երկիր է
«Տեսեք, թե երբ է Թուրքիան Եվրամիության հետ Ասոցացման համաձայանգիր կնքել։ Հնարավոր է՝ տասնամյակներ առաջ։ Սակայն արդյոք հետագա քայլերն արդյունք տվե՞լ են։ Իհարկե ոչ, և դա մեծ անարդարություն էր։ Թուրքիային Եվրամիություն չեն ընդունում, քանի որ այն մուսուլմանական երկիր է։ Այդ դեպքում, արդյո՞ք Ադրբեջանին կընդունեն։ Իհարկե ոչ»։
Չարժե, որ Ադրբեջանն անդամակցի Եվրամիությանը
«Յուրաքանչյուր քաղաքացի, տեսնելով Եվրոպայում կատարվող գործընթացները, նկատում է, թե ինչ իրադարձություններ են տեղի ունենում, այդ թվում՝ կրոնական, ազգային-հոգևոր արժեքների հողի վրա։ Արդյո՞ք մեզ պետք են նման գործընթացներ։ Իհարկե ոչ, և մենք պետք է սա բացահայտ ասենք»։
«Ադրբեջանը չի կարող ինտեգրվել Եվրոպային, որը ճգնաժամ է ապրում, ճնշում իսլամն ու տարբերություն չի դնում տղամարդկանց և կանանց միջև», – այսպիսի շատերի համար շոկային հայտարարություն էր արել Իլհամ Ալիևը դեռևս նոյեմբերին։
Ադրբեջանն ակտիվորեն չի մասնակցելու «Արևելյան գործընկերություն» ծրագրին, բայց չի էլ լքելու այն
«Մենք ներկայացված ենք ծրագրում, սակայն, անկեղծ ասած, դրան շատ մեծ նշանակություն չենք տալիս։ Քանի որ մեզ համար լիովին պարզ չեն այդ ծրագրի շատ նպատակներ։ Եթե դա եվրաինտեգրացիան է, ապա բոլորի համար ակնհայտ է, որ այդ նպատակն անհասանելի է հետխորհրդային հանրապետությունների համար»։
«Արևելյան գործընկերությունը» Եվրամիության նախագիծ է, որն ուղղված է Եվրամիության և նախկին ԽՍՀՄ վեց երկրների՝ Ադրբեջանի, Հայաստանի, Բելառուսի, Վրաստանի, Մոլդովայի և Ուկրաինայի միջև ինտեգրացիոն կապերի զարգացմանը։
Պաշտոնյաները նախագահին չեն զեկուցում երկրում առկա խնդիրների մասին
«Եթե հարցնենք, նրանք կասեն, որ ամեն ինչ հիանալի է, ամեն ինչ հիասքանչ է, ոչ մի խնդիր չկա։ Երբ ես շրջաններ այցելելիս զրուցում եմ գործադիր իշխանությունների ղեկավարների հետ, հարցնում եմ, թե ինչ խնդիրներ կան, ասում են, որ ամեն ինչ գերազանց է։ Բայց չէ՞ որ այդպես չի կարող լինել։ Կամ նա ինքը չգիտի, կամ ուզում է թաքցնել, կամ էլ չգիտեմ, թե ինչ նպատակ է հետապնդում»։
Բարձր պաշտոնյաների հեռացումը լայնամասշտաբ բարեփոխումների մի մասն է
«Բարեփոխումների գլխավոր խնդիրն այն է, որ երկրում առկա մթնոլորտն առողջ լինի, բացասական երևույթներ չլինեն։ Նոր կադրերը նոր մոտեցում են բերում, նոր մտածելակերպ, և ես բարձր եմ գնահատում նրանց գործունեությունը»։
