Ադրբեջանի փոխվարչապետի թոռը մեղադրվում է ծանր ավտովթար կատարելու համար

Բաքվի օդանավակայանի մայրուղում երկու թանկարժեք ավտոմեքենաների մրցավազքն ավարտվել է ծանր ավտովթարով, որի արդյունքում մահացել է երկու և ծանր վիրավորվել երեք մարդ: Ըստ նախնական տվյալների՝ միջադեպի մեղավորը Mercedes Geländewagen մեքենան է եղել, որի ղեկին եղել է 21-ամյա Նայիլ Ալլահվերդիևն՝ Ադրբեջանի կառավարության փոխվարչապետի և փախստականների և բռնի տեղականվածների պետական կոմիտեի նախագահ Ալի Հասանովի թոռը:

Վարորդը, որը չի կարողացել մեքենան կառավարել 220կմ/ժ արագության տակ (արագության սահմանափակումը եղել է 70կմ/ժ) սկզբից հարվածել է մեկ այլ մեքենայի, այնուհետև հետիոտնային անցման վրա մահացու հարված հասցրել հետիոտնին: Այնուհետև մեքենան դուրս է եկել երկրորդ գիծ, այնտեղ հարվածել ևս երկու հոգու, շուռ եկել և այրվել: Հետիոտնից բացի մահացել է նաև «Մերսեդեսի» ուղևորը, ծանր վիրավորվել է երեք մարդ, որոնցից երկուսը Թուրքիայի քաղաքացիներ են: Ինքն Ալլահվերդիևը հիվ անդանոց է տեղափոխվել ծանր այրվածքներով:

Որոշ պարբերականներ միջադեպի առաջին ժամերին փորձում էին պաշտպանել փոխվարչապետի թոռանը՝ պնդելով, որ ղեկին է եղել ոչ թե Ալլահվերդիևն, այլ մեքենայի մահացած ուղևորը: Սակայն հաջորդ առավոտյան ներքին գործերի նախարարության մամուլի քարտուղար Էսխան Զահիդովը virtualaz.org գործակալությանը հայտարարել է, որ տեսախցիկների տեսագրությունների հիման վրա ոստիկանությունը եզրակացություն է արել, որ մեքենան վարել է հենց Ալլահվերդիևը:

Նայիլ Ալլահվերդիևը ոչ միայն փոխվարչապետի թոռն է, այլ նաև պետական սահմանային ծառայության նախագահ Էլչին Գուլիևի փեսան, ընդ որում նրա աղջկա հետ հարսանիքը եղել է ընդամենը մեկ ամիս առաջ:

Ինքը՝ փախստականների գործերով պետական կոմիտեի նախագահ Ալի Հասանովը, հրաժարվել է մեկնաբանել իրավիճակը. «Ես չեմ ուզում այդ մասին խոսել: Չեմ հասկանում, թե ինչու է անունս հոլովվում լրատվամիջոցներում: Իրավական պետությունում յուրաքանչյուրի պատասխանատվությունն անհատական է: Ես ուզում են, որ բոլորը դա գիտակցեն», — Հասանովի խոսքերն է մեջբերում gununsesi.info գործակալությունը:

Այս միջադեպը մեծ արձագանք է առաջացրել հասարակությունում: Առաջարկում ենք մի քանի մեջբերում սոցցանցերից, ինչպես միշտ, հեղինակների անունները չնշելով:

«Ալի Հասանովին կարելի է ինչ-որ կերպ ներել այդ ավտոպարկը, եթե նա լիներ մաքսատան կամ հարկերի նախարարը: Սակայն նա պատասխանատու է փախստականների կյանքի համար: Ի՞նչ դեմքով նա այժմ պետք է արդարանա նրանց առջև 36 մանաթ (20 դոլար) չքավորի նպաստի համար»:

«Ալի Հասանովն Ալլահի պատժին է արժանացել այն ամենի համար, ինչ արել է փախստականներին: Թող այժմ ստուգեն նրա կառուցած ավանները, թե որքան փող է նա կերել այդ շինարարությունների ժամանակ: Փախստականների համար ավանների բոլոր առևտրային և կենցաղային օբյեկտները ձևակերպված են նրա ազգականների վրա: Այլապես որտեղի՞ց նրա թոռանը 250 հազար դոլարանոց մեքենա, ասում են այն էլ միակը չէ»:

«Ես ամեն անգամ ասում և գրում եմ, որ մեզ մոտ գոյություն ունեն կազմակերպված հանցավոր խմբավորումներ, որոնք կազմված են պաշտոնյաների և պատգամավորների երեխաներից: Նրանց «տանիքը» հենց իրենց հայրերն ու մայրերն են: Նրանք սպառնալիք են ներկայացնում ոչ միայն հասարակ քաղաքացիների, այլ նաև ողջ հասարակության և պետության անվտանգության համար: Դե թող մեր իրավապահ մարմինները մտածեն, թե ինչի դա կարող է բերել»:

«Ամեն ինչից զատ Ալի Հասանովը լավ «առիթ» է տվել մեր թշնամիներին տեղեկատվական պատերազմում: Ի՞նչ դեմքով է այժմ փախստականների կոմիտեի ղեկավարը ներկայացնելու այդ փախստականներին միջազգային հանդիպումներում»:

«Ես նախագահի փոխարեն այդ երիտասարդին Ղարաբաղ առաջնագիծ կուղարկեի՝ ամենածանր դիրք: Թող մոտիկից ծանոթանա այն պայմաններին, որում ապրում են նրա հասակակիցները»: