Ադրբեջանի հարկերի նախարարությունը վերականգնել է «Թուրան» գործակալության դեմ հարկային պատժամիջոցները

Ադրբեջանի հարկերի նախարարությունը վերականգնել է ընդամենը մեկ շաբաթ առաջ չեղարկված հարկային պատժամիջոցները «Թուրան» հնագույն անկախ տեղեկատվական գործակալության դեմ:

Սեպտեմբերի 18-ին «Թուրանի» էլեկտրոնային հասցեին սեպտեմբերի 15-ի ամսաթվով նամակ է եկել հարկերի նախարարությունից: Դրանում ասված է, որ գործակալությունը հարկային պարտք ունի 37 հազար մանաթի (մոտ 22 հազար դոլար) չափով:

Դրանից 6 օր առաջ՝ սեպտեմբերի 12-ին, նախարարության նույն դեպարտամենտից «Թուրան» գործակալության հասցեին նամակ է ստացվել, որում ասվում էր, որ գործակալությունը հարկային որևէ պարտք կամ տուգանային պատժամիջոցներ չունի: Հետաքրքիր է, որ բոլոր նամակները ստորագրված են նույն պաշտոնյայի՝ լոկալ եկամուտների դեպարտամենտի փոխտնօրեն Էլման Բաշիրովի կողմից:

«Թուրան» գործակալության տնօրեն Մեհման Ալիևը հարկային մարմինների որոշումը «քաղաքական պատվեր է անվանել»:

«Ամեն ինչ պարզից էլ պարզ է: Սա քաղաքական ճնշման արդյունք է: Մեզ պատժում են մեր գործունեության համար», — ասել է Մեհման Ալիևը Մեյդան Թի-Վի-ին տված հարցազրույցում:

«Թե ինչ է տեղի ունեցել այդ նախարարությունում նշված օրերին և ինչպես բացատրել, որ նույն գերատեսչությունը 180 աստիճանով փոխում է իր դիրքորոշումն առանց պատճառներ նշելու, մենք չենք կարող ասել», — ասված է «Թուրան» գործակալության հայտարարությունում:

Սոցցանցերի օգտատերերն իշխանությունների դիրքորոշման այդպիսի կտրուկ փոփոխությունների մի քանի վարկած են առաջ քաշել: Հիմնական վարկածն այն է, որ իշխանությունները դժգոհ են, թե ինչպիսի ընդունելություն է ԱՄՆ-ում ցուցաբերվել Ադրբեջանի նախագահ Իլհամ Ալիևին:

Ադրբեջանի նախագահն այս օրերին ԱՄՆ-ում է և մասնակցում է ՄԱԿ Գլխավոր ասամբլեայի 72-րդ նստաշրջանին: Այցի ընթացքում նա չի հանդիպել Թրամփի վարչակազմի պաշտոնական ներկայացուցիչներից ոչ ոքի հետ:

«Ալիևն ԱՄՆ այցի նախօրեին «բարի կամքի մի քանի ժեստ է արել»՝ հույս ունենալով Արևմուտքից բարյացակամ վերաբերմունք ստանալ: Սակայն նրան չի ընդունել ոչ միայն նախագահ Թրամփն, այլ անգամ պետքարտուղարը: Հնարավոր է, որ նախագահի վարչակազմը վիրավորվել է այդ սառն ընդունելությունից և որոշել է չեղարկել «բարի կամքի իր ժեստը», — գրում է սոցցանցի մի օգտատեր: