Ադրբեջանական «Թուրան» տեղեկատվական գործակալության տնօրեն Մեհման Ալիևն ազատ է արձակվել

Սեպտեմբերի 11-ին Բաքվի Յամալի շրջանային դատարանը որոշում է կայացրել փոփոխել «Թուրան» տեղեկատվական գործակալության տնօրեն Մեհման Ալիևի կալանքը փոխել երկրից չբացակայելու ստորագրությամբ:

Մեհման Ալիևն արդեն ազատության մեջ է:

Նա լրագրողներին ասել է, որ նախօրեին դիմել է Ադրբեջանի նախագահ Իլհամ Ալիևին: Մեհման Ալիևն ասել է, որ դիմումի մեջ նա հիշեցրել է գործակալության գործունեության մասին, նշել, որ չի խուսափել իր հանդեպ քրեական գործի քննությունից: Իր դիմումի մեջ նա խնդրել է կալանքի տեսքով իր խափանման միջոցը փոփոխել: Ադրբեջանի նախագահը հանձնարարել է իրավապահ մարմիններին դիտարկել Մեհման Ալիևի դիմումը:

«Արդեն երկու շաբաթ ես գտնվում էի տեղեկատվական վակուումում: Սակայն, առաջին հերթին, ուզում եմ տուն գնալ ընտանիքիս մոտ», — ասել է Մեհման Ալիևն իրեն դիմավորած լրագրողներին և հավելել, որ պատիժը կրելու ժամանակ նրա հանդեպ վերաբերմունքը նորմալ է եղել:

Մեհման Ալիևի հանդեպ քրեական գործ է հարուցվել Ադրբեջանի քրեական օրենսգրքի երեք հոդվածով՝ ապօրինի ձեռնարկատիրություն, հարկերի վճարումից խուսափում և պաշտոնեական իրավասությունների չարաշահում:

Կալանքից հետո Ադրբեջանի շատ կազմամկերպություններ և ինտելիգենցիայի ներկայացուցիչներ միջնորդում էին՝ նախագահին խնդրանքով դիմելով «Թուրանի» տնօրենի գործի արդար քննություն անցկացնել և նրա խափանման միջոցը կալանքից փոխարինելով երկրից չբացակայելու ստորագրությամբ: Դիմողների թվում էին Մամուլի խորհրդի, Գրողների միության, Լրագրողների միության ներկայացուցիչներ, հայտնի գրողներ և հասարակական գործիչներ:

Մեհման Ալիևի համար ազատություն էին պահանջում միջազգային լրագրողական և իրավապաշտպան կազմակերպություններ, իրենց անհանգստությունն են այդ հարցով հայտնել ԱՄՆ, Մեծ Բրիտանայի կառավարությունները: