Ռուսաստանից բեռները աբխազական նավահանգիստներից տեղափոխվում են Թուրքիա
Աբխազիայի տարածքով բեռնափոխադրումների ծավալը
Աբխազիայի տարածքով տարանցիկ առևտուրը զգալիորեն աճել է Ուկրաինայի պատերազմի և Ռուսաստանի դեմ Արևմուտքի կողմից կիրառվող պատժամիջոցների պատճառով։ Ռուսաստանից բեռները երկաթուղով հասնում են աբխազական նավահանգիստներ և սովորաբար տեղափոխվում Թուրքիա։ Այս ճանապարհն օգտագործվում է նաև հակառակ ուղղությամբ՝ Թուրքիայից Ռուսաստան։
Աբխազական երկաթուղով միայն վերջին հինգ ամսում փոխադրված բեռների ծավալն ավելին է, քան նախորդ տարվա ամբողջ ընթացքում։
«Հիմնական տարանցիկ բեռն ածուխն է։ Այնուամենայնիվ, տարանցիկ բեռների տեսականին ամեն անգամ ընդլայնվում է։ Օրինակ, վերջերս մենք առաջին անգամ տեղափոխեցինք ջրածնի պերօքսիդ: Այժմ մենք բազմաթիվ պատվերներ ենք կատարում նրբատախտակի փոխադրման համար, որը Թաթարստանից ուղարկվում է Թուրքիա»,- պատմում է Աբխազական երկաթուղու ներկայացուցիչը։
Աբխազական երկաթուղային կայարանի բեռների փոխադրման պատվերներն աճում են, սակայն տեխնիկական խնդիրները խանգարում են ամբողջ ծավալի օգտագործմանը։ Մասնավորապես, աբխազական երկաթուղին հարմարեցված չէ մեծ տարողությամբ բեռնարկղեր ընդունելու և սպասարկելու համար։ Այժմ ղեկավարությունը փորձում է լուծել այս խնդիրը և, հավանաբար, հունիսի վերջին հնարավոր կլինի Աբխազիայի տարածքով խոշոր տոննաժային բեռների տարանցումը։
Արդեն երկրորդ օրն է, ինչ JAMnews-ը փորձում է Վրաստանի ԱԳՆ-ից Աբխազիայով բեռնափոխադրումների աճի մասին մի քանի հարցերի պատասխաններ ստանալ, սակայն ապարդյուն։
Ծովային տրանսպորտի գործակալությունից ոչ մի հարցի չեն պատասխանել՝ պատճառաբանելով, որ դա իրենց իրավասության մեջ չէ։
Էկոնոմիկայի նախարարությունից JAMnews-ին հայտնեցին, որ նման տեղեկատվության իրենց հայտնի չէ։ Վրաստանում Թուրքիայի դեսպանատունը նույնպես հայտարարում է, որ նման տեղեկություններ չունի։
Թուրքիան ՆԱՏՕ-ի միակ անդամն է, որը չի միացել Ռուսաստանի դեմ միջազգային պատժամիջոցներին, թեև Անկարան դատապարտել է Ռուսաստանի ներխուժումն Ուկրաինա։ Ավելի վաղ նախագահ Էրդողանը անընդունելի էր անվանել Ռուսաստանի կողմից, այսպես կոչված, Լուգանսկի և Դոնեցկի անկախության ճանաչումը։
Մերժելով պատժամիջոցները՝ Ռեջեփ Թայիփ Էրդողանը դա բացատրել է բնական գազի անհրաժեշտությամբ և ասել, որ պահանջվող ռեսուրսների գրեթե կեսը գալիս է Ռուսաստանից։ Նա հիշեցրել է նաև ռուսական աջակցությամբ AKKUYU ատոմակայանի կառուցման մասին։
«Առաջինը, ես չեմ կարող թողնել իմ ժողովրդին ձմռան ցրտին։ Բացի այդ, ես չեմ կարող կանգնեցնել մեր արդյունաբերությունը»,- ասել է Էրդողանը։
Ռուսաստանը և Թուրքիան սերտ տնտեսական կապեր ունեն: Թուրքիան արտահանման շուկայի մեծությամբ հինգերորդն է Ռուսաստանի համար, իսկ Ռուսաստանը տասներորդը՝ Թուրքիայի համար։
Թուրքիայի վիճակագրական ծառայության տվյալներով՝ այս տարվա փետրվարին ՌԴ քաղաքացիների կողմից երկրում բնակարաններ ձեռք բերելու վերաբերյալ տվյալները աճել են 96%-ով։ Forbes-ի տվյալներով՝ մարտին Ռուսաստանի քաղաքացիները Թուրքիայում հիմնել են 64 ընկերություն՝ երկու անգամ ավելի, քան փետրվարին։ Բացի այդ, ռուս օլիգարխների համար հեշտ լուծում է ներդրումների արդյունքում քաղաքացիություն ստանալու հնարավորությունը։
Միաժամանակ Թուրքիան սերտ հարաբերություններ ունի Ուկրաինայի հետ։ Բացի տնտեսական կապերից, Անկարան զենք է մատակարարում Կիևին։ Խոսքը թուրքական արտադրության «Բայրաքթար» անօդաչու թռչող սարքի մասին է, որը ուկրաինացիները հաջողությամբ օգտագործում են ռուսական բանակի դեմ։ Բացի այդ, Ուկրաինա ռուսական ներխուժման պատճառով Անկարան ռազմանավերի համար փակել է Բոսֆորի և Դարդանելի նեղուցները։
Ուկրաինա ռուսական ներխուժումից հետո Թուրքիան փորձում է գլխավոր միջնորդ լինել երկու երկրների միջև, և նրանց միջև բանակցություններ են ընթացել Ստամբուլում։ Ավելի վաղ Էրդողանը հայտարարել էր, որ Թուրքիան երկու երկրներին էլ բարեկամ է համարում։ Միաժամանակ Անկարան ճանաչում և աջակցում է Ուկրաինայի տարածքային ամբողջականությունը։
Աբխազիայի տարածքով բեռնափոխադրումների ծավալը
