Աբխազական խորհրդարանի նոր կազմից ամենաշատը գոհ է իշխանությունը
Այս կիրակի Աբխազիայում տեղի ունեցած խորհրդարանական ընտրություններն ուրախացնում են ավելի շուտ իշխանություններին, քան ընդդիմությանը:
Քվեարկության առաջին փուլից հետո, երբ խորհրդարանի միայն մեկ երրրորդն էր ձևավորվել, իշխանությունն ու ընդդիմությունը հավասար թվով պատգամավորական մանդատներ էին ստացել:
Սակայն քվեարկության արդեն երկրորդ փուլն անցավ նախագահ Ռաուլ Հաջիմբայի կողմնակիցների համար մաժորային նոտայի վրա. 22 ընտրատարածքների մեծ մասում, որտեղ ընտրությունների երկրորդ փուլ էր անցկացվում, հաղթեցին այն թեկնածուները, որոնց վրա խաղադրույք էր արել իշխանությունը:
Այժմ նոր խորհրդարանի 35 տեղից 20-ն իշխանամետ համարվող պատգամավորներինն են:
Ընդդիմությունն, ըստ ամենայնի, երկրորդ փուլից զգալիորեն ավելի շատ բան էր սպասում: Կուլիսներում նույնիսկ խոսում էին խորհրդարանական մեծամասնություն կազմելու մասին: Սակայն երկրրոդ փուլից հետո այն խորհրդարանում ընդամենը լրացուցիչ 4 տեղ ստացավ, բացի արդեն ձեռք բերած 5-ից:
Այնուամենայնիվ, ընդդիմադիրների փոքր թիվը խորհրդարանում կփոխհատուցվի փորձով և որակով: Նոր խորհրդարանում ընդդիմությունը ներկայացնելու են այնպիսի նշանակալից դեմքեր, ինչպիսին է Աբխազիայի նախկին նախագահ Ալեքսանդր Անկվաբն ու «Ապրա» հիմնադրամի նախագահ Ասլան Բժանիան, որը վերջին նախագահական ընտրություններում ձայների 35%-ն էր հավաքել:
Ժողովրդական ժողովում այդպիսի ծանրաքաշների ներկայությամբ նախագահ Ռաուլ Հաջիմբայի կողմնակիցները չեն կարող պարծենալ:
Իշխանությունների կողմնակիցներից և ընդդիմության ներկայացուցիչներից զատ խորհրդարանի նոր կազմում են հայտնվել նաև մի խումբ «չեզոք» քաղաքական գործիչները, որոնք ի սկզբանե ցուցադրաբար հեռացան երկու մարտնչող ճամբարներից:
Մասնավորապես, պատգամավորական մանդատներ ստացան ներքին գործերի նախկին նախարար Ռաուլ Լոլուան, «Այնար» կուսակցության առաջնորդներից մեկը՝ Ալմաս Ջոպուան, և ԿԸՀ նախկին ղեկավար Բատալ Տապագուան:
Մի խոսքով, որքան էլ այժմ հաղթանակ տոնեն նախագահ Ռաուլ Հաջիմբայի ճամբարում, վստահություն, որ նոր խորհրդարանն իր աշխատանքի ողջ ժամանակահատվածում հավատարիմ կլինի գործող իշխանությանը, չունեն նախագահի շրջապատի անգամ ամենալավատեսորեն տրամադրված փորձագետները:
Ընտրությունների մեծամասնական համակարգը, որի համաձայն ձևավորվում է աբխազական խորհրդարանը, պատգամավորներին հնարավորություն է տալիս մանևրելու, այնսինքն՝ գործելու իրավիճակի համապատասխան, տրամադրություններ ձևավորելու՝ ելնելով գոյություն ունեցող քաղաքական իրողություններից:
Պետք չէ մոռանալ, որ ներկայիս ընդդիմադիր գործիչ Ալեքսանդր Անկվաբի նախագահության ժամանակ ձևավորված նախորդ խորհրդարանը նույնպես սկզբում իշխանական էր: Սակայն այն բանից հետո, երբ 2014թ-ի մայիսի վերջին ընդդիմությունը գրոհեց նախագահական պալատն ու Անկվաբին ստիպեց հրաժարական տալ, խորհրդարանում ուժերի հարաբերակցությունը միանգամից հակառակ ուղղությունը ստացավ:
