Tesla-ն էլեկտրական բեռնատար է ներկայացրել

Նոյեմբերի 16-ին Tesla ընկերությունը ներկայացրել է աշխարհում առաջին առանց ներքին այրման շարժիչի գործող բեռնատարը՝ Tesla Semi-ն, հաղորդում է CNN-ը:

Բեռնատարը մեկ անգամ լիցքավորվելով կարող է մոտ 800կմ անցնել: 30 րոպե լրացուցիչ լիցքավորումից հետո Tesla Semi-ն ունակ է ևս 650կմ անցնելու:

Էլեկտրաբեռնատարն ավտոպիլոտ ունի, որը կարող է մեքենան ճանապարհագծում պահել և առանց մարդու միջամտության վերադասավորվել։  Tesla-ի ղեկավար Իլոն Մասկը մամուլի ասուլիսին ասել է, որ անգամ ինքը «կարող է վարել այս մեքենան, թեև երբեք բեռնատար չի վարել»:

Tesla Semi-ի թափավազքը 100 կմ-ում 5 վայրկյան է, իսկ ամբողջապես բեռնված վիճակում (36 տոննա)՝  20 վայրկյան:

Էլեկտրաբեռնատարների վաճառքը կսկսվի 2019թ-ին, սակայն վաճառքի հստակ ամսաթիվն ու մոտավոր արժեքը դեռևս հայտնի չեն:

Բեռնատարից բացի Tesla-ն ներկայացրել է նաև նոր էլեկտրական սպորտքար: Tesla Roadster մոդելի 100կմ թափավազքը 1,9 վայրկյան է, այն ունակ է առանց լրացուցիչ լիցքավորման անցնել 1000կմ:

Սպորտքարը վաճառքի կհանվի 2020թ-ին, իսկ նվազագույն արժեքը կկազմի մոտ 200 հազար դոլար: