Թուրքիայում ձերբակալվել է «ամանորյա հրաձիգը»

Թուրքիայի հատուկ ծառայությունները Ստամբուլում ձերբակալել են Նոր տարվա գիշերն իրականացված զանգվածային սպանության կասկածյալին: Ուզբեկստանի քաղաքացի Աբդուլքադեր Մաշարիպովի դեմ հետախուզում էր հայտարարվել այն բանից հետո, երբ, ըստ Թուրքիայի իշխանությունների, նա Ստամբուլի գիշերային ակումբներից մեկում կրակ էր բացել և սպանել 39 մարդու, այդ թվում 25 օտարերկրացիների: Հարձակման հետևանքով ևս 65 մարդ վիրավորվել էր:

Թուրքական Hurriyet պարբերականի տվյալներով՝ ոստիկանությունից թաքնվող Մաշարիպովը ձերբակալվել է թանկարժեք բնակարանում, որտեղ նրան գտել են մանկահասակ որդու հետ: Հատուկ գործողության արդյունքում ոստիկանությունը ձերբակալել է ևս մեկ տղամարդու Ղըրղըզստանից և 3 կնոջ, որոնք կասկածվում են ահաբեկչական գործունեությանը հարելու մեջ:

«Ամանորյա հրաձիգի» որոնողական և ձերբակալման գործողություններում ներգրավվել է շուրջ 1000 ոստիկան և հատուկ ծառայությունների աշխատակից:

Գիշերային ակումբում տեղի ունեցած ահաբեկչության պատասխանատվությունը ստանձնել է «Իսլամական պետություն» խմբավորումը: Ահաբեկչությունից հետո ԻՊ-ի հետ կապեր ունենալու կասկածանքով  Թուրքիայում ձերբակալվել է ավելի քան 40 մարդ: