Frontera ընկերությունը (ԱՄՆ) Վրաստանին մեղադրում է հակաամերիկյան տրամադրությունների համար

Ամերիկյան Frontera ընկերությունը նամակ է ուղարկել Վրաստանի վարչապետ Գիորգի Գախարիային, որում պնդում է, որ երկրում վատթարացել է բիզնես–կլիման, դադարել է գործել օրենքի գերակայությունն, իսկ իշխանություններն օգտագործում են դատարանը որպես ճնշման լծակ։

«2013 թ–ից ի վեր մենք բախվում ենք հակաամերիկյան տրամադրությունների աճի և ամերիկյան ներդրումների, ամերիկյան հասարակական կազմակերպությունների նկատմամբ խտրական վերաբերմունքի, ինչպես նաև ազատ շուկայի օրենքների պարբերական խախտման։

Դրա փոխարեն Վրաստանում սկսել է ամրապնդվել ռուսական տիպի ավազակապետություն՝ քողարկված ամերիկյան ժողովրդավարական արժեքներով և ազատ շուկայով։

Նման «քաղաքական ներկայացումը» խաղարկվում է միայն ԱՄՆ կառավարությունից օգնություն ստանալու համար։ Այդ թատրոնին պետք  է վերջ տալ», — ասված է Frontera ընկերության տնօրենների խորհրդի նախագահ Սթիվ Նիկանդրոսի և ընկերության նախագահ Զազա Մամուլայիշվիլիի նամակում։

Նամակի հեղինակները վարչապետին հիշեցնում են, որ Վրաստանում 2013 թ–ից, շրջանցելով ամերիկյան պատժամիջոցներն ու խախտելով վրացական օրենքներն, անարգել աշխատում է ռուսական «Ռոսնեֆտ» էներգասհկան։

Երկրի գազաապահովման հարցերում իշխանությունները նախապատվությունը տվել են ռուսական «Գազպրոմին» և ադրբեջանական «Սոկարին», բանակցություններ վարել Իրանի հետ, իսկ Արևելյան Վրաստանի սպառողներին ավելի էժան և մրցակցային բնական գազով ապահովելու Frontera ընկերության փորձերը բախվել են նրա հետ պայմանագիրը լուծելու իշխանության փորձերին, ասված է նամակում։

Frontera ընկերության ղեկավարությունը կարծում է, որ բախվում է Վրաստանի իշխանությունների կանխակալ վերաբերմունքին՝ չնայած նրան, որ երկրում իր գործունեության ընթացքում ընկերությունն ավելի քան 500 միլիոն դոլարի ներդրում է կատարել, ինչպես նաև ածխաջրածնային հանք է հայտնաբերել, որը Վրաստանին կարող է էներգետիկ անկախություն ապահովել։

Նամակում հույս է հայտնվում, որ Վրաստանի կառավարությունը, որն ԱՄՆ հետ ռազմավարական գործընկերության ձգտում է հռչակում, դադարեցնելու է ընկերության հետ պայմանագիրը խզելու իրավաբանական փորձերն ու սկսելու է «կառուցողական համագործակցություն» նրա հետ, ինչը հուսադրող ազդակ կարող է լինել ամերիկյան մյուս ընկերությունների համար։

• Վրաստանը Եվրամիությունից 500 մլն եվրո կստանա, եթե կատարի իր վրա վերցրած պարտավորությունները
• Իվանիշվիլիի կապը Ռուսաստանի կառավարության հետ, արևմտյանի բիզնեսի ճնշում․ ամերիկացի սենատորների նամակն ԱՄՆ պետքարտուղարին 

Վրաստանի էկոնոմիկայի նախարարության պատասխանը

Վրաստանի վարչապետին ուղղված նամակին պատասխանել է երկրի տնտեսական և կայուն զարգացման նախարար Նաթիա Տուրնավան։

Ամերիկյան ընկերությունների ղեկավարներին ուղղված հայտարարությունում հիշատակվում է, որ միջազգային արբիտրաժային դատարանը վճիռ է կայացրել հօգուտ պետության, և, դրանից ելնելով, Frontera ընկերությանն առաջարկվում է ժամանակին կատարել այդ վճիռը։

Ստոկհոլմի արբիտրաժային դատարանի վճռում ասվում է, որ Frontera ընկերությունը խախտել է պայմանագրային պարտավորությունները, մասնավորապես, նրա հայտարարություններն այն մասին, որ Վրաստանում աշխաջրածնային հանքավայր է հայտնաբերվել, անհիմն են։ Արբիտրաժի որոշման համաձայն՝ ընկերությունը վրացական կողմին պետք է 6 մլն դոլար վճարի։

Վրաստանի Նավթի և գազի պետական գործակալության և Frontera ընկերության միջև պայմանագիրը խզվելու է 2020 թ–ի հուլիսի 27–ին։

Հիշեցնենք, որ Վրաստանում Frontera–ի և ամերիկյան այլ ներդրողների խնդիրների առնչությամբ մի խումբ սենատորներ և կոնգրեսականներ այս տարվա մայիսի 15–ին գրավոր տեսքով, հաղորդել են ԱՄՆ պետքարտուղարին և ֆինանսների նախարարին։