Քաղբանտարկյալներ, բռնաճնշումներ և ոչ միայն. Վրաստանի վերաբերյալ քննարկում Եվրախորհրդարանում
Վրաստանի վերաբերյալ քննարկումները Եվրախորհրդարանում
Եվրախորհրդարանում կայացել է Վրաստանի վերաբերյալ քննարկում՝ «Էլենե Խոշտարիայի և «Վրացական երազանքի» ռեժիմի քաղբանտարկյալների գործը» խորագրով: Խորհրդարանի պատգամավորներն արտահայտել են իրենց բողոքը Վրաստանի կառավարության կողմից ընդդիմադիր գործիչների, լրագրողների և քաղաքացիական հասարակության ակտիվիստների նկատմամբ կիրառվող քաղաքական բռնաճնշումների հետ կապված։
Իր ելույթի ժամանակ Եվրոպական խորհրդարանի պատգամավոր Ռասա Յուկնևիչիենեն ընթերցել է «Դրոա» կուսակցության առաջնորդ Էլենե Խոշտարիայի նամակը, որն ուղարկվել էր բանտից:
Նամակում ընդդիմության առաջնորդը, որի կալանքը Եվրախորհրդարանի անդամները համարում են քաղաքական բռնաճնշում, նշում է.
«Ես ուզում եմ, որ դուք իմանաք. ես պատրաստ եմ մնալ բանտում այնքան ժամանակ, որքան անհրաժեշտ է, և անձամբ ես չեմ տխրում իմ ձերբակալության բերումով: Շատ ավելի կարևոր է, որ պատշաճ ուշադրություն դարձվի այսօր Վրաստանում Եվրոպայի առջև ծառացած ռազմավարական մարտահրավերներին: Եվ դուք իսկապես հաջողում եք այդ գործում:
Հնարավոր է՝ Բիձինա Իվանիշվիլին ցանկանա մեզ օգտագործել որպես պատանդներ՝ սակարկությունների համար: Մենք չպետք է դա թույլ տանք: Իմ նպատակը իմ անձնական ազատությունը չէ. իմ նպատակը վրաց ժողովրդի ազատությունն է»:
Ավելին, Եվրախորհրդարանի անդամները միաձայն նշել են, որ վերջերս ընդունված օրենքները, որոնք սահմանափակում են օտարերկրյա ֆինանսավորումը և քաղաքական ակտիվությունը, ինչպես նաև ցուցարարների նկատմամբ բռնությունը և ընդդիմության առաջնորդների ձերբակալությունները, հստակ ցույց են տալիս Վրաստանի կառավարության քամահրանքը օրենքի գերակայության և հիմնարար ազատությունների նկատմամբ:
Եվրահանձնակատար Վոպկե Հուկստրայի կարծիքով՝ «Վրաստանում մարդու իրավունքների վիճակը վատթարանում է», և երկիրը շարժվում է դեպի ավտոկրատիա։
Հուկստրան աջակցել է ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասի դիրքորոշմանը և ընդգծել, որ ԵՄ-ն պատրաստ է պատասխանատվության ենթարկել ժողովրդավարական հետընթացի և մարդու իրավունքների խախտումների համար պատասխանատու անձանց։
«Վրաստանում քաղաքական դրդապատճառներով բանտարկված է ավելի քան 150 մարդ, այդ թվում՝ ընդդիմադիր գործիչներ, լրագրողներ, քաղաքացիական հասարակության ներկայացուցիչներ և ուսանողական խմբեր», — նշել է Եվրախորհրդարանի պատգամավոր Մալգոժատա Գոշևսկան։ Նա նաև հավելել է, որ ԵՄ-ն չպետք է սահմանափակվի միայն հայտարարություններով, այլ պետք է կիրառի կոնկրետ պատժամիջոցներ պատասխանատուների նկատմամբ։
Եվրախորհրդարանի անդամները մատնանշել են նաև Վրաստանի դերը Ռուսաստանի դեմ պատժամիջոցներից խուսափելու գործում։
Եվրախորհրդարանի պատգամավոր Դայնյուս Ժալիմասը նկատել է․
«Վրաստանը դարձել է Ռուսաստանի դեմ պատժամիջոցներից խուսափելու հաբ՝ պատերազմի համար անհրաժեշտ ապրանքների վերաարտահանումից մինչև նավթամթերքի ծագումը թաքցնել։ Սա ցույց է տալիս, որ վրացական ռեժիմը շարունակում է բռնաճնշումների ենթարկել քաղհասարակությանը, և ԵՄ-ն պետք է խիստ պատժամիջոցներ կիրառի պատասխանատու ընկերությունների և պաշտոնյաների նկատմամբ»։
Եվրախորհրդարանի մի շարք անդամներ, այդ թվում՝ գերմանական ծայրահեղ աջ «Այլընտրանք Գերմանիայի համար» (AfD) կուսակցության անդամ Տոմաշ Ֆրոլիխը, ընդգծել են Վրաստանի պրագմատիկ արտաքին քաղաքականության մոտեցումը և ընդունել նրա տնտեսական հաջողությունները.
«8% տնտեսական աճը տարածաշրջանում առաջինն է. նրանց ռեժիմի փոփոխություն պետք չէ», — ասել է նա՝ հավելելով, որ երկիրը պետք է պահպանի իր ինքնիշխանությունը։
Միևնույն ժամանակ, խորհրդարանի անդամների մեծ մասը Վրաստանի կառավարությանը կոչ է արել անհապաղ ազատ արձակել բոլոր քաղբանտարկյալներին։
Բացի դրանից, նրանք հորդորել են դադարեցնել բռնաճնշող օրենքների ընդունումը և հարգել ժողովրդավարության հիմնարար սկզբունքները, այդ թվում՝ քաղաքական բազմակարծությունը։ Ինչպես նշել է Ռասա Յուկնևիչիենեն. «Վրաստանը կորած չէ. վրաց ժողովուրդը վճռականորեն պայքարում է, և Եվրոպան կանգնած է նրա կողքին»։
«ՀՀ վարչապետը կարևոր քայլ է անվանել Վրաստանի անդամակցությունը Եվրամիությանը։ Նրանք [վրացական իշխանությունները] հրաժարվել են իրենց եվրոպական հեռանկարներից, ինչը բացասական հետևանքներ է ունեցել ինչպես երկրի ներսում, այնպես էլ դրա սահմաններից դուրս։
Կա լրագրողների, քաղաքական գործիչների և քաղհասարակության ներկայացուցիչների երկար ցանկ, որոնք դարձել են դատական հետապնդումների զոհ։ Մենք այստեղ հիշատակել ենք Էլենա Խոշտարիային, բայց բանտում նրա կողքին կան տարբեր ժողովրդավարական խմբերի բազմաթիվ ներկայացուցիչներ, որոնք իրենց ձայնը բարձրացրել են ժողովրդավարության օգտին»,— հայտարարել է պատգամավոր Նաչո Սանչես Ամորը։
Եվրախորհրդարանի պատգամավոր Մարկետա Գրեգորովան նույնպես արձագանքել է Վրաստանի խորհրդարանի կողմից ընդունված վերջին օրենքներին՝ հայտարարելով, որ դրանք «արգելում են ակտիվիզմն ու քաղաքացիական հասարակության գործունեությունը»։ Նրա խոսքով՝ Եվրամիությունը վերջապես պետք է արձագանքի՝ պատասխանատուների նկատմամբ սահմանելով թիրախային պատժամիջոցներ։
«Եվ ինձ համար միևնույն է, եթե երկու անդամ պետություններ արգելափակում են դա։ Իսկ մյուս 25 երկրները ի՞նչ են ասում։ Մի՞թե նրանք չեն կարող պատժամիջոցներ կիրառել։ Ի՞նչն է նրանց կանգնեցնում։ Հակառակ դեպքում լռությունն ու անգործությունը միայն ամրապնդում են հակաժողովրդավարական ուժերի դիրքերը և վտանգավոր ազդանշան են ուղարկում, որ թեկնածու [ԵՄ անդամության] երկրում քաղաքացիների նկատմամբ բռնաճնշումները կարող են անպատիժ մնալ»,— շեշտել է Գրեգորովան։
Հետևեք մեզ — Facebook | Youtube
Վրաստանի վերաբերյալ քննարկումները Եվրախորհրդարանում
