ԱՄԷ նախագահի այցը Ադրբեջան. մարդու իրավունքների խնդիրներով երկրների ռազմավարական դաշինք
Ադրբեջանի ու ԱՄԷ-ի հարաբերությունները
Արաբական Միացյալ Էմիրությունների նախագահ շեյխ Մուհամմեդ բին Զայեդ Ալ Նահայյանը պաշտոնական այց է կատարել Ադրբեջան: Իշխանամետ ԶԼՄ-ներն այցն անվանում են պատմական՝ ընդգծելով, որ բանակցությունների արդյունքում երկու երկրների միջև ստորագրվել է 14 փաստաթուղթ:
Ադրբեջանի կառավարությունը ստորագրված փաստաթղթերը դիտարկում է որպես գործակցության ընդլայնման հաստատում և հայտարարում, որ համաձայնագրերը կնպաստեն տնտեսության, էներգետիկայի, թվային զարգացման, կրթության և զբոսաշրջության ոլորտներում ռազմավարական գործընկերության խորացմանը:
Պաշտոնական տվյալների համաձայն՝ հարաբերությունները բարձրացվել են «համապարփակ ռազմավարական գործընկերության» մակարդակի:
Պաշտոնական և իշխանամետ գնահատականներ
Կառավարությանը մոտ կանգնած ԶԼՄ-ներն ու որոշ քաղաքագետներ այցը գնահատում են որպես պատմական իրադարձություն: Այսպես, Bakı Xəbər պարբերականը գրում է, որ 14 փաստաթղթերի ստորագրումը, մասնավորապես՝ ռազմավարական գործընկերության մասին հռչակագիրը և էներգետիկայի ոլորտում համագործակցության մասին հուշագրերը, երկկողմ հարաբերությունները բարձրացնում են նոր մակարդակի:
Նշվում է, որ ԱՄԷ-ի ընկերությունները ակտիվորեն մասնակցում են Ադրբեջանի կանաչ էներգետիկայի ոլորտի նախագծերին, ինչպես նաև աջակցում են Ադրբեջանի տարածքային ամբողջականությանը Ղարաբաղյան հակամարտության հարցում:
Xalq Xəbər-ն ընդգծում է շեյխ Մուհամմեդ բին Զայեդի այցի կարևորությունը «ազատագրված տարածքներ»՝ 14 փաստաթղթերի ստորագրումը ներկայացնելով որպես ռազմավարական գործընկերության ցուցանիշ և ընդգծելով, որ նախագահ Իլհամ Ալիևը բարձր է գնահատել ԱՄԷ-ի կատարած ներդրումները:
Մարդու իրավունքներն ու աշխատանքային միգրանտների վիճակը
ԱՄՆ Կոնգրեսի հետազոտական ծառայության (CRS)՝ ԱՄԷ-ին նվիրված զեկույցում ընդգծվում են մարդու իրավունքների ոլորտի լուրջ խնդիրներ՝ արտադատական պատիժներ, խոշտանգումներ, ազատազրկման վայրերում ծանր պայմաններ, քաղաքական բանտարկյալների գոյություն և կամայական ձերբակալություններ:
Փաստաթղթում մատնանշվում է նաև օտարերկրյա աշխատուժի շահագործումը․ խիստ վերահսկողության տակ աշխատող տարբեր երկրների հարյուր հազարավոր քաղաքացիներից, այդ թվում՝ ադրբեջանցիներից վերցնում են անձնագրերը, ուշացնում են աշխատավարձի վճարումները, իսկ բողոքողներին սպառնում են արտաքսմամբ։
CRS-ը կարծում է, որ չնայած մարդկանց թրաֆիքինգի դեմ պայքարի մասին ԱՄԷ-ի հայտարարություններին՝ երկիրը բավարար միջոցներ չի ձեռնարկում փախստական կանանց և հարկադիր աշխատանքի զոհերի պաշտպանության համար:
Քննադատական աղբյուրները հիշեցնում են ԱՄԷ-ի հետ ռազմավարական գործընկերություն կառուցելիս մարդու իրավունքների ոլորտի ցուցանիշները հաշվի առնելու անհրաժեշտության մասին: Առաջ է գալիս հարց՝ արդյո՞ք էներգետիկ և ֆինանսական ներդրումներին չի տրվում առաջնահերթություն՝ ի վնաս աշխատողների իրավունքների ու ժողովրդավարական արժեքների:
Ադրբեջանի ներքաղաքական համատեքստը
Ադրբեջանում պահպանվում են նաև մարդու իրավունքների և տնտեսական թափանցիկության հետ կապված խնդիրները։ Միջազգային իրավապաշտպան կազմակերպություններն իշխանություններին մեղադրում են քաղաքական հակառակորդների վրա ճնշում գործադրելու և քաղհասարակությանը սահմանափակելու մեջ:
Ադրբեջանցի քննադատները նշում են, որ ԱՄԷ-ի և Ադրբեջանի նման ավտորիտար համակարգերի միջև ռազմավարական դաշինքները ձևավորում են «ավտորիտար համերաշխություն»․ պետություններն ամրապնդում են քաղաքական լեգիտիմությունը էներգետիկ ռեսուրսների և ներդրումների բաշխման հաշվին, մինչդեռ հասարակության իրավունքներն ու շահերը չեն դառնում առաջնահերթություն:
Հետևեք մեզ — Facebook | Youtube
Ադրբեջանի ու ԱՄԷ-ի հարաբերությունները
