80 լարի՝ նետված ծխուկի համար: Թբիլիսիում սկսել են գործել տուգանքներ աղբի համար

Այսօրվանից փողոցում աղբ նետելն այլևս անվնաս զբաղմունք չէ: Ապրիլի 3-ից Թբիլիսիի կենտրոնական թաղամասերում հերթապահություն կիրականացնեն սև բաճկոններով մարդիկ, ովքեր փողոցների աղտոտման համար կտուգանեն և՛ ընկերություններին, և՛ անհատ անձանց:

Առաջին փուլում «Թբիլսերվիս խմբի» տեսուչները կսկսեն վերահսկել կենտրոնական թաղամասերը և հանրահայտ զբոսաշրջային վայրերը: Սկզբում նրաք կլինեն քսանը: Առաջին երկու շաբաթը նրանք տուգանքներ չեն կիրառի. կվարեն կանխարգելիչ զրույցներ և նախազգուշացումներ կանեն սպասվող պատժամիջոցների մասին:

Մինչդեռ, տուգանքները լուրջ են և տարածվում են ցանկացած տեսակի աղբի վրա, օրինակ, փողոցում նետված ծխուկի, պոլիէթիլենային տոպրակի, սննդի մնացորդների կամ տնային կենդանիների կղանքի վրա:

Ընդհանուր 2 կգ քաշով աղբով (այդ թվում նաև ծխուկների) աղտոտման համար նախատեսված է 80 լարի տուգանք, իսկ եթե աղբը նետված է շենքի պատուհանից, ապա՝ 100 լարի:

2 կգ-ից ավել քաշով աղբի դեպքում  տուգանքը կկազմի 150 լարի, նույն քաշով աղբը շենքի պատուհանից նետելու դեպքում՝  500 լարի:

Նոր կարգավորման համաձայն՝ շների կամ այլ տնային կենդանիների կղանքով տարածքի աղտոտման դեպքում նախատեսված է տուգանք 50 լարիի չափով: Իսկ եթե ընտանի կենդանու տերը մաքրի աղտոտված տարածքը, նա կազատվի տուգանքից:

Առանձին պատժամիջոցներ են նախատեսված նաև անվադողերի դեն նետելու համար. 1-ից 5 դեն նետված անվադողի համար նախատեսված է 150 լարի տուգանք, իսկ եթե դրանց թիվը 5-ից ավել է, ապա՝ 500 լարի: Այս կարգավորումը չի տարածվում հեծանիվների անվադողերի վրա:

Շրջակա միջավայրի՝ վտանգավոր թափոններով աղտոտման դեպքում նախատեսված է ֆիզիկական անձանց տուգանում 400 լարիի չափով և իրավական անձանց՝ 1000 լարիի չափով: Տուգանքները կկիրառվեն ապրիլի 17-ից:

Առաջին փուլում տեսուչները  կվերահսկեն քաղաքի կենտրոնական հատվածը, զբոսաշրջային վայրերը, հրապարակները, մարդաշատ հասարակական վայրերը: Նրանք կտեղաշարժվեն ոտքով, սակայն դա ամենևին չի ազատի պատասխանատվությունից վարորդներին:

Օրինակ, եթե տեսուչը նկատի, որ վարորդը մեքենայի պատուհանից ծխուկ է նետել, նա կարող է փոխանցել համապատասխան տեղեկատվությունը պարեկային ոստիկանությանը, որն ինքը կպատժի նման վարորդին:

Տեսուչները իրենց հետ կունենան տեսա- և ֆոտոխցիկներ, այդ իսկ պատճառով օրենքը խախտողներին չափազանց դժվար կլինի արդարանալ: