Այսօր ժամը 21։45-ին Հայաստանի Մարդու իրավունքների պաշտպան Արման Թաթոյանն իր ֆեյսբուքյան էջի միջոցով ահազանգեց այն մասին, որ ադրբեջանական զինված ուժերն ուղիղ նշանառությամբ կրակում են Գեղարքունիքի մարզի Կութ և Նորաբակ գյուղերի վրա:
«Կրակոցներն ինտենսիվ են ու տարբեր տրամաչափի զինատեսակներից։ Բնակիչները փորձում են պատսպարվել»,– գրել է Թաթոյանը։
Պաշտպանն Ադրբեջանի այս արարքները հանցավոր է որակում` նշելով, որ դրանք ուղիղ դիտավորությամբ միտված են մարդկանց կյանքից զրկելուն, խաթարում են մարդկանց անվտանգությունն ու խաղաղությունը:
Պաշտպանության նախարարությունն, իր հերթին, տեղեկացրեց երեկոյան, որ ժամը 18:10-ի սահմաններում ադրբեջանական ԶՈւ ստորաբաժանումները կրկին դիմել էին սադրանքի՝ տարբեր տրամաչափի հրաձգային զինատեսակներից կրակ բացելով հայ-ադրբեջանական սահմանի Գեղարքունիքի հատվածում տեղակայված հայկական դիրքերի ուղղությամբ:
ՊՆ հաղորդմամբ՝ ծավալվել է ինտենսիվ փոխհրաձգություն։ Հակառակորդի կրակոցից մահացու հրազենային վիրավորում էր ստացել հայ զինծառայող՝ 2002թ. ծնված շարքային։
Հայկական կողմը ձեռնարկել է պատասխան գործողություններ։ Պաշտպանական գերատեսչության տվյալների համաձայն՝ ադրբեջանական կողմն ունի զոհեր և վիրավոր:
Հայ-ադրբեջանական սահմանին իրավիճակը լարված էր նաև օգոստոսի 16-ի գիշերը։ Ադրբեջանը սադրանքի էր դիմել Սյունիքի մարզի, մասնավորապես՝ Սև լճի հատվածում՝ փորձելով դիրքային առաջխաղացում ապահովել։
Իսկ առավոտյան՝ ժամը 09։50 սահմաններում հակառակորդը սադրիչ գործողություններ էր ձեռնարկել արդեն Երասխի հատվածում։ Դիպուկահարի արձակած կրակոցից մահացու վիրավորում էր ստացել 1975թ. ծնված ավագ ենթասպա։
