20 հազար եվրո պետք է Ադրբեջանի իշխանությունները վճարեն լրագրողին՝ անարդար կալանքի համար
Ադրբեջանի իշխանությունները պետք է լրագրող Խադիջա Իսմայիլին 20 հազար եվրո փոխհատուցում վճարեն, քանի որ նա բանտ է նստել կեղծ մեղադրանքով։ Այսպիսի որոշում է կայացրել Մարդու իրավունքների եվրոպական դատարանը։
Խադիջա Իսմայիլն ադրբեջանցի լրագրող է, աղմկահարույց հետաքննությունների և իշխանություններին հասցեագրված քննադատական հոդվածների հեղինակ։ 2015 թ–ին նա դատապարտվել է յոթ ու կես տարվա ազատազրկման հարկերից խուսափելու, հափշտակության, ապօրինի գործարարության և ծառայողական դիրքի չարաշահման համար։ 2016 թ–ին ազատազրկումը փոխարինվել է պայմանական պատժով։ Amnesty International–ը լրագրողին խղճի գերի է ճանաչել։
Քննելով Խադիջա Իսմայիլի հայցն ընդդեմ Ադրբեջանի՝ ՄԻԵԴ–ն եկել է այն եզրակացության, որ, լրագրողին բանտ նստեցնելով, իշխանությունները ցանկացել են «լռեցնել նրան և պատժել լրագրողի աշխատանքի համար»։
«Խադիջա Իսմայիլի գործն այն բանի մարմնավորումն է, թե ինչպես են Ադրբեջանում հետապնդվում քննադատական ձայները», – մեկնաբանել է Amnesty International–ի ներկայացուցիչ Դենիս Կրիվոշեևը։
Ադրբեջանցի փորձագետ, Մեդիայի իրավունքի ինստիտուտի ներկայացուցիչ Խալիդ Աղալիևը հատկապես կարևոր է համարում այն, որ ՄԻԵԴ–ը ճանաչել է Իրավունքների սահմանափակման սահմանների մասին Եվրոպական կոնվենցիայի 18–րդ հոդվածի խախտումը։
«Այդ հոդվածը հաստատում է հայցվորի հետապնդման քաղաքական շարժառիթները։ Խոսքը հենց հակակոռուպցիոն հետաքննությունների համար նրան պատժելու մասին է», – ասում է Աղալիևը։
Սա Խադիջա Իսմայիլի առաջին հայցը չէ Ադրբեջանի դեմ, որը բավարարել է ՄԻԵԴ–ը։ Ճիշտ է, Ադրբեջանի իշխանությունները դեռևս ոչ մի անգամ չեն կատարել Եվրոպական դատարանի պահանջները։
Խադիջա Իսմայիլի դատվածությունը դեռևս պահպանվում է, և նա չի կարող լքել երկիրը, թեև միջազգային իրավապաշտպան կազմակերպությունները պնդում են, որ այդ արգելքը հանվի։
• Խադիջա Իսմայիլի նախորդ հայցերի մասին, որոնք բավարարել է ՄԻԵԴ–ը
• Ի՞նչ չի կարելի անել Ադրբեջանում։ Կարճ տեսանյութ մարդու իրավունքների մասին
