Ֆրանսիայում հայտնաբերվել է Ադրբեջանի նախագահի քրոջը պատկանող էլիտար անշարժ գույք
Ադրբեջանի նախագահի քրոջ ունեցվածքը Ֆրանսիայում
Ֆրանսիայում լրագրողները ապացույցներ են գտել Ադրբեջանի նախագահ Իլհամ Ալիևի քրոջ՝ Սևիլ Ալիևայի կողմից առնվազն 52 միլիոն եվրո արժողությամբ շքեղ անշարժ գույք ձեռք բերելու վերաբերյալ։ Գնումները կատարվել են 1999 թվականից մինչև 2008 թվականը։ Նշվում է, որ Սևիլ Ալիևան նաև Լոնդոնի ամենահարուստ շրջաններից մեկում գտնվող մի քանի տների սեփականատեր է:
Ֆրանսիական L’Obs ամսագիրը հրապարակել է «Շքեղ անշարժ գույք. ինչպես է Ֆրանսիան կասկածելի գումարներ ներգրավում ողջ աշխարհից» վերնագրով հոդված, որտեղ նշվում է, որ ավելի քան 60 օտարերկրյա գործիչներ, պետությունների ղեկավարներ, նախարարներ կամ կասկածելի գործարարներ հարյուրավոր միլիոն եվրոներ են ներդրել Ֆրանսիայում՝ շքեղ տներ կամ բնակարաններ գնելու համար:
«Դեպի ծով նայող տեսարանը շլացուցիչ է։ Այն բացիկների զարդանախշերից մեկն է, որոնք գրավում են աշխարհի հսկայական հարստությունները: Վիլլան և դրա լողավազանը՝ շրջապատված սոճու ծառերով Սեն-Տրոպեի ամենահայտնի անկյուններից մեկում հրավիրում են մտորումների: Տանտիրուհուն պետք է այն դուր եկած լինի այնքան, որ գնի նույնիսկ … հարևանությամբ գտնվող տունը:
«Զեբրա» և «Լա Գրենույ» անշարժ գույքի երկու ընկերությունների միջոցով ոմն Սևիլ Ալիևան 1999 թ.-ին 5,2 միլիոն եվրոյով ձեռք է բերել տասնհինգ սենյակից բաղկացած առաջին բնակելի տունը՝ չհաշված տան պահակի երեք սենյականոց բնակարանը. հետո երկրորդը՝ 2008 թվականին՝ 15,9 միլիոնով»,- ասվում է հոդվածում։
Սևիլ Ալիևան Ադրբեջանի նախկին նախագահ Հեյդար Ալիևի միակ դուստրն է, երկրի ներկայիս նախագահ Իլհամ Ալիևի քույրը, ծնվել է 1955 թվականին Բաքվում։
Կոմպոզիտոր է, հանդիսանում է ադրբեջանական Space հեռուստաալիքի ղեկավարը։ Սա Ադրբեջանում գտնվող միակ ընկերությունն է, որը կապված է Սևիլ Ալիևայի անվան հետ։
Ապրում է Լոնդոնում։
Ֆրանսիական ամսագրի տեղեկությունների համաձայն՝ Սեն-Տրոպեում գտնվող այս երկու տները Ֆրանսիայում Սևիլ Ալիևայի անշարժ գույքի միայն մի մասն են:
Փարիզի 16-րդ թաղամասում նա 2005 թվականին SCI Taureau-ի միջոցով գնել է մասնավոր առանձնատուն՝ փակ լողավազանով: Գործարքի արժեքը կազմել է 11,5 միլիոն եվրո, այն վճարվել է առանց հիփոթեքային վարկավորման, ինչպես Ալիևայի գրեթե բոլոր գնումները:
Բայց սա էլ դեռ վերջը չէ։ Ֆրանսիացի լրագրողները պնդում են, որ Սևիլ Ալիևան ունի նաև չորս բնակարան Ելիսեյան դաշտերի մոտ՝ ավելի քան 14 միլիոն եվրո ընդհանուր արժողությամբ, տները կոչվում են «Հաջողություն», «Մեծ հաջողություն» և «Շանս»:
«Նա նաև տներ ունի Բոլթոնում՝ Լոնդոնի ամենաթանկ շրջաններից մեկում, որտեղ էլ, իր պնդմամբ, ապրում է: Այս անգամ խոսք է գնում օֆշորային ընկերությունների միջոցով գույքի ձեռքբերման մասին:
Ֆրանսիայում իր անշարժ գույքի հետ կապված որոշ պաշտոնական փաստաթղթերում Սևիլ Ալիևան իրեն «կոմպոզիտոր» է հայտարարում. մոտ տասը տարի առաջ թողարկել է երկու ձայնասկավառակ, սակայն դրանք այլևս վաճառքում չեն։ Իսկ այլ փաստաթղթերում նա ասում է, թե ինքն «մասնագիտություն չունի»։
«Որտեղի՞ց այն 52 միլիոն եվրոն (առնվազն), որը Սևիլ Ալիևան ներդրել է Ֆրանսիայում անշարժ գույքի մեջ: Իմանալն անհնար է: Մենք փորձեցինք կապ հաստատել, սակայն Ադրբեջանի նախագահի քույրը չպատասխանեց մեր հեռախոսազանգերին»,- գրում է ամսագիրը:
Ադրբեջանի նախագահի քրոջ ունեցվածքը Ֆրանսիայում
