«Օմբուդսմենի առաջարկներին պետք է լուրջ վերաբերվել». ԱՄՆ դեսպանը՝ Սաակաշվիլիի առողջության մասին
Վրաստանում ԱՄՆ դեսպանը՝ Սաակաշվիլիի առողջական վիճակի մասին
Վրաստանում ԱՄՆ դեսպան Քելի Դեգնանը կոչ է անում Վրաստանի կառավարությանը լրջորեն վերաբերվել Վրաստանի երրորդ նախագահ Միխեիլ Սաակաշվիլիի առողջության վերաբերյալ օմբուդսմենի առաջարկություններին:
«Մենք ուշադիր հետևում ենք Միխեիլ Սաակաշվիլիի առողջական վիճակին։ Հորդորում ենք, որ նրան այցելեն որակավորված մասնագետներ և ցուցաբերեն համապատասխան բժշկական օգնություն: Մենք լիովին վստահում ենք օմբուդսմենի առաջարկություններին, նրան, թե ինչպես է իրականացվել մոնիթորինգը և ինչ առաջարկություններ կստացվեն ապագայում»,- հայտարարել է ԱՄՆ դեսպանը։
Նրա խոսքով, Հանրային պաշտպանի գրասենյակը սահմանադրական լիազորություն ունի պաշտպանելու յուրաքանչյուր քաղաքացու իրավունքները.
«Մենք կարծում ենք, որ սա մի մարմին է, որը շատ լավ աշխատանք է կատարում, ուստի լավ կլիներ, որ նրա առաջարկությունները հաշվի առնվեին»։
Վրաստանի հանրային պաշտպանի խորհրդի փոխանցմամբ՝ բանտարկված նախկին նախագահ Միխեիլ Սաակաշվիլիի առողջական վիճակը վատթարացել է։ Մասնավորապես, նրա մոտ ախտորոշվել է անորեքսիա և սպիտակուցային քաղց։
Ընտանիքը խնդրում է նրան տեղափոխել արտերկիր բուժման նպատակով:
Միխեիլ Սաակաշվիլին արդեն յոթ ամիս է, ինչ կալանքի տակ է։ Նախկին նախագահը ձերբակալվել է այն բանից հետո, երբ նա գաղտնի վերադարձավ Վրաստան 2021 թվականի հոկտեմբերի 1-ին։
Վրաստանի նախկին նախագահը Ռուսթավիի 12-րդ գաղութում է։ Նա իրեն քաղբանտարկյալ է համարում, այդ իսկ պատճառով այս ընթացքում երկու անգամ հացադուլ է հայտարարել՝ ի նշան բողոքի։ Առաջին դեպքում հացադուլը տևեց 51 օր։
Սկզբում նախկին նախագահին ստիպողաբար տեղավորել էին Թբիլիսիի ծայրամասում գտնվող Գլդանի բանտի հիվանդանոցում։ Իսկ նրա վիճակի կտրուկ վատթարացումից և կողմնակիցների բազմաթիվ բողոքներից հետո՝ նոյեմբերի 19-ին նրան տեղափոխեցին Գորի քաղաքի զինվորական հոսպիտալ։
Նոյեմբերի 10-ին Մարդու իրավունքների եվրոպական դատարանը որոշում է կայացրել՝ կոչ անելով Միխեիլ Սաակաշվիլիին դադարեցնել հացադուլը և պետությանը հանձնարարել ապահովել բանտարկյալի անվտանգությունն ու նրա հանդեպ պատշաճ վերաբերմունքը։
