«Օկուպացիան միշտ մեր օրակարգում առաջին հարցն է եղել և կա». Վրաստանի վարչապետ
Վրաստանի վարչապետ Գիորգի Կվիրիկաշվիլին հայտարարել է, որ օկուպացիան միշտ կառավարության համար կարևորագույն հարց է եղել և կա: Լրագրողների համար այս հայտարարությունը հնչել է Ցխինվալի շրջանում օկուպացիոն գծի տեղափոխման մասին հրապարակումներից և իշխանությունների հասցեին ընդդիմության մեղադրանքներից հետո:
Գիորգի Կվիրիկաշվիլիի խոսքով՝ կառավարությունն անպայման գործողություններ կձեռնարկի տարածքային ամբողջականության վերականգնման ուղղությամբ:
«Աշխատում եմ առանց էմոցիաների ընկալել իշխանությունների հասցեին մեղադրանքները, սակայն դա ավելի ու ավելի դժվար է դառնում: Ոչ մի րոպե մենք այնպես չենք անցկացրել, որպեսզի այդ հարցը մեր օրակարգում առաջին տեղը չզբաղեցնի», — ընդգծել է Կվիրիկաշվիլին:
Վրաստանի վարչապետն ընդգծել է, որ հենց օկուպացիան է եղել ԱՄՆ փոխնախագահի հետ իր վերջերս կայացած բանակցությունների գլխավոր թեման: Կվիրիկաշվիլիի խոսքով՝ նա զրուցակցին հայտնել է, որ այդ հարցը մյուսներից ավելի է անհանգստացնում Վրաստանի բնակչությանը:
«Ես ընդգծված կերպով կոչ եմ արել չհավատալ ոչ մի տվյալների, որոնցում օկուպացիայի հարցը վրացիների համար առաջին տեղում չէ: Ինչ էլ Վրաստանում տեղի ունենա, ինչ հաջողությունների էլ մենք հասնենք, այդ հարցը միշտ կարևորագույնն է լինելու մեր քաղաքացիների գիտակցությունում», — հաղորդել է Կվիրիկաշվիլին:
Վարչապետի խոսքով՝ «Վրացական երազանքն», իշխանության գալով, ծանր ժառանգություն է ստացել օկուպացիայի տեսքով: Նա հայտարարել է, որ Վրաստանը 135 գյուղ է կորցրել ոչ թե «սողացող օկուպացիայի» պատճառով, ինչպես դա փորձում է ներկայացնել ընդդիմությունն, այլ հստակ օկուպացիայի արդյունքում:
Ցխինվալի շրջանում օկուպացիոն գծի վրա արգելապատնեշ կառուցելու վերաբերյալ հատուկ հայտարարությամբ հուլիսի 10-ին կայացած մամուլի ասուլիսին հանդես է եկել Ռուսաստանի հետ հարաբերությունների հարցերով Վրաստանի վարչապետի հատուկ ներկայացուցիչ Զուրաբ Աբաշիձեն:
«Օկուպացիոն գծի վրա պաստառի տեղադրումն ընդգծում է այն, թե ինչ է տեղի ունենում օկուպացիոն գծում և ինչ նպատակ է հետապնդում. ստիպել վրացական կողմին բանակցություններ սկսել Հարավային Օսիայի դե ֆակտո իշխանությունների հետ այսպես կոչված սահմանազատման հարցերով, ինչը մեզ համար բացարձակ անընդունելի է», -հայտարարել է Աբաշիձեն:
Նրա խոսքով՝ վրցական կողմը բանակցություններ չի սկսի այդ հարցով, սակայն կաշխատի կանգնեցնել այդ գործընթացը միջազգային հանրության, արևմտյան գործընկերների ճնշման օգնությամբ և այդ խնդրի կարգավորում սկսել:
