Օլիմպիադա-2018-ը կարող է առանց Ռուսաստանի անցկացվել

Նոյեմբերի 16-ին Համաշխարհային հակադոպինգային գործակալության (ՀՀԴԳ) հիմնադիրների խորհուրդը մերժել է նույնատիպ ռուսական կազմակերպությանն իրավունքները վերականգնելու հարցում

ՀՀԴԳ հիմնադիրների խոսքով՝ այդ որոշումը կայացվել է այն բանի հետ կապված, որ Ռուսաստանի սպորտի ոլորտի պաշտոնյաները նախկինի պես չեն ընդունում երկրում դոպինգի օգտագործման համակարգի գոյության փաստը, որին աջակցել է պետությունը:

ՀՀԴԳ հիմնադիրների խորհրդի որոշումը հարցականի տակ է դնում 2018թ-ին Հարավային Կորեայում կայանալիք ձմեռային Օլիմպիադային Ռուսաստանի հավաքականի մասնակցության հարցը:

ՌՈւՍԱԴԱ-ի գործունեությունը կասեցվել է երկու տարի առաջ ՀՀԴԳ անկախ հանձնաժողովի՝ Ռուսաստանում դոպինգի մասին առաջին զեկույցից հետո: Դրանում ասվում էր, որ Ռուսաստանում դոպինգի օգտագործման՝ իշխանությունների կողմից արտոնագրված համակարգ կա:

Ավելի ուշ Ռուսական հակադոպինգային գործակալության նախկին ղեկավար Գրիգորի Ռոդչենկովը հաստատել է ՀՀԴԳ հանձնաժողովի արած եզրակացությունները և հաղորդել ռուս մարզիկների կողմից Լոնդոնի և Սոչիի Օլիմպիադաներում դոպինգի կիրառման նոր մասնրամասներ:

2016թ-ի մայիսին հատուկ խումբ է ստեղծվել կանադացի սպորտային իրավաբան Ռիչարդ Մակլարենի ղեկավարությամբ Ռոդչենկովի հայտարարությունների հետաքննման համար: Մակլարենի զեկույցի արդյունքներով՝ Միջազգային օլիմպիական կոմիտեն ռուսական հավաքականին թույլ չտվեց մասնակցել 2016թ-ի Պարաօլիմպիադային Ռիո դե Ժանեյրոյում:

Ռուսաստանի օլիմպիական կոմիտեի ղեկավար Ալեքսանդր Ժուկովը համարում է, որ ՌՈւՍԱԴԱ-ի իրավունքները չվերականգնելու ՀՀԴԳ որոշումը չի խանգարի «մաքուր» ռուս մարզիկներին մասնակցել Պխենչխանի Օլիմպիադային:

2018թ-ի Օլիմպիական խաղերին Ռուսաստանի հավաքականի մասնակցության մասին որոշումը կայացնելու է ՄՕԿ-ը: Ավելի վաղ

The New York Times թերթը գրել էր այն մասին, որ ՄՕԿ ղեկավարությունը Ռուսաստանի դեմ պատժամիջոցների տարբերակներ է դիտարկում դոպինգային սկանդալի կապակցությամբ: Սակայն հնարավոր տարբերակներում (ազգային հիմնի կատարման արգելք, ռուս մարզիկների ելույթը չեզոք դրոշի ներքո, չեզոք համազգեստով) Օլիմպիադային Ռուսաստանի հավաքականի ամբողջական հեռացում չի եղել: