«Քլինթոնի դեմ ռուսներից կոմպրոմատ ստանա՞լ: Դա ինձ շատ է դուր գալիս»,- Դոնալդ Թրամփի որդի

ԱՄՆ-ում նոր թափ է հավաքում նախագահ Թրամփի որդու՝ Դոնալդ Թրամփ-կրտսերի շուրջ սկանդալը, հաղորդում է The New York Times-ը:

Նախորդ տարվա հունիսին՝ նախընտրական արշավի թեժ պահին, նա հանդիպում է անցկացրել ռուսաստանցի փաստաբան Նատալյա Վեսելնիցկայայի հետ, որը պնդում էր, որ Հիլարի Քլինթոնին՝ Թրամփի մրցակցին, վարկաբեկող նյութեր ունի:

Թրամփ-կրտսերը չի հերքում հանդիպման փաստը, սակայն պնդում է, որ ոչ մի վարկաբեկող նյութեր Վեսելնիցկայան չի ունեցել:

Ինքը Նատալյա Վեսելնիցկայան նույնպես հերքում է, որ այդ հանդիպմանը քննարկվել են ամերկյան նախագահական ընտրություններն ու դրա մասնակիցները:

Սակայն The New York Times-ն իր ընթերցողներին այլ վարկած է առաջարկում: Թերթի տվյալներով՝ հանդիպմանը խոսքը գնացել է հենց Հիլարի Քլինթոնի դեմ կոմպրոմատի մասին: Ավելին, Թրամփ-կրտսերն իմացել է, որ այդ կոմպրոմատի աղբյուրը ռուսական կառավարությունն է եղել: Հանդիպման մասնակցիները քննարկել են նաև «Մագնիտսկու ցուցակի» մասին հարցը (Ռուսաստանի քաղաքացիների ցուցակ, որոնց դեմ ԱՄՆ-ում պատժամիջոցներ են գործում, որոնք կապված են ռուս պաշտոնատար անձանց մասնակցությամբ բազմամիլիարդանոց աֆերան բացահայտած իրավաբան Սերգեյ Մագնիտսկու սպանությանը նրանց մասնակցության հետ):

Ա  յդ հանդիպման նախաձեռնությունն Ադրբեջանի նախագահի նախկին փեսա (նրա ավագ դստեր՝ Լեյլայի ամուսինն է եղել), ռուս երգիչ Էմին Աղալարովինն է եղել, որը լավ ծանոթ է Վեսելնիցկայայի հետ: Իր հերթին, նրա հայրը՝ գործարար Արաս Աղալարովը ծանոթ է Թրամփ-կրտսերի հետ, որի հետ նրանք 2013թ-ին Մոսկվայում «Միսս տիեզերք» մրցույթն են անցկացրել:

Արաս Աղալարովն ընդհանրապես Ռուսաստանի ամենահարուստ մարդկանց հարյուրյակի մեջ է: Նա ծնվել է Բաքվում և Մոսկվա տեղափոխվել 1980-ականների կեսերին:

Իր բիզնեսը՝ Crocus Group խորհրդային-ամերիկյան համատեղ ձեռնարկությունը, նա ստեղծել է 1989թ-ին (երբ նման գործունեությունը պաշտոնապես համակարգվում էր ԽՍՀՄ հատուկ ծառայությունների կողմից):

Նրա տղան՝ Էմինը, հորն է օգնում բիզնեսի հարցում և միաժամանակ երաժշտությամբ զբաղվում, համերգային գործունեություն է վարում որպես էստրադային կատարող:

Աղալարովների ընտանիքի հետաքրքրությունների ոլորտը շինարարությունն է, առևտուրն ու շոու-բիզնեսը: Կատարողների թվում, որոնց պրոդյուսերներն են Աղալարովները, Սոսո Պավլիաշվիլին է: