Ադրբեջանում ձերբակալել են լրագրող Շահին Ռզաևին
Քաղաքական ձերբակալություններ Ադրբեջանում
Բաքվում վարչական ընթացակարգով ձերբակալվել է հայտնի լրագրող և կոնֆլիկտների լուսաբանման փորձագետ Շահին Ռզաևը։ Ըստ պաշտոնական տեղեկատվության՝ նա մեղադրվում է մանր խուլիգանության մեջ։ Թեև հասցրել է ընկերներին հայտնել, որ իրեն ձերբակալել են սոցցանցում հրապարակած գրառման պատճառով։
- Abzas Media-ի գործով վեցերորդ ձերբակալությունն Ադրբեջանում
- Փաշինյանը Բաքվին սպառազինությունների վերահսկում է առաջարկում․ իրագործելի՞ է
- Ակցիա Վրաստանում. ակտիվիստին մեղադրում են Ստալինի պատկերով «սրբապատկերն անարգելու» մեջ
Հարազատների հաղորդմամբ՝ լրագրող Շահին Ռզաևին ոստիկանությունը բերման է ենթարկել հունվարի 15-ին կեսօրին Սուրախանի գյուղում՝ իր տան մոտ, երբ գնալիս է եղել մոտակա մթերային խանութ։ Այնուհետ նա ընկերներին ասել է, որ իրեն ձերբակալել են սոցիալական ցանցում հրապարակած գրառման համար, սակայն չի հասցրել հստակեցնել, թե կոնկրետ որ գրառման մասին է խոսքը։ Նրա ֆեյսբուքյան էջի վերջին երկու օրվա բոլոր գրառումները ջնջված են։
Ռզաևի հետ կապն ընդհատվելուց մի քանի ժամ անց Ադրբեջանի ՆԳՆ մամուլի ծառայությունը, պատասխանելով լրագրողների հարցմանը, հաստատել է նրա ձերբակալության լուրը։ Պարզվել է, որ ձերբակալությունից մի քանի ժամ անց նա դատարանի առջև է կանգնել։
Սուրախանի շրջանային դատարանի որոշմամբ՝ Շահին Ռզաևը դատապարտվել է 15-օրյա վարչական կալանքի։ Նրան մեղադրանք է առաջադրվել վարչական իրավախախտումների մասին օրենսգրքի 510 (թեթև վնաս պատճառելը) և 535.1 (ոստիկանության օրինական պահանջին չենթարկվել) հոդվածներով։
Պնդում են, թե լրագրողը փողոցում հայհոյել է, իսկ ոստիկանները նրանից կարգապահական տույժ են պահանջել, սակայն նա ուշադրություն չի դարձրել։ Նա բերման է ենթարկվել Սուրախանի շրջանի ոստիկանության 31-րդ բաժին։
Հարազատների խոսքով՝ Շահին Ռզաևի ձերբակալության և դատավարության մասին ընտանիքի անդամները տեղեկացված չեն եղել։ Նա դատարան է ներկայացել պետության տրամադրած փաստաբանի հետ։ Լրագրողն ընդգծել է, որ վարչական իրավախախտման արձանագրության մեջ գրվածը սուտ է, ինքը չի հայհոյել, անհնազանդություն չի ցուցաբերել։
Շահին Ռզաևը մեծ փորձ ունեցող լրագրող է։ Նա հայտնի է իր ներգրավվածությամբ քաղհասարակության բազմաթիվ տարածաշրջանային նախագծերում, որոնք ուղղված են Հարավային Կովկասում խաղաղության հաստատմանը: Մոտ 15 տարի նա ղեկավարել է Պատերազմի և խաղաղության լուսաբանման ինստիտուտի (IWPR) ադրբեջանական գրասենյակը։ Նա նաև JAMnews-ի թղթակիցն է եղել: Կոնֆլիկտների լուսաբանման վերաբերյալ դասընթացներ է անցկացրել։
Ժամանակ առ ժամանակ Ռզաևը Ադրբեջանի իշխանությունների հասցեին քննադատություններ է հնչեցրել։
