Վրաստան․ ընդդիմությունը նոր հանրահավաքի է կանչում, իշխանությունները խոսում են քրեական գործեր հարուցելու մասին

Վրաստանում միացյալ ընդդիմության առաջնորդներն իրենց կողմնակիցներին կոչ են արել նոյեմբեր 9-ին ժամը 18:00-ին հավաքվել Թբիլիսիի Ռուսթավելու անվան կենտրոնական պողոտայում՝ հոկտեմբերի 31-ին կայացած խորհրդարանական ընտրությունների կեղծման դեմ բողոքի ցույցը շարունակելու։

Նախօրեին՝ նոյեմբերի 8-ին, Թբիլիսիում մասշտաբային հանրահավաք անցկացվեց, որն ավարտվեց ուշ երեկոյան, երբ այն երկու անգամ ցրվեց՝ ջրցանների և արցունքաբեր գազի կիրառմամբ։ Մի քանի մարդ տուժեց և հիվանդանոց ընկավ, այդ թվում՝ «Թի-Վի Պիրվելի» և «Ֆորմուլա» հեռուստաալիքների լրագրողները։

• Հազարավոր մարդիկ Թբիլիսիում բողոքում են ընտրությունների կեղծման դեմ։ Ֆոտոռեպորտաժ
• Ընտրություններ Վրաստանում․ հաշվարկ, ցույցեր, բոյկոտ

Իշխանություններն ընդդիմության առաջնորդներին մեղադրել են անկարգությունների կազմակերպման համար և խոստանում են քրեական գործեր հարուցել նրանցից մի քանիսի դեմ։

Ցույցի տուժած մասնակից Թբիլիսիում, 2020 թ-ի նոյեմբերի 8

Վրաստանի իշխանության դիրքորոշումը

Իշխող «Վրացական երազանք» կուսակցության գործադիր քարտուղար Իրակլի Կոբախիձեն նոյեմբերի 8-ին ուշ երեկոյան ճեպազրույց անցկացրեց, որի ժամանակ փաստացի մեղադրանք առաջադրեց «Միասնական ազգային շարժման» (հիմնադիրը նախկին նախագահ Միխեիլ Սաակաշվիլին է) առաջնորդներից մեկի՝ Նիկա Մելիայի դեմ։

• Խորհրդարանական ընտրություններ-2020 Վրաստանում։ Ի՞նչ է պետք իմանալ դրանց մասին

«Հենց Մելիան է գլխավորել խորհրդարանի գրոհի փորձը 2019 թ-ի հունիսի 20-ին։ Այս միջադեպի առնչությամբ քրեական գործը շարունակվում է։ Եվ այս անգամ նույնպես նա ու իր համախոհները [Կենտրոնական ընտրական հանձնաժողովի] գրոհի նախաձեռնողներն էին»։

Կոբախիձեն հայտարարել է, որ «Վրաստանում շուտով կգան ժամանակներ, երբ քաղաքականությամբ կսկսեն զբաղվել քաղաքական գործիչները, հանցագործները բանտ կնստեն՝ օրենքին համապատասխան», և բոլորին կոչ է արել «զերծ մնալ հակաօրինական գործողություններից»։

Ի՞նչ է ասում ընդդիմությունը

Նիկա Մելիան, իր հերթին, ասել է, որ իշխող կուսակցության առաջնորդ, օլիգարխ և Վրաստանի ստվերային ղեկավար Բիձինա Իվանիշվիլին «ստախոս, զեղծարար և անգամ հանցագործ է»։

Նիկա Մելիան՝ «Միասնական ազգային շարժման» առաջնորդներից մեկը

«Մենք բոլորս ուզում ենք, որ մեր երեխաներն ապրեն ազատ Վրաստանում, առանց ճնշումների և բռնության, այդ պատճառով էլ [նոյեմբերի 9-ի հանրահավաքին] պետք է հավաքվի ողջ ժողովուրդը, այլ ոչ միայն ընդդիմությունը», — լրագրողներին նոյեմբերի 8-ին ուշ երեկոյան հայտարարել է Նիկա Մելիան Թբիլիսիում հանրահավաքը ցրելուց հետո։

Նոյեմբերի 8-ի հանրահավաքը ցրելիս տուժել է «Պիրվելի Թի-Վի» հեռուստաընկերության օպերատորը

«Անհամաչափ ուժ է կիրառվել»․ Վրաստանի ժողովրդական պաշտպանի հայտարարությունը

Վրաստանի ժողովրդական պաշտպան Նինո Լոմջարիան Թբիլիսիի ԿԸՀ շենքի մոտ կատարվող իրադարձությունների վայրում է եղել նոյեմբերի 8-ի երեկոյան։

Նա կառավարությանը մեղադրել է, որ հանրահավաքի ցրումը սկսվել է առանց զգուշացման, իսկ դա միջազգային չափանիշների խախտում է։

Նա հայտարարել է նաև, որ ոստիկանությունն անհամաչափ ուժ է կիրառել մի իրավիճակում, երբ «մարդկանց մեծ, ագրեսիվ և զինված զանգված» չի եղել։

«Նման իրավիճակում և ցուրտ եղանակին ջրցանների կիրառումը կարելի է հավասարեցնել դաժան վերաբերմունքի», — ասել է Լոմջարիան։

Նա կառավարությանն ու ընդդիմությանը կոչ է արել բանակցություններ սկսել։

Վրաստանում կորոնավիրուսով վարակման դեպքերի կտրուկ աճ և պարետային ժամ

Վրաստանում պահպանվում է ծանր համաճարակային իրավիճակը։ Ամեն օր մինչև երեք հազար նոր դեպք է հաստատվում,  առողջապահական համակարգը չի կարողանում ամբողջությամբ վերահսկել իրավիճակը։ Սոցցանցերում շատերը գրում են, որ չեն կարողանում բուժօգնություն ստանալ նույնիսկ հեռախոսով։

Նոյեմբերի 9-ից Թբիլիսիում և ևս վեց խոշոր քաղաքներում պարետային ժամ է սահմանվել․ արգելված է փողոց դուրս գալ ժամը 22:00-ից մինչև 05:00-ն։

Վրաստանում 2020 թ-ի հոկտեմբերի 31-ին անցկացված խորհրդարանական ընտրությունների մասին

Ըստ հոկտեմբերի 31-ին Վրաստանում անցկացված խորհրդարանական ընտրությունների պաշտոնական արդյունքների՝ «Վրացական երազանքը» երրորդ անգամ է իշխանության մնում։ Ստացած բացարձակ առավելությունը նրան թույլ է տալիս ինքնուրույն նշանակել կառավարության անդամներին։

Սակայն 2012 թ-ին «Վրացական երազանքի» իշխանության գալուց ի վեր առաջին անգամ է ընդդիմությունը ձայների զգալի տոկոս հավաքում։

1. Իշխող «Վրացական երազանքը» հավաքել է 48,24 տոկոս ձայն,
2. «Ազգային շարժում – Միացյալ ընդդիմությունը»՝ 27,15 տոկոս ձայն,
3. «Եվրոպական Վրաստանը»՝ 3,79 տոկոս ձայն,
4. «Հայրենասերների դաշինքը»՝ 3,14 տոկոս ձայն,
5. «Լելոն»՝ 3,16 տոկոս ձայն,
6. «Աղմաշենեբելիի ռազմավարությունը»՝ 3,15 տոկոս,
7. «Գիրչին»՝ 2,89 տոկոս,
8. «Քաղաքացիներ – Ալեկո Էլիսաշվիլին»՝ 1,33 տոկոս։

Ընդդիմությունը հայտարարել է, որ իշխանությունները կեղծել են ընտրությունների արդյունքները։ Բոլոր յոթ ընդդիմադիր կուսակցությունները, որոնք խորհրդարան են անցել, հրաժարվել են այդ տեղերից և պահանջում են նոր խորհրդարանական ընտրություններ անցկացնել։

• Վրաստանի ընտրություններում գրանցված խախտումները դրանց արդյունքների չեղարկման համար հիմք չեն տալիս․ ԱՄՆ դեսպանատուն
• «Նոր ընտրություններ ենք պահանջում»․ Թբիլիսիում ցույց է անում ընդդիմությունը։ Ֆոտոռեպորտաժ

Խոսքը ձայների ոչ մեծ տոկոսի մասին է, որն, ինչպես պնդում է ընդդիմությունը, նրանից գողացել են։ Սակայն հենց այդ տոկոսն իշխող կուսակցությանը պետք է հնարավորություն չտար ինքնուրույն կառավարություն ձևավորել։

Ընդդիմությունն ընտրատեղամասերից մի քանի արձանագրություն է ներկայացրել՝ թվերի սխալներով։ Օրինակ՝ կան արձանագրություններ, որտեղ «Երազանքն» ավելի շատ ձայն ունի, քան ընտրողների միջին թիվը։

Ընդդիմությունն ու հասարակական կազմակերպությունները հայտարարում են նաև ընտրակաշառք բաժանելու և ընտրողներին վախեցնելու բազում դեպքերի մասին։ Այս մասին է հայտարարել նաև Վրաստանի ժողովրդական պաշտպանը։

Սակայն միջազգային դիտորդները չեն սատարում ընտրությունների նման գնահատականները։ ԵԱՀԿ դիտորդների, ինչպես նաևՎրաստանում ԱՄՆ դեսպանատան հայտարարության համաձայն՝ Վրաստանում, թեև ընտրություններն անթերի չէին, ընտրողներին վախեցնելու և ընտրակաշառք բաժանելու դեպքեր են եղել, սակայն հիմնական ազատությունները պահպանվել են։

Վրաստանում 2019 թ-ի գարնանն ու ամռանը տեղի ունեցած ցույցերի մասին․ տեսանյութ և վերլուծություն

• Այն ամենն, ինչ պետք է իմանալ Թբիլիսիի ցույցերի մասին․ երեք րոպեանոց տեսանյութ
• Վրաստանում 150 բողոքի ակցիա կես տարում։ Ովքե՞ր են դրանց առաջնորդները։ Տեսանյութ
• Նրա աչքը վնասել են Թբիլիսիի ցույցի ժամանակ, սակայն նա շարունակում է հանրահավաքների մասնակցել։ Ինչո՞ւ։ Տեսանյութ