Երևանում տրանսպորտի ուղեվարձ չվճարողներն այսուհետ կտուգանվեն
Տուգանք Երևանի տրանսպորտում չվճարելու համար
Հայաստանի մայրաքաղաքի հանրային տրանսպորտում այսօրվանից հսկողական աշխատանք է իրականացնելու հասարակական կարգի պահպանության ծառայությունը։ Տեսուչները շրջելու են տրանսպորտային միջոցներում և հատուկ սարքի միջոցով ստուգելու են՝ քաղաքացին վճարե՞լ է երթի համար, թե՞ ոչ։
Եթե ուղևորն ունի տոմս, բայց այն չի վավերացրել վալիդատորով, կտուգանվի 3000 դրամով։ Առհասարակ չվճարելու դեպքում տուգանքի չափը կլինի 10․000 դրամ, արտոնյալ խմբերի ուղետոմսն այլ անձի կողմից օգտագործելու պարագայում՝ 15․000 դրամ։
«Հսկողության նպատակը տուգանքների տեսքով գումարի հավաքագրումը չէ»,- վստահեցնում է Երևանի քաղաքապետի տեղակալ Սուրեն Գրիգորյանը։
Մայրաքաղաքի բնակիչներից շատերը, սակայն, չեն կիսում այդ կարծիքը։ Պնդում են՝ քաղաքացիներին դարձրել են «տուգանքի օբյեկտ»։ Իսկ նրանք, ովքեր պատրաստ են վճարել ստացած ծառայության դիմաց, դժգոհում են առաջացող տեխնիկական խնդիրներից։ Օրինակ՝ բանկային քարտով հնարավոր է վճարել միայն մեկ անձի համար, երկուսով երթևեկելու պարագայում վալիդատորը տվյալ քարտից վճարում է ընդունում միայն 30 րոպե անց։
- 60 զոհ՝ երեք ամսում․ ՃՏՊ-ների մտահոգիչ պատկեր Հայաստանում
- Ինչո՞ւ է աղմուկի մակարդակն այդքան բարձր Հայաստանում, ինչպե՞ս պայքարել դրա դեմ. կարծիքներ
- Երևանի տրանսպորտը` դժվար լուծվող խնդիր: Առաջարկներ փորձագետից
Օգոստոսի 1-ից թղթային QR կոդերով վճարել հնարավոր չէ
Քաղաքացիները նախկինում թղթային ուղետոմսեր էին ձեռք բերում Telcell տերմինալներից։ Այժմ, սակայն, այդ տարբերակը չի գործում։ Հասարակական տրանսպորտից օգտվելու համար նրանք պետք է վճարեն՝
- տրանսպորտային քարտով,
- Telcell բջջային հավելվածով,
- բանկային քարտով։
Տրանսպորտային քարտն արժե 500 դրամ։ Այն գնելուց հետո քաղաքացին կարող է երթևեկել մեկ անգամ (1 երթի արժեքը 150 դրամ է), այնուհետև պետք է լիցքավորի քարտը։
Փոխքաղաքապետ Սուրեն Գրիգորյանի խոսքով՝ վերջին օրերին 500-դրամանոց տրանսպորտային քարտերի պահանջարկը մեծացել է:
«Օգոստոսի 1-ին վաճառվել է 8530 տրանսպորտային քարտ, հուլիսի վերջին օրերին այդ թիվը չէր անցնում 1000-ը»,- տեղեկացրել է նա։
2025 թ․- փետրվարից ՀՀ-ում ներդրվել է հանրային տրանսպորտի միասնական տոմսային համակարգ։ Մինչ այդ 1 ուղևորափոխադրման արժեքը 100 դրամ էր, այժմ՝ 150 դրամ։ Բացի այդ, գործում են տարբեր փաթեթներ` 1 օր-ից մինչև 1 տարի։ Օրինակ՝ 1 ամսվա անսահմանափակ փաթեթի արժեքը 9000 դրամ է, 1 տարվանը՝ 90․000 դրամ։
Կան առանձին խմբեր, որոնց համար սահմանվել են արտոնություններ, մասնավորապես՝
- 20% զեղչ՝ 8-17 (ներառյալ) տարեկան Երևան քաղաքի հիմնական և ավագ դպրոցների աշակերտներ,
- 15% զեղչ՝ Երևան քաղաքի ուսումնարանների, քոլեջների և բարձրագույն ուսումնական հաստատությունների ուսանողներ (սովորողներ),
- 30% զեղչ՝ 63 տարին լրացած կենսաթոշակառուներ,
- 20% զեղչ՝ անապահովության նպաստառուներ։
Տրանսպորտից անվճար օգտվելու իրավունք ունեն մինչև 7 (ներառյալ) տարեկան երեխաներ (առանց տրանսպորտային քարտի), ծերանոցներում, մանկատներում ապրող պետական լրիվ խնամքի տակ գտնվող անձինք, ֆունկցիոնալության խորը և ծանր աստիճանի սահմանափակում ունեցող անձինք (հաշմանդամության 1-ին, 2-րդ խումբ, կամ միջին աստիճանի սահմանափակում, 3-րդ խումբ՝ զինվորական ծառայության հետ պատճառական կապով), Երևան քաղաքում հաշվառված 4 և ավելի երեխա ունեցող ծնողները, 5 և ավելի երեխա ունեցող ծնողները, ծնողազուրկ աշակերտներն ու ուսանողները, ԼՂՀ կամ ՀՀ պաշտպանության մարտական գործողությունների ընթացքում զոհված կամ ծառայողական պարտականությունները կատարելիս անհայտ կորած կամ անհայտ բացակայող կամ մահացած ճանաչված անձանց ընտանիքի անդամները (այրի, անչափահաս երեխաներ, ծնողներ) և այլ խմբեր։
7 տարեկանից բացի բոլոր քաղաքացիների համար տրանսպորտային քարտի առկայությունը և վավերացումը պարտադիր են՝ անկախ արտոնությունից։
«Երբեմն իմիտացիա են ստեղծում, թե ուզում են վճարել»․ փոխքաղաքապետ
Երևանի քաղաքապետի տեղակալ Սուրեն Գրիգորյանի փոխանցմամբ՝ հսկողության նպատակը ոչ թե քաղաքացիներին տուգանելն է, այլ անել այնպես, որ նրանք վճարեն ուղեվարձը։
«Բնականաբար, մոտեցումն անմիջապես տուգանելը չէ։ Մենք պետք է մաքսիմալ հավաստիացած լինենք, որ մարդիկ չարամտորեն չեն դա իրականացնում, որի դրսևորումներ շատ կան»,- լրագրողների հետ զրույցում նկատել է նա։
Գրիգորյանն անդրադարձել է նաև վճարումն ընդունող սարքերի խափանումների վերաբերյալ դժգոհություններին։ Նկատել է՝ քաղաքապետարանում մի քանի օր ուսումնասիրել են QR ուղետոմսերը, որոնցով փորձել են վճարում իրականացնել համակարգի անսարքությունից բողոքող քաղաքացիները։
Ասում է՝ պարզ է դարձել, որ քաղաքացիները փորձել են վճարել վավերականության ժամկետն (3 օր) անցած կամ արդեն իսկ օգտագործված տոմսերով։
«Քաղաքացին իմիտացիա է ստեղծում, որ ինքը ցանկանում էր վճարել, բայց համակարգը չի աշխատում, մինչդեռ համակարգի հետ ամեն ինչ կարգին է։ Այս բոլոր դեպքերը բացահայտելու հնարավորություն ունենք և շարունակաբար ունենալու ենք»,- արձանագրել է քաղաքապետի տեղակալը։
Ինչի՞ց են դժգոհում ուղևորները․ մեկնաբանություններ սոցցանցերից
«Հլը տեսնեմ էս հսկիչները սեպտեմբերից օրվա պիկ ժամերին ոնց են կարողանալու մտնել մեծ ուղևորահոսքի մեջ ու տուգանել»։
«Չուգունե մոտեցում։ Նույն քարտով երկրորդ անձի տրանսպորտային վճարում կատարելու համար 30 րոպե ինտերվալ է պե՞տք։ Մտածելու տեղիք չի՞ տալիս նման մոտեցումը»։
«Ասենք՝ ես և մայրիկս նստում ենք ավտոբուս և ցանկանում ենք վճարել երկու տոմսի արժեքը մեկ քարտով։ Ինչո՞ւ պետք է սպասենք կես ժամ, որպեսզի կարողանանք երկրորդ վճարումը կատարել։ Սա ակնհայտորեն ոչ արդյունավետ և քաղաքացիների համար շատ անհարմար լուծում է»։
«Ինչի՞ համար վճարեն, որ 40 րոպեից ավել շոգին սպասում են կանգառներում արևի տակ։ Կարծես անմարդաբնակ կղզում լինես, մի հատ տրանսպորտ չկա։ Եթե սա բարեփոխո՞ւմ է, բա իրական բարեփոխումն ի՞նչ տեսք ունի»։
«Ես կողմ եմ վճարմանը, բայց եթե քարտը պահում եմ ապարատի մոտ և գումարը չի տանում, քարտի մեջ էլ փող կա, էդ դեպքում ո՞վ ա մեղավոր»։
«Ձեր «խելացիներին» ասեք, որ տոմսերի վրա ժամկետ չդնեն, այլ որքան գնես, այնքան երթևեկես։ Ի՞նչ կապ ունի ժամանակը, չէ՞ որ վճարել եմ, թե՞ կողոպուտի լավ ձև է։ Եթե ժամկետը հանեք, ավելի շատ մարդ քարտ կգնի, այլապես ինչու վճարեն ու չօգտագործեն, այն էլ 50 տոկոսով անիմաստ թանկացած տոմսերը»։
Հետևեք մեզ — Facebook | Youtube | Telegram
Տուգանք Երևանի տրանսպորտում չվճարելու համար
