Տեղական ու հյուր ռոբոտների ցուցահանդես
Երևանում բացվել է «Ռոբոտների շքերթ» ցուցահանդեսը:
Այստեղ կարելի է շփվել ռոբոտ Բորիսի հետ, որը ոչ միայն բարեկամաբար ողջունում է հյուրերին, այլ նաև հաճոյախոսություններ է անում աղջիկներին, երգում ու պարում նրանց համար:
Կազմակերպիչները՝ ռուսական «Ռոբոտների կորպորացիա» ընկերությունն ու «Ամերիաբանկը» մտադիր են Երևանի երեխաներին ու նրանց ծնողներին ծանոթացնել տարբեր երկրներից ժամանած ավելի քան 20 ինտերակտիվ ռոբոտների հետ և ներկայացնել Հայաստանում ստեղծված լավագույն ռոբոտներին:
Էքսկուրսավարները այցելուներին պատմում են, թե ինչ է կարողանում անել այս կամ այն ռոբոտը, առանձնահատուկ ուշադիր են երեխաների, երիտասարդների նկատմամբ: Նախագծի նպատակը ոլորտի զարգացումն է, այդ պատճառով էլ երեխաներին ոչ միայն թույլ են տալիս ռոբոտների հետ թենիս, բասկետբոլ կամ ֆուտբոլ խաղալ, նայել, թե ինչպես են նրանք չարաճճիություններ անում, կոկտեյլներ պատրաստում ու մատուցում հաճախորդներին, պարում ու դայակի դեր կատարում, այլ նաև հնարավորություն են տալիս վարպետության դասերի մասնակցել, սովորել, թե ինչպես են ստեղծում ռոբոտներին և ինչպես դա անել սեփական ձեռքերով:
Ցուցահանդեսի ամենասիրված նմուշը Դերեվյակա փայտե ռոբոտն է, որը երազում է դառնալ երկաթե և փող է հավաքում այդ նպատակի համար: Նա ժլատների վրա ջղայնանում է, իսկ առատաձեռն մարդկանց համար երգեհոնիկ է նվագում:
«Ռոբոտների շքերթ» առաջին ցուցահանդեսը Մոսկվայում անցկացվել է 2014թ.: Կազմակերպիչները մեկնարկը հաջող են համարել և շարունակել երթը ռուսական քաղաքներով (Սանկտ Պետերբուրգ, Սոչի, Կրասնոդար, Եկատերինբուրգ) և հասել են Երևան՝ մոտ մեկ ամսով: Կազմակերպիչները կարծում են, որ «Ռոբոտների շքերթը» ոչ միայն զվարճանք է, այլ նաև երեխաների համար օգտակար ժամանց: Երևանցի ծնողներն էլ, որոնք ակտիվորեն միացել էին ռոբոտների հետ խաղին, արդեն կիսում էին այդ կարծիքը:
