«Ձեր կեղտոտ ձեռքերը հեռու տարեք Georgian Airways-ից»․ սկանդալ Վրաստան-ՌԴ չվերթների շուրջ
Վրացական Georgian Airways ավիաընկերության հայտարարությունը
«Ձեր կեղտոտ ձեռքերը հեռու տարեք Georgian Airways-ից»,- այսպես է սկսվում պաշտոնական նամակը, որը վրացական ավիաընկերությունը հրապարակել է իր ֆեյսբուքյան էջում՝ իր աշխատակիցների անունից։
Այս գրառմամբ ավիաընկերությունը պատասխանել է Ռուսաստանի և Վրաստանի միջև ուղիղ չվերթները վերականգնելու որոշմանը հաջորդած քննադատությանը։
Այն բանից հետո, երբ ՌԴ նախագահ Վլադիմիր Պուտինը որոշեց վերականգնել դեպի Վրաստան ուղիղ չվերթները և Վրաստանի քաղաքացիների համար առանց վիզայի ռեժիմը, Georgian Airways-ը որոշեց ուղիղ չվերթներ իրականացնել դեպի Ռուսաստան։ Georgian Airways-ը պլանավորում է մայիսի 20-ից սկսած վաճառել Թբիլիսի-Մոսկվա չվերթի տոմսեր։
Այս որոշման պատճառով ավիաընկերության ֆեյսբուքյան էջում հայտնվեցին բազմաթիվ մեկնաբանություններ, որոնցում Georgian Airways-ին մեղադրում են դավաճանության մեջ և կոչ են անում բոյկոտել այն։ Հազարավոր բացասական մեկնաբանություններից հետո ընկերությունը սահմանափակեց մեկնաբանություններ թողնելու իրավունքը և ի պատասխան պաշտոնական նամակ հրապարակեց։
Նամակում «Georgian Airways»-ը քննադատաբար տրամադրված քաղաքացիներին անվանում է «աութսայդերներ», «սրիկաներ, ովքեր ամեն ինչ կանեն երկու կոպեկի դիմաց» և «զավեշտալի ոչնչություններ», որոնք վերահսկվում են օտար երկրների կողմից։
Ավիաընկերությունը գրում է, որ չի հանդիսանում քաղաքական կազմակերպություն, իսկ թռիչքները վերսկսելու որոշումը կայացրել են երկու երկրները։
Ավիաընկերությունը նաև գրում է, որ չվերթների վերականգնումը ժողովրդի ցանկությունն է, և իրենք կատարում են նրա պատվերը.
«Մենք վրաց ժողովրդի շահերին ենք ծառայել նույնիսկ պատերազմի պայմաններում, ծառայելու ենք նրան նաև խաղաղության ժամանակ»։
Նամակում ընկերությունը քաղաքացիներին հիշեցրել է, որ մասնակցել է 1992-93 թվականներին Աբխազիայում և 2008 թվականին Հարավային Օսիայում տեղի ունեցած ռազմական գործողություններին և անձնուրացության համար արժանացել պետական պարգևների։
«2008 թվականի պատերազմի ժամանակ Georgian Airways-ը միակ ավիաընկերությունն էր, որը չդադարեցրեց թռիչքները և Վրաստան հասցրեց հարյուրավոր օտարերկրյա լրագրողների և քաղաքական գործիչների, որոնք ամբողջ աշխարհին ցույց տվեցին վրաց ժողովրդի ողբերգությունը»,- ասված է նամակում։
Georgian Airways-ը իր դեմ արշավ իրականացնելու մեջ մեղադրում է «արտերկրից ուղարկված ուժերին».
«Անզեն աչքով էլ տեսանելի է, որ այս կեղտոտ արշավի հետևում կանգնած են ուժեր, որոնք պատրաստ են դեմ գնալ սեփական երկրի և ժողովրդի շահերին՝ արդարացնելու համար դրսից ստացած դրամաշնորհները։
Դիմում ենք սադրիչներին. դուք սա համարո՞ւմ եք հայրենիքի դավաճանություն։ Սակայն, դատելով ձեր հայտարարություններից, դա զարմանալի չէ։
«Մենք քաղաքականությամբ զբաղվող սրիկաներին ասում ենք՝ մենք չենք վախեցել թշնամու հրետանուց, տանկերից և ռազմական ինքնաթիռներից, և առավել ևս չենք վախենա ձեր զավեշտական հնարքներից»: Անգամ չմտածեք ավիաընկերության դեմ որևէ սադրանք իրականացնելու մասին, այլապես կստանաք օրենքով նախատեսված ամենակոշտ պատասխանը»։
Ավիաընկերության այս հայտարարությանը հետևել են բազմաթիվ բացասական արձագանքներ։ Ֆեյսբուքի օգտատերերին ցնցել է ոչ նորմատիվային արտահայտություններ պարունակող տեքստը։ Ոմանք ենթադրել են, որ նման տեքստը չէր կարող պաշտոնական լինել, և հնարավոր է՝ ավիաընկերության էջը կոտրել են: Սակայն տեքստի հայտնվելուց մի քանի ժամ անց էլ ավիաընկերության ներկայացուցիչները մեկնաբանություններով հանդես չեն եկել։
Facebook-ում ավելի քան 5000 մեկնաբանությունների մեծ մասը զայրույթ և ծաղր է արտահայտում.
«Հուսով եմ՝ կսնանկանաք, դավաճաններ»։
«Georgian Airways-ի օդանավ, գնա ․․․ »։
«Ի՞նչ է այս տեքստը։ Ինչպե՞ս եք համարձակվում վիրավորել մարդկանց: Ո՞վ է գրել այս անհեթեթությունը, որը տարածում եք»։
«Դուք՝ դավաճաննե՛րդ, երբ հիշատակում եք Աբխազիան և օգոստոսյան պատերազմը, պատահական չէ՞, որ այն ժամանակ ագրեսորը հենց Ռուսաստանն էր»։
Վրացական Georgian Airways ավիաընկերության առաջին ուղիղ չվերթը դեպի Մոսկվա մայիսի 20-ին է։ Մեկ օր առաջ՝ մայիսի 19-ին, ռուսական «Ազիմուտ» ավիաընկերությունը կիրականացնի առաջին ուղիղ չվերթը Ռուսաստանից։ Georgian Airways-ի ուղևորները Թբիլիսիից կմեկնեն ժամը 08:00-ին և վայրէջք կկատարեն Վնուկովո օդանավակայանում 10:15-ին՝ Մոսկվայի ժամանակով:
Մեկ ուղղության տոմսն արժե 897 լարի [մոտ 350 դոլար]։
Վրացական Georgian Airways ավիաընկերության հայտարարությունը
