«Վրացական երազանքն» ընդդեմ նախագահի բրյուսելյան այցի
Վրաստանի կառավարությունը լիովին իրավունք ունի համաձայնություն չտալ նախագահ Սալոմե Զուրաբիշվիլիի այցին դեպի Բրյուսել, քանի որ իշխող թիմը «վախենում է», որ նախագահի այցը և նրա հայտարարությունները վնաս կհասցնեն Վրաստանի՝ դեպի ԵՄ ձգտումներին: Նման հայտարարություն է արել իշխող «Վրացական երազանք» խմբակցության ղեկավար Իրակլի Կոբախիձեն։
Սա է պատճառը, որ կառավարությունը համաձայնություն չի տվել նախագահ Սալոմե Զուրաբիշվիլիի բրյուսելյան այցին։ Այս մասին տեղեկություն է տարածել նախագահի աշխատակազմը։
Մայիսի 31-ին Բրյուսելում Վրաստանի նախագահը պետք է ելույթ ունենար Եվրախորհրդարանում: Զուրաբիշվիլիի այցն ի սկզբանե նախատեսված էր ապրիլի 18-ին, սակայն այն հետաձգվեց։ Ինչպես ավելի ուշ պարզաբանեցին Վրաստանի նախագահի աշխատակազմից, այցի հետաձգման պատճառ էր դարձել «համաձայնություն ստանալու՝ կառավարության կողմից արհեստականորեն ձգձգված գործընթացը»։
«Նախագահը չպետք է սպեկուլյացիայի դիմի: Ի՞նչ կապ կա Ռուսաստանի կողմից թռիչքների միակողմանի վերսկսման և նախագահի՝ այլ երկիր այցի միջև։ Սա բացարձակապես անհասկանալի համեմատություն է, սովորական շահարկում։ Ափսոս, որ նախագահի պաշտոնը զբաղեցնող մարդը սպեկուլյացիայի է դիմում: Այս ամենը ողբալի է։ Ինչ վերաբերում է այցին համաձայնություն տալուն, ապա դա կառավարության բացառիկ իրավունքն է։ Եթե կառավարությունը կարծում է, որ նախագահի այցը չի նպաստի, որ Վրաստանը ստանա թեկնածու երկրի կարգավիճակ, ապա կառավարությունը, ըստ սահմանադրության, ունի բոլոր իրավունքները նախագահի այցին համաձայնություն չտալու»,- ասել է Կոբախիձեն։
Նրա պարզաբանմամբ՝ նախագահ Սալոմե Զուրաբիշվիլիի հայտարարություններն ուղղակիորեն հակասում են դեկտեմբեր ամսին թեկնածու երկիր դառնալու Վրաստանի ցանկությանը.
«Երբ նախագահը հայտարարում է, որ խորհրդարանը միայն ֆորմալ կերպով է կատարում առաջարկությունները, թեկնածուի կարգավիճակ ստանալու համար ոչ մի քայլ չի ձեռնարկում, դրանք վարկաբեկող հայտարարություններ են։ Իհարկե, ավելի լավ կլինի, եթե նախագահը չունենա նշանակալի հարթակներ նման վարկաբեկող հայտարարություններ անելու համար, որպեսզի չխաթարի թեկնածուի կարգավիճակ ստանալու գործընթացը։ Մնացածը կառավարության իրավասությունն է՝ թույլ տալ կամ չթույլատրել նախագահին մեկնել այլ երկիր»։
Մայիսի 10-ին Վրաստանի նախագահը պահանջել էր Անվտանգության խորհրդի նիստ գումարել։ Նախագահի աշխատակազմում կայացած ճեպազրույցում Զուրաբիշվիլին ասել էր, որ պետք է դիտարկել ռուսաստանցիների համար եռամսյա վիզաներ սահմանելու հարցը։
Նրա խոսքով՝ պետական վերահսկողություն է անհրաժեշտ այն ռուսների նկատմամբ, ովքեր մուտք են գործում երկիր և մնում, պետք է նաև «որոշ միջոցներ ձեռնարկել», որպեսզի այդ ամենը տեղավորվի նորմալ քաղաքակրթական շրջանակի մեջ։
Սալոմե Զուրաբիշվիլիի կարծիքով՝ Ռուսաստանի կողմից վիզային ռեժիմի չեղարկումը և ուղիղ օդային հաղորդակցության վերականգնումը սադրանք է, որը կառաջացնի հասարակության բուռն արձագանքը։ Ըստ նրա՝ վրացական իշխանությունները չեն հասկանում, որ Ռուսաստանը զիջումներին զիջումներով չի պատասխանում։
Միաժամանակ նախագահը կոչ է արել կառավարությանը լսել «ժողովրդի, ոչ թե իշխանությունների ձայնը».
«Վստահ եմ, որ հասարակությունն այս հարցում միասնական է։ Եվ ոչ միայն այն պատճառով, որ դա կարող է վնասել կարգավիճակ ստանալուն, դա դեմ է Վրաստանի շահերին ու արժանապատվությանը։ Պետք է հիշենք, թե ով է օկուպացրել մեր տարածքները, ինչպես նաև այն մասին, որ մեր երկիրը համերաշխ է ուկրաինացի ընկերների հետ։ Սա մեր դիրքորոշումն է, և մենք պետք է մինչև վերջ հավատարիմ մնանք դրան։ Դա է հասարակության պահանջը»,- ասել է Զուրաբիշվիլին։
«Վրացական երազանքն» ընդդեմ նախագահի բրյուսելյան այցի
