Վրաստանի վարչապետ․ ցույցերը կարագացնեն կորոնավիրուսի տարածումը երկրում
«Քաղաքական ակտիվությունը, որը տեղի է ունենում փողոցներում, զգալիորեն կմոտեցնի կորոնավիրուսի գագաթնակետը մեր երկրում։ Իրավիճակն ավելի բարդ կլինի, քան սպասում էինք», — հայտարարել է Վրաստանի վարչապետ Գիորգի Գախարիան Միջգերատեսչական համակարգման խորհրդի նիստին, որն անցկացվել է տեսակոնֆերանսի ձևաչափով, վարչապետի նախագահությամբ։
«Մենք պետք է մտածենք այն մասին, թե ինչպիսին պետք է լինի գործողությունների թիրախային փաթեթը։ Խոսքը ոչ թե ողջ երկրում համակարգային, այլ թիրախային սահմանափակումների մասին է», — ասել է Գախարիան։
•Վրաստանի վարչապետի մոտ կորոնավիրուս է հաստատվել
Վարչապետն ընդգծել է բոլոր համապատասխան գերատեսչությունների առավելագույն մոբիլիզացիայի կարևորությունը՝ անհրաժեշտ միջոցների, այդ թվում՝ կետային սահմանափակումների առավել արդյունավետ կիրառման համար։
«Անհրաժեշտ է բացարձակապես բոլոր նախարարությունների և համապատասխան գերատեսչությունների լիակատար մոբիլիզացիա։ Բացի այդ, մենք, իհարկե, չենք փոխում ադապտացման ռազմավարությունը», — ասել է նա։
Կառավարության ղեկավարն ընդգծել է ինքնամեկուսացման արդյունավետությունը վարակի շղթայական տարածման դեմ պայքարում, ինչպես նաև հիվանդանոցների գերծանրաբեռնվածության կանխարգելման համար տնային բուժման կարևորությունը։
«Երբ մարդու մոտ առաջին ախտանիշներն են ի հայտ գալիս, անկախ նրանից, դրական է նրա թեստի պատասխանը, թե ընդհանրապես հասցրել է արդյոք թեստ անել, նա պետք է անհապաղ ինքնամեկուսանա, քանի որ ինքնամեկուսացումն այդ շղթան կտրելու լավագույն և ամենաարդյունավետ միջոցն է։ Շատ կարևոր է, որ բնակչությունը տանը հանգիստ բուժվելու հնարավորություն ունենա, քանի որ տնային բուժումը ամենաարդյունավետ լուծումներից մեկն է առողջապահական համակարգի գերծանրաբեռնվածության կանխարգելման համար, որպեսզի դրանից կարողանան օգտվել մարդիկ, որոնք հատուկ բժշկական ծառայությունների կարիք ունեն», — ասել է Գախարիան։
«Ինչ վերաբերում է այսպես կոչված քովիդ-հյուրանոցներին, ապա դրանք պետք է լինեն ոչ միայն ինքնամեկուսացման հնարավորություն չունեցող քաղաքացիների համար մեկուսացման վայր, այլ այստեղ պետք է առկա լինեն բուժական մենեջմենթի տարրեր», — նշել է Գիորգի Գախարիան։
«Անկախ նրանից, թե մեզնից դա ինչեր կպահանջի, անհրաժեշտ է նվազեցնել հոսպիտալացման հաճախականությունը մինչև 15%․ սա միակ և ծայրահեղ կարևոր գործոնն է, որը թույլ կտա մեզ հաղթահարել այս ճգնաժամը», — ասել է նա։
Կառավարության ղեկավարն ընդգծել է նաև հակագեների հիման վրա արագ թեստերի օգնությամբ ընդլայնված թեստավորման կարևորությունը։
«Դիմակ կրելն, ինքնամեկուսացումն ու հակագեների արագ թեստավորումն այն գործիքներն են, որոնք պետք է մեզ օգնեն հաղթահարել այս ճգնաժամը, դրա գագաթնակետը։ Մենք նաև պետք է առանձնացնենք կարևորագույն կետերը թիրախային սահմանափակումների համար։ Մեկ ամիս առաջ իրավիճակը բացարձակ այլ էր, այսօր այն փոխվել է, նկատի ունեմ քաղաքական գործընթացները փողոցներում, այդ պատճառով էլ մենք պետք է վերանայենք կետային սահմանափակումներն՝ արդյունավետության տեսակետից», — ասել է Գախարիան։
Ըստ փոխվարչապետ Մայա Ցկիտիշվիլիի՝ չի բացառվում տեղաշարժի կետային սահմանափակումը։
Ինչպես նշել է Ցկիտիշվիլին, դա կարող է երեկոյան ժամին տեղաշարժի սահմանափակում լինել, ինչպես նաև՝ հանգստյան օրերին կամ շաբաթվա որոշակի օր կամ տարբեր բնակավայրերում երթևեկության կասեցում, ինչպես նաև առևտրի կենտրոնների, մարդկանց մեծ կուտակումների վայրերի կամ շուկաների աշխատանքի ժամանակավոր կասեցում։ Որոշումները կայացվելու են՝ համաճարակային իրավիճակին համապատասխան։
«Բոլորը պետք է լավ հասկանան, որ սահմանափակումների սահմանումը կամ չեղարկումը կախված է մեզնից յուրաքանչյուրից, թե որքան լավ կկատարենք մենք մեր խնդիրը, որքան ճշգրիտ կհետևենք հրահանգներին», — ասել է Ցկիտիշվիլին։
Ներկա պահին Վրաստանում հաստատվել է վարակման 49,218 դեպք։
Նրանցից․
մահացել է 401 մարդ,
ակտիվ հիվանդ է (այսինքն՝ այս պահին հիվանդ է) 14,957 մարդ,
ապաքինվել է 33,459 մարդ։
