Վրաստանում ԱՄՆ նախկին դեսպան. «Թբիլիսին այլևս հուսալի գործընկեր չէ Վաշինգտոնի համար»
Վրաստան-ԱՄՆ հարաբերությունների վատթարացում
Վրաստանում ԱՄՆ նախկին դեսպան Յան Քելլին մեկնաբանել է ԱՄՆ փոխնախագահ Ջեյ Դի Վենսի Հարավային Կովկաս կատարած այցը, որում Վրաստանը ներառված չէր։
Քելլին հայտարարել է, որ զարմանալի չէ, որ փոխնախագահը չի այցելել Թբիլիսի։ Ինչպես բացատրել է նախկին դեսպանը, ԱՄՆ-ն Արևելք-Արևմուտք առևտրի համար դեռևս կարևոր է համարում Հարավային գազային միջանցքը, բայց ոչ Վրաստանի միջոցով։
Ջեյ Դի Վենսի՝ Հարավային Կովկաս այցելությունների շարքը մեկնարկեց փետրվարի 9-ին։ ԱՄՆ փոխնախագահը առաջին անգամ պաշտոնական այցով Հայաստան ժամանեց կնոջ՝ Ուշա Վենսի և երեխաների հետ։ Փետրվարի 10-ին նա այցելեց նաև Ադրբեջան։ Վենսը ամենաբարձրաստիճան ամերիկացի պաշտոնյան է, որը երբևէ այցելել է Հայաստան։ Տարիներ առաջ՝ 2022 թվականի սեպտեմբերին Երևան էր եկել ԱՄՆ Ներկայացուցիչների պալատի խոսնակ Նենսի Փելոսին։
Յան Քելլի.
«Վրացի լրագրողը հարցրեց, թե ինչու [ԱՄՆ փոխնախագահ] Վենսը չայցելեց Թբիլիսի իր վերջին այցի ժամանակ։ Այս հարցին իմ պատասխանը հետևյալն է․
«Վրացական երազանքի» կառավարությունը որոշել է հեռանալ Արևմուտքից։ Թրամփի առաջին նախագահության ժամանակ պետքարտուղար Պոմպեոն Թբիլիսիին կոչ արեց շարունակել Անակլիայի խորջրյա նավահանգստի շինարարությունը՝ արևմտյան կոնսորցիումի հետ համագործակցությամբ, նշելով, որ Չինաստանին «չեն հետաքրքրում Վրաստանի շահերը»։ Ի՞նչ արեց Թբիլիսին։ Խզեց արևմտյան պայմանագիրն ու նավահանգիստը հանձնեց մի կոնսորցիումի, որի կազմում էր նաև չինական կողմը։
Վարչապետ Կոբախիձեն նաև ռազմավարական գործընկերության համաձայնագիր ստորագրեց Չինաստանի հետ՝ ԱՄՆ-ին անվանելով «գլոբալ պատերազմի կողմնակից», իսկ Չինաստանին՝ «խաղաղության և առաջընթացի օրինակ»։
Սա [արտաքին քաղաքականության] վերակառուցման միակ օրինակը չէ։ Կառավարությունը նաև սկսել է կապեր հաստատել Իրանի հետ. Կոբախիձեն և այլ պաշտոնյաներ այցելել են Թեհրան, [Վրաստանի] ներկայացուցիչները նաև գրառումներ են կատարել «ամերիկյան ագրեսիայի» զոհերի հիշատակին նվիրված ցավակցությունների գրքում։
Զարմանալի չէ, որ փոխնախագահը խուսափում է այցելել Թբիլիսի։ ԱՄՆ-ն դեռևս կարծում է, որ Հարավային միջանցքը կարևոր է Արևելք-Արևմուտք առևտրի համար, բայց ոչ Թբիլիսիի միջոցով։ Վրացական կառավարությունն այլևս հուսալի գործընկեր չէ Վաշինգտոնի համար։ «Վրացական երազանքը» կատարել է իր ընտրությունը, և հիմա պետք է հաշտվի դրա [հետևանքների] հետ»։
Հետևեք մեզ — Facebook | Youtube
Վրաստան-ԱՄՆ հարաբերությունների վատթարացում
