Վրաստանում նեոնացիստական խմբավորման 16 անդամ է ձերբակալվել
Վրաստանում նեոնացիստներ են ձերբակալվել
Թբիլիսիի ոստիկանությունը ձերբակալել է արմատական նեոնացիստական խմբավորման տասնվեց անդամի, որոնք մեղադրվում են համակարգված կերպով ֆիզիկական և հոգեբանական բռնություն գործադրելու մեջ տարբեր տարիքային խմբերի անձանց, այդ թվում՝ դեռահասների։ Այդ գործողությունների վերաբերյալ նրանք նաև տեղեկատվություն են տարածել սոցիալական ցանցերում: Ձերբակալվածներից տասն անչափահասներ են:
Վրաստանի ներքին գործերի նախարարության փոխանցմամբ՝ խմբի անդամները իրենք են իրենց կոչել «նեոնացիստներ» և գործել են ֆաշիստական գաղափարախոսությանը համապատասխան։ Նրանք բռնի գործողություններ են իրականացրել իրենց ազդեցությունն ամրապնդելու և սեփական «իշխանությունը» հաստատելու համար, մասնավորապես՝ նրանց նկատմամբ, ովքեր չեն կիսում իրենց տեսակետները։
Հետաքննության տվյալներով՝ ձերբակալված անձինք մարդկանց ենթարկել են նվաստացուցիչ վերաբերմունքի, ֆիզիկական բռնության և հոգեբանական ճնշման, տեսանկարահանել են այդ ամենը բջջային հեռախոսներով, ապա տարածել տեսանյութերը տարբեր առցանց հարթակներում։ Իրավապահ մարմինները պնդում են, որ այդ նյութերն օգտագործվել են խմբի ճանաչելիությունը բարձրացնելու նպատակով։
Խմբի գործողությունների արդյունքում տուժել է տասից ավել մարդ, այդ թվում՝ չորս անչափահաս։
Խուզարկությունների արդյունքում ոստիկանությունը առգրավել է բջջային հեռախոսներ, դիմակներ, էլեկտրոնային սարքեր, նացիստական սիմվոլիկայով իրեր, ինչպես նաև սառը և ձայնային զենքեր։
Հարուցվել է քրեական գործ Վրաստանի քրեական օրենսգրքի 144-րդ հոդվածի համաձայն, այն է՝ անչափահասների նկատմամբ անմարդկային վերաբերմունք, որը կատարվել է մի խումբ անձանց կողմից համաձայնեցված և նախատեսում է մինչև 10 տարի ազատազրկում։
Ոստիկանությունը հայտնել է նաև, որ տեղական նեոնացիստական խմբավորման երկու առաջնորդներ՝ Լևան Աբեսաձեն և Դավիթ Ջապարովը, արդեն կրում են իրենց պատիժը նույնական մեղադրանքներով։
Վրաստանի ներքին գործերի նախարարությունը տեղեկացնում է, որ ինտենսիվ կերպով շարունակվում են քննչական գործողությունները՝ ֆաշիստական խմբավորումների հետ կապված այլ անձանց բացահայտելու համար։ Նախարարությունը կոչ է անում քաղաքացիներին անհապաղ կապ հաստատել ոստիկանության հետ, եթե իրենց մոտ առաջանա որևէ կասկած ինչ-որ իրավիճակներում՝ անչափահասների նկատմամբ բռնությունը և ծայրահեղական գաղափարախոսության տարածումը երիտասարդների շրջանում կանխելու համար։
Հետևեք մեզ — Facebook | Youtube
Վրաստանում նեոնացիստներ են ձերբակալվել
